Лъэпшъыкъо Ф.
КIэрэщэ Тембот и Литературнэ музей шIэжь Iофтхьабзэ щыкIуагъ. Филологие шIэныгъэхэмкIэ докторэу, профессорэу, АР-м ыкIи Пшызэ шъолъыр шIэныгъэхэмкIэ язаслуженнэ IофышIэшхоу НэмытIэкъо Розэ Юсыф ыпхъур къызыхъугъэр илъэс 90-рэ зэрэхъурэм ар фэгъэхьыгъагъ.
Лъэпкъ музеим ипащэу Джыгунэ Фатимэ Iофтхьабзэр къызэIуихыгъ ыкIи ищыIэныгъэ гъэсэныгъэм фэзыгъэшъошэгъэ НэмытIэкъо Розэ къытегущыIагъ.Iофтхьабзэм хэлэжьагъ ыкIи зэрищагъ НэмытIэкъо Розэ ыпхъоу Нэшъулъэщэ Индирэ (АР-м и Къэралыгъо Совет — Хасэм и Аппарат иупчIэжьэгъу шъхьаI, филологие шIэныгъэхэмкIэ кандидат, доцент).— Непэ сянэ къызыхъугъэ маф, псаугъэмэ, илъэс 90-рэ хъущтыгъэ. ИIахьылхэр, дэлэжьагъэхэр, ригъэджагъэхэр, дэгъоу зышIэщтыгъэхэр непэрэ Iофтхьабзэм къекIолIагъэх. Сянэрэ сятэрэ Адыгэ къэралыгъо университетым щырагъаджэщтыгъэх. Сятэу Амин Нао ыкъор физикэмкIэ кафедрэм ипрофессорыгъ. Сянэ урысыбзэмкIэ кафедрэм ипрофессорыгъ ыкIи илъэсыбэрэ ипэщагъ. Сшыпхъоу Наимэрэ сэрырэ тысабыигъом щегъэжьагъэу шIэныгъэм тызэрэфащэщтым пылъыгъэх. АпэрэмкIэ, сянэ сэркIэ ны Iуш, етIанэ — профессор, лъэшэу гукъэкIыжь фабэхэр фысиIэх, — къыIуагъ Индирэ.НэмытIэкъо Розэ лъэуж нэфэу къыгъэнагъэм къекIолIагъэхэр къытегущыIагъэх. IэпэIэсэныгъэшхо, шIэныгъэшхо ыкIи цIыфыгъэшхо ащ хэлъыгъ, гукъыдэчъэу иIэм хэти гушхуагъэ хилъхьэщтыгъ, игуфэбагъэ нэмыкIхэр ыгъэфабэщтыгъэх. ШIушIагъэу иIэм ыпкъ къикIыкIэ шъхьэкIэфэныгъэу фашIыщтыгъэр ыкIи джы къызнэсыгъэм шIукIэ агу къызэрэкIыжьырэр ащ къылэжьыгъэх. ИцIыф гъэпсыкIэ щысэтехыпIэу щытыгъ, ынаIэ бэмэ атыридзэщтыгъ, шIушIагъэу къыбгъодэкIыщтыгъэр гъунэнчъагъ. СыдигъокIи ар цIыфым едэIунэу ыкIи игумэкIхэр къыгурыIонхэу, IэпыIэгъуи ригъэгъотынэу хьазырыгъ. Ар цIыфмэ шIу алъэгъущтыгъ, джэуапэгъу зэрафэхъущтыр ашIэщтыгъ. Наукэм илъагъо студентыбэ тыригъэуцуагъ, фигъэчэфыгъ.Зэхахьэм хэлэжьагъэх Лъэпкъ музеим иIофышIэхэр, АКъУ-м филологиемкIэ ифакультет икIэлэегъаджэхэу Розэ дэлажьэщтыгъэхэ Шышъхьэ Нелли, Ирина Архиповар, Надежда Гриценкэр, Анжела Адзиновар, Лилия Копоть, АКъУ-м научнэ IофтхьабзэхэмкIэ и Департамент ипащэу Елена Куква, иаспиранткэу Сапый Саидэ, ригъэджэгъэхэ Тхьаркъохъо Сафыет, Къуекъо Асфар, АР-м ипромышленникхэмрэ ипредпринимательхэмрэ я Союз игъэцэкIэкIо пащэу НатIэкъо Мурат, Адыгэ радиом ипащэу ХьакIэмыз Сусанэ ыкIи нэмыкIхэри.— Тэ чIэтынагъэр шIэныгъэлэжь ыкIи кIэлэегъэджэ къодыеп, цIыфыгъэшхо ыкIи гуфэбэныгъэшхо зыхэлъыгъэ цIыф. ТыщэIэфэ тщыгъупшэщтэп, идунэететыкIагъэр, цIыфыгъэ ыкIи ныбджэгъуныгъэ шапхъэу тигъэлъэгъугъэхэр щысэтехыпIэу тиIэщтых,— къыIуагъ Шышъхьэ Нелли.— НэмытIэкъо Розэ ицIыфыгъэ хъупкъэ дахэ иIэу зэрэщытыгъэр, илъэпкъ гукIэгъу зэрэиныгъэр, илъэпкъ фэгумэкIэу зэрэщытыгъэр тыгу къинэщт, — къыхигъэщыгъ Къуекъо Асфар ипсалъэ.Розэ бэмыIо башIэщтыгъэу алъытагъ. Адыгэ лъэпкъым ыцIэ зыIэтыгъэхэм, ащ щытхъу къыфэзыхьыгъэхэм ясатырэ Розэ пытэу хэуцуагъ.Лъэпшъыкъо Фатим.