Мыекъопэ районым щыщэу илъэс 35-рэ зыныбжь Алексей Комлевым къыфызэIуахыгъэ уголовнэ IофымкIэ Мыекъопэ гарнизон дзэ хьыкумым кIэух унашъор ыштагъ. Урысыем и Уголовнэ кодекс ия 30-рэ статья ия 3-рэ Iахь, ия 228.1-рэ статья ия 4-рэ Iахь зигугъу къашIырэ бзэджэшIагъэ зэрихьагъэкIэ ар агъэмысагъ.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ иIофышIэхэм зэрагъэунэфыгъэмкIэ, А. А. Комлевым хэбзэнчъэу наркотикхэр Мыекъопэ районым щызэригъакIо шIоигъуагъ. Наркотикхэр чIыпIэ шъэфхэм ачIилъхьэзэ IуигъэкIынхэу ар фэягъ. Ау хэбзэухъумэкIо къулыкъухэм наркотикхэр ащ къызэрэIахыгъэм къыхэкIэу игухэлъ бзаджэ ыкIэм нигъэсынэу хъугъэп.Уголовнэ Iофыр къызэIузыхыгъэр ыкIи зэхэзыфыгъэр Адыгэ Республикэм хэгъэгу кIоцI IофхэмкIэ и Министерств ары.Урысыем и Уголовнэ кодекс ия 30-рэ статья ия 3-рэ Iахь, ия 228.1-рэ статья ия 4-рэ Iахь адиштэу Мыекъопэ гарнизон дзэ хьыкумым илъэс 14 колонием дэсынэу А. А. Комлевым тырилъхьагъ. Хьыкумым ыштэгъэ унашъом хэбзэ кIуачIэ иIэ хъугъэ.