Спортышхом хэщэгъэнхэм фэлэжьэщт

Адыгеим и ЛIышъхьэу КъумпIыл Муратрэ я VIII-рэ зэIугъэкIэгъумкIэ Къэралыгъо Думэм и Тхьаматэ игуадзэу, Урысыем теннис цIыкIумкIэ и Федерацие ипрезидентэу Александр Бабаковымрэ Мыекъуапэ теннис цIыкIум хэхъоныгъэ щишIыным фытегъэпсыхьэгъэ шъолъыр гупчэм икъызэIухын хэлэжьагъэх.

Физкультурэмрэ псауныгъэм икъэу­хъумэнрэ афытегъэпсыхьэгъэ гупчэу «Ошъутенэм» спорт псэолъакIэр ща­шIыгъ. Урысыем теннис цIыкIумкIэ и Федерацие имылъкукIэ ар агъэпсыгъ ыкIи зыщагъэсэнымкIэ, зэнэкъокъу зэ­фэшъхьафхэр щызэхэщэгъэнхэмкIэ къыз­фагъэфедэн алъэкIыщт Iэмэ-псы­мэхэмкIэ зэтырагъэпсыхьагъ. Залым зы сменэм нэбгырэ 50 фэдиз чIэфэщт, джэгупIэ стол 12 ащ чIэт. С. М. Джэнчатэм ыцIэкIэ щыт гурыт еджапIэу N 1-мрэ республикэ гурыт еджапIэу N 3-м теннис цIыкIумкIэ икъутамэрэ защызыгъасэхэрэм джы псэолъакIэм яIэпэIэсэныгъэ щыхагъэхъон алъэкIыщт.АР-м и ЛIышъхьэрэ Федерацием ипрезидентрэ Гупчэм къекIолIэрэ спорт­смен ныбжьыкIэхэм аIукIагъэх. КъумпIыл Муратрэ Александр Бабаковымрэ залыкIэр къызэрэзэIуахыгъэм фэшI теннисист ныбжьыкIэхэм афэгу­шIуагъэх, гъэхъэгъакIэхэр ашIынхэу афэлъэIуа­гъэх.

«Тэ тызыфаер ыкIи тынаIэ зытедгъэ­тырэр Адыгеим шIоигъоныгъэ зиIэ пстэуми, анахьэу тиныбжьыкIэхэм, зы­щагъэсэным иамал ятыгъэныр ары. КIэлэцIыкIухэм яамалхэм ахэхъо къэс ясэнаущыгъи нахь зыкъыIэтыщт, спортышхом екIурэ гъогури нахь къафызэIухыгъэщт. Муниципалитет пстэуми ащкIэ ящыкIагъэхэр арагъэгъоты: джырэ уахътэм диштэрэ гупчэхэу физкультурэмрэ псауныгъэм игъэпытэнрэ атегъэпсыхьагъэхэр ащашIых, спорт сек­циякIэхэр къащызэIуахых. Чемпион хъущт­хэр пIугъэнхэмкIэ, цIыфхэр жъугъэу зыхэлэжьэхэрэ спортым нахь зиу­шъомбгъунымкIэ амалхэм джыри нахь ахэдгъэхъощт», — къыIуагъ респуб­ликэм и ЛIышъхьэ.

КъумпIыл Мурат къызэрэхигъэщы­гъэмкIэ, хэгъэгум ипащэхэм яIэпыIэ­гъушхо, партиеу «Единэ Россием» ипроектхэр щыIэныгъэм гъэцэкIагъэ зэрэщыхъухэрэм яшIуагъэкIэ спортым псынкIэу хэхъоныгъэ ешIы, физическэ культурэмрэ спортымрэ афэщагъэхэм япчъагъэ хэхъо, непэкIэ Адыгеим щыпсэухэрэм япроцент 60 фэдизыр щыIэкIэ-псэукIэ тэрэзым, псауныгъэм игъэпытэн апылъых.Республикэм и ЛIышъхьэ анахьэу рэзэныгъэ гущыIэхэр зыфигъэзагъэхэр Урысыем теннис цIыкIумкIэ и Федерацие ипрезидентэу Александр Бабаковыр ары. Ащ ренэу ишIуагъэ къарегъэкIы, спорт псэолъакIэм ишIынкIи, псэупIэу Яблоновскэм теннис цIыкIумкIэ ащ фэдэ гупчэу щагъэпсырэмкIи фэлъэкIыщтымкIэ ишIуагъэ къегъакIо. Мы илъэсым бжыхьэм ехъулIэу а гупчэм ишIын аухынэу мэгугъэх.

Александр Бабаковым къыхигъэщыгъ Федерацием Адыгэ Республикэм шIуагъэ къэзытырэ зэдэлэжьэныгъэ ды­риIэ зэрэхъугъэр, республикэм ипащэхэми Федерациер кIэщакIо зыфэхъурэ IофтхьабзэхэмкIэ къызэрэдырагъаштэ­рэм, административнэ Iофыгъохэу къэу­цухэрэр псынкIэу зэшIохыгъэ зэрэхъу­хэрэм апае зэрафэразэр.«ГупчакIэр къызэIухыгъэ зэрэхъугъэм фэшI кIалэхэм сафэгушIо. Республикэ дахэм шъущэпсэу ыкIи спортым шъу­пылъынымкIэ амалышхохэр шъуиIэх. Шъолъырым ипащэ къыткIэхъухьэхэрэм зэдиштэу хэхъоныгъэ ашIыным, тэрэзэу пIугъэнхэм ынаIэ атыригъэтыным мэхьанэшхо иI. Теннис цIыкIум игупчэ Адыгеим щыдгъэпсынэу зитэхъухьэм, республикэр ары IофшIэн шъхьаIэр зыгъэцэкIагъэр. УичIыгу гупсэ шIу умылъэ­гъоу, ащ инеущрэ мафэ зыфэдэщтым уимыгъэгумэкI хъумэ, ащ фэдэ проектыр зэшIопхын плъэкIыщтэп», — къыхигъэщыгъ Федерацием ипрезидент.Теннис цIыкIумкIэ Урысым ичемпионатхэм заулэрэ текIоныгъэ къащыдэзыхыгъэхэ Арсений Гусевымрэ Семен Шевнинымрэ хьакIэхэм апае мастер-­класс къагъэлъэгъуагъ. Ащ нэужым республикэм испорт еджапIэ чIэсхэм спортсмен цIэрыIохэм анаIэ къатетэу тренировкэхэр ашIыгъэх.ИкIэухым Адыгеим и ЛIышъхьэрэ Урысыем теннис цIыкIумкIэ и Феде­рацие ипрезидентрэ шъолъыр гупчэр къаплъы­хьагъ, «Ошъутенэм» физкультурэмрэ псауныгъэм икъэухъумэнрэкIэ амалэу иIэхэм защагъэгъозагъ: мылылъэ чIыпIэр, гъэпскIыпIэр, лъэныкъуабэмэ афыте­гъэпсыхьэгъэ джэгупIэхэр, тренажернэ залхэр ащ хэтых.АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.