ЦIыфхэр рагъэблэгъагъэх

ХэушъхьафыкIыгъэ дзэ операцием хэлажьэхэрэм со­циальнэ IэпыIэгъу ягъэгъотыгъэным епхыгъэ Iофыгъохэм агъэгумэкIырэ цIыфхэр блэкIыгъэ тхьамафэм Мыекъуапэ имэрие рагъэблэгъагъэх.

Iофтхьабзэм хэлэжьагъэх шъолъыр, муниципальнэ къулыкъухэм япащэхэр, дзэ комиссариатхэм, къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ яспециалистхэр, депутатхэр, общественникхэр.Мыекъуапэ имэрэу Геннадий Митрофановым зэIукIэм къызэрэщыхигъэщыгъэмкIэ, дзэкIолIхэмрэ ахэм яунагъо­хэмрэ IэпыIэгъу ягъэгъотыгъэныр хабзэм иреспубликэ, имуниципальнэ ­къулыкъухэм япшъэрылъ шъхьаIэхэм ащыщэу непи къэнэжьы.— Урысые Федерацием и Президентэу Владимир Путинми, Адыгэ Республикэм и ЛIышъхьэу КъумпIыл Мурати джащ фэдэ пшъэрылъхэр къагъэуцугъэх. Тидзэкъулыкъу­шIэ­хэмрэ ахэм ягупсэхэмрэ сыдигъуи IэпыIэгъу тызэрафэхъущтым щыгугъынхэ алъэкIыным тэркIэ мэхьанэшхо иI, — къыIуагъ къалэм ипащэ.ХэушъхьафыкIыгъэ дзэ операцием иветеранэу, федеральнэ программэу «ЛIыхъужъхэм яуахът» зыфиIорэм хэлажьэу, подполковникэу Сергей Ковалевым — зэIукIэм хэлэжьагъэм ащ фэгъэхьыгъэу пчъагъэрэ къыIуагъ.— ЛъэгэпIэшхом тетэу кIогъэ мыщ фэдэ Iофтхьабзэр апэрэ зызэхащагъэр. Хэбзэ къулыкъу пстэуми ялIыкIохэр мыщ зэрэщыIагъэхэм ишIуагъэкIэ упчIэ зэфэшъхьафхэр къатын алъэкIыгъ, ахэм язэшIохын етIанэ ыуж ихьащтых. Джэуапхэр зэряттыжьыщтхэм нэмыкIэу Адыгеим и ЛIышъхьэу КъумпIыл Мурат пшъэрылъ къытфишIыгъ ахэм яIофыгъохэр зэшIуахыфэ гъу­сэныгъэ адытиIэнэу, — къыIуагъ Сергей Ковалевым.ЗэIукIэм къекIолIагъэхэр Iофыгъо зэфэшъхьафхэм агъэгумэкIыщтыгъэх. ХэушъхьафыкIыгъэ дзэ операцием иветеранхэмрэ дзэ къулыкъушIэхэм яIа­хьылхэмрэ республикэ ахъщэ IэпыIэ­гъухэр къазэраратырэм къыкIэупчIагъэх, ячIыгу Iахьхэм ягъунапкъэ нэс гъэстыныпхъэ шхъуантIэр къыращэлIэнымкIэ IэпыIэгъу къыкIэлъэIугъэх, Iоф горэм пыхьанхэм пае зэрэзекIонхэ фаемкIэ упчIэжьэгъу ашIыгъэх. Хэушъхьафы­кIыгъэ дзэ операцием иветеранэу Эдуард Бараевыр ары ащ фэдэ упчIэ къэзыты­гъэр.— Республикэм щагъэцэкIэрэ социальнэ зэзэгъыныгъэм тетэу хэушъхьафыкIыгъэ дзэ операцием иветеранхэм ябизнес пае ящыкIэгъэ оборудованиер ращэфынэу сомэ мин 350-м нэс къаIахын алъэкIыщт. Унэе IэпыIэгъу хъызмэтым пае сомэ мин 200 къаIысхы сшIоигъу. Ау тиунагъо гъот макIэ зиIэхэм зэра­хэмыхьэрэм епхыгъэу Iофыгъо го­рэхэр къэуцунхэ ылъэкIыщт. Мыщ фэдэ лъэхъаным сыдэущтэу сызекIомэ нахьышIу? — къэупчIагъ хъулъфыгъэр.Адыгеим IофшIэнымрэ социальнэ хэхъоныгъэмрэкIэ иминистрэ игуадзэу Екатерина Леоновам зэIукIэм къызэрэщызэхифыгъэмкIэ, мыгъэ къыщегъэжьагъэу къэралыгъо IэпыIэгъу лъэпкъыкIэ республикэм щаратэу аублагъ: хэу­шъхьафыкIыгъэ операцием хэлэжьагъэ­хэу дзэм къыхэкIыжьыгъэхэм сомэ мин 350-рэ зытефэрэ социальнэ зэзэгъыныгъэ адашIын алъэкIыщт.— А мылъкумкIэ Iоф горэ къы­зэIуахын е яхъызмэт зырагъэу­шъомбгъун амал яI. Ащ фэдэ со­циальнэ IэпыIэгъу къаратыным пае унагъом исым гурытымкIэ ха­хъоу иIэр къырадзэнэу ищыкIэгъэ­жьыщтэп, — къыIуагъ Екатерина Леоновам.Геннадий Митрофановым зэрэхигъэу­нэфыкIыгъэмкIэ, Iофтхьабзэм хэлэжьагъэхэм дэгъоу Iоф зэрашIагъэм ишIуагъэкIэ Iофыгъохэм азыныкъом нахьыбэ а зэIукIэм щызэшIуахын алъэкIыгъ, тхылъэу къаIэкIэхьагъэ пэпчъ ыужкIэ рыкIорэм гъунэ лъафыщт. Мыекъуапэ ипащэ пшъэрылъ афишIыгъ тхылъ пэпчъ икъоу зэхафынэу, шIуагъэ къэзытыщт хэкIыпIэхэр псынкIэу къагъотынхэу.Александра Балабась.