Краснодар щыщэу илъэс 53-рэ зыныбжь Андрей Бондаренкэм къыфызэIуахыгъэ уголовнэ IофымкIэ къалэу Краснодар и Прикубанскэ район хьыкум кIэух унашъор ыштагъ. Урысыем и Уголовнэ кодекс ия 159-рэ статья ия 4-рэ Iахь зигугъу къышIырэ бзэджэшIагъэ зэрихьагъэкIэ ар агъэмысагъ.
Нафэ къызэрэхъугъэмкIэ, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Вавилоным» игенеральнэ пащэу А. Ю. Бондаренкэм шэпхъакIэхэм адиштэрэ бетон яобществэ къыгъэхьазырынымкIэ сомэ миллион 15 хъурэ грант къыратыным зыщыкIэлъэIурэ тхылъ инновациехэмкIэ IэпыIэгъу афэхъурэ Фондым 2015-рэ илъэсым IэкIигъэхьагъ.Мыжъогъэушкъой заводэу «Ханскэми» (зэхэщакIор А. Ю. Бондаренкэм ишъхьэгъус) мы охътэ дэдэм зигугъу къэтшIыгъэ фондым зыфигъэзагъ, технологие пэрытхэм арыгъуазэзэ мыжъуакIэр гъэушкъоигъэным пае сомэ миллион 15 хъурэ грант къыратыным ари кIэлъэIущтыгъ.Фондыр тхылъхэм ахаплъи, «Коммерциализация» зыфиIорэ зэнэкъокъум къыдыхэлъытагъэу предприятие пэпчъ сомэ миллион 15 зырыз къыфыхигъэкIыгъ.Фондым рахьылIэгъэ бизнес-планхэмрэ зэзэгъыныгъэхэмрэ адиштэу продукцие лъэпкъыкIэхэр къызэрэдагъэкIыщт оборудованиер а ахъщэмкIэ предприятиехэм къащэфынэу щытыгъ.Ау пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Вавилонми», мыжъогъэушкъой заводэу «Ханскэми» оборудованиер къащэфыгъэп, зэзэгъыныгъэр агъэцакIэ фэдэу къащагъэхъуным пае компаниехэм документ нэпцIхэр Фондым IэкIагъахьэщтыгъэх.Уголовнэ Iофыр къызэIуихыгъ ыкIи зэхифыгъ Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ.Урысыем и Уголовнэ кодекс ия 159-рэ статья ия 4-рэ Iахь диштэу къалэу Краснодар и Прикубанскэ район хьыкум илъэси 2-рэ мэзи 6-рэ хьапс А. Ю. Бондаренкэм тырилъхьэгъагъ, сомэ миллион 29-рэ къэралыгъом фыригъэгъэзэжьынэу ыгъэнэфэгъагъ.А. Ю. Бондаренкэм уголовнэ пщыныжь зырагъэхьын фэегъэ пIалъэр зэрикIыгъэм къыхэкIэу хьапс пщыныжьыр тырахыжьыгъ, сомэ миллион 29-рэ къыпщыныжьын фаеу агъэнэфагъ. Хьыкумым иунашъо хэбзэ кIуачIэ иIэ хъугъэ.