Лъэпшъыкъо Ф.
КIэлэцIыкIу тхылъым и Дунэе мафэ ехъулIэу Адыгэ къэралыгъо университетым итхылъ тедзапIэ Iофтхьабзэ щызэхащагъ. КIэлэцIыкIумэ афэгъэхьыгъэ Дунэе литературэ зэнэкъокъоу Жэнэ Къырымызэ ыцIэкIэ щытым иосэшI куп ипащэу, «Детская литература из Адыгеи» зыфиIорэ проектым икIэщакIоу, тхакIоу КIуращынэ Лейлэ игукъэкIкIэ тхакIоу Анна Игнатовар Адыгеим къырагъэблэгъагъ.
Литературнэ зэнэкъокъоу «Детский университет» зыфиIорэм къыдыхэлъытагъэу тхылъыкIэхэм ялъэтегъэуцохэр, лекциехэр, зэдэгущыIэгъухэр, мастер-классхэр, егъэджэн сыхьатхэр рагъэкIокIыгъэх. Анна Игнатовам иегъэджэнхэр къэзыухыгъэхэм ар къэзыушыхьатырэ тхылъхэр аратыжьыгъэх.КIэлэцIыкIу художественнэ литературэм сэнаущыгъэ хэлъэу Iоф дэзышIэрэ авторхэр, шIэныгъэлэжьхэр, Адыгэ къэралыгъо университетым адыгэ филологиемрэ культурэмрэкIэ ифакультет щылажьэхэрэр, истудентхэр Iофтхьабзэм хэлэжьагъэх.
Лъэхъаным икIэлэцIыкIу тхакIуАнна Игнатовар 1973-рэ илъэсым Ленинград къыщыхъугъ. Урысые къэралыгъо педагогическэ университетэу Герценым ыцIэ зыхьырэм филологиемкIэ ифакультет къыухыгъ. УрысыбзэмкIэ кIэлэегъаджэу илъэс заулэрэ лэжьагъэ. 2007-рэ илъэсым къыщыублагъэу кIэлэцIыкIухэм афэтхэ. Иапэрэ усэхэр журналэу «Мурзилкэм», «Стихи.ru» зыфиIорэм къадэхьагъэх. 2012-рэ илъэсым къыщегъэжьагъэу Санкт-Петербург итхакIохэм я Союз хэт.ТхакIом итворчествэ зызфэбгъазэкIэ, зыдэмышIэжьэу узылъещэ, уепIу, уегъасэ, гъогу зафэ утырещэ. Ащ къеушыхьаты усакIом ипоэзие гукъэбзагъэм, цIыфыгъэм зэратешIыкIыгъэр.
ТхакIом ипрозэ хэт героймэ ядунай гъэшIэгъоны, ежь къыугупшысыгъэ щыIакIэм загъорэ нэпсыр къыпшIуегъакIо, зэ сэмэркъэу шъабэр хэлъэу, тIэкIу акIэнакIэзэ нэIуасэ ахэм уафешIы. БлэкIыгъэмрэ къэкIощтымрэ, цIыфым чIинагъэмрэ къыфэнагъэмрэ тхакIом гупшысэкIэ зэрегъафэх.2011-рэ илъэсым «О слонах, троллейбусах и принцах» зыфиIорэ апэрэ тхылъыр къыдигъэкIыгъ. ТхакIом ицIыкIугъом къыщыублагъэу пластилиным дэлэжьэныр икIас. ЕкIолIэкIэ гъэшIэгъон къызфигъотыгъэ тхылъэу «Вектор пластилина» зыфиIорэр къыдигъэкIыгъ. Пластилиным хишIыкIыгъэ иIэшIагъэхэм ясурэтхэр тхылъым дэхьагъэх. Ащ къыкIэлъыкIогъэ повестэу «Верю — не верю» зыфиIорэр «Книга года: выбирают дети» зыцIэ зэнэкъокъум щытекIуагъ, 2017-рэ илъэсым Урысыем итхылъ анахь дэгъуипшIым ахэхьагъ.Непэрэ мафэмкIэ усакIом тхылъ 30-м ехъу къыдигъэкIыгъ.Творческэ зэIукIэгъу— УрысыбзэкIи адыгабзэкIи къыдэкIырэ кIэлэцIыкIу литературэм хэхъоныгъэ егъэшIыгъэным, сэнаущыгъэ зыхэлъ тхакIохэр къыхэгъэщыгъэнхэм, культурэ кIэныр къэухъумэгъэным мы Iофтхьабзэр фэлажьэ. Адыгэ къэралыгъо университетым итхылъ тедзапIэ проект зэфэшъхьафхэр щыIэныгъэм щыпхырещы. Илъэс къэс апшъэрэ еджапIэм итедзэпIэ-полиграфическэ гупчэ научнэ, зэреджэщтхэ, методическэ, художественнэ ыкIи кIэлэцIыкIу тхылъи 100-м ехъу къыдегъэкIы. Илъэс фэдиз хъугъэу Анна Игнатовар Адыгеим къезгъэблэгъэным игугъапIэ къыздесхьакIыгъ ыкIи ар къыздэхъугъ. Мыщ фэдэ зэIукIэхэр тищыкIагъэх, — къыIуагъ КIуращынэ Лейлэ.Анна Игнатовам къызэриIуагъэмкIэ, икIалэу Константинрэ ятэрэ пкъэушхоу иIэх, ахэр ары итхыгъэхэм апэу яджэхэрэр.— КIэлэцIыкIухэм уафэтхэныр псынкIэп. Ахэм апае пшIэрэм нэфынэ хэлъын фае, пцIыр псынкIэу къагурэIо, гукъабзэх. Арэу щытми, ахэм сафэтхэныр лъэшэу сыгу рехьы. КIэлэцIыкIу литературэм итемэ гъэшIэгъонхэм якъызэIухын псынкIагъоп, гупшысэкIэ амал инхэр япхьылIэнхэ фае, — къыIуагъ Анна Игнатовам.Джащ фэдэу зэдзэкIыным къинэу хэлъыр тхакIом къыIотагъ.— Урысыбзэм нахь сымышIэу, IэкIыб литературнэ тхыгъэхэр бзитфыкIэ зэсыдзэкIыжьыгъэх. Мыщ дэжьым ежь авторым ыгу илъым тебгъэфэн, пчъагъэрэ уеджэжьынышъ, къыIонэу зыфэягъэр къыбгурыIон, зэхэпшIэн фае. ИмэхьанэкIи ишъуашэкIи зэмыхъокIэу зэбдзэкIыныр анахь шъхьаI. Сатырхэм азыфагу укъеджэн, зэхэпшIэн, къымытхыгъэу къыгъэнэгъэ шъэфхэр хэбгъотэнхэ фае. Авторым занкIэу къыIорэп, ау кIэлэцIыкIум къыгурыIонэу къетхы, — щхызэ къеIуатэ тхакIом.Ныбжь зэфэшъхьаф зиIэ кIэлэцIыкIухэм, еджапIэм джыри мыкIохэрэм къащыублагъэу Iэтахъохэм анэсэу, афэгъэхьыгъэ тхылъхэр тхакIом къыдигъэкIыгъэх.— «Вышла из дома старушка» зыфиIорэр хьалыгъухьэ ежьэгъэ ныом икъэбар фэгъэхьыгъ. Псы лъэбанэм къыдиухьэн гухэлъ иIэу псынжъым хэпкIагъ, ощхышхо къыублагъ, тучаным нэсыфэ икъэбар интернетым къырагъэхьагъ. Тучаныр цIэрыIо зэришIыгъэм фэшI ныом шIухьафтын— хэр къыфишIыгъэх. МыщкIэ непэрэ мафэу тызщыпсэурэм ишIыкIэхэр кIэлэцIыкIумэ язгъэлъэгъугъ. Сэмэркъэу шIыкIэм тетэу лъэныкъуабэмэ салъыIэсыгъ, ахэр кIэлэцIыкIухэм зэрашIогъэшIэгъоныщтым сыпылъыгъ. ТапэкIи кIэлэцIыкIухэм апае сытхэныр сигухэлъ, — къыIуагъ тхакIом.Анна Игнатовам Мыекъуапэ ыгу зэрэрихьыгъэр, зэIукIэм кIекIолIагъэхэм зэрафэразэр къыхигъэщыгъ. Iофтхьабзэр фэбагъэ хэлъэу рекIокIыгъ.Лъэпшъыкъо Фатим.