Къулыкъур — ищыIэныгъ

Дзэ комиссариатыр зычIэт унэм ипчъэшъхьаIу Урысыем иармие къы­щежьэу алъытэ, ахэр ары ынапэр. Мыщ Iоф щызышIэхэрэм бэ ялъыты­гъэр, апэрэмкIэ, дзэ къулыкъум имэхьанэ аужырэ илъэсхэм зэхатшIэу зыкъиIэтыгъ. Илъэс 20 хъущт подполковникэу, ЛIы­хъужъныгъэм иорден изехьакIоу Валерий Николаевым щытхъу хэлъэу ипшъэрылъхэр АР-м идзэ комиссариат зыщигъэцакIэхэрэр.

Мы уахътэм ар дзэ къулыкъум ащэщтхэр зыщаугъоирэ пунктым ипащ. МэфэкIым ипэгъокIэу «Адыгэ макъэр» ащ IукIагъ.ТигущыIэгъу Днепропетровскэ хэкум къыщыхъугъ, щеджагъ. Гурыт еджапIэр къызеухым, къыхихыщт сэнэхьатыр гъэнэфагъэу щытыгъ. Теубытагъэ хэ­лъэу дзэ Iофым зызэрэфи­гъэзэщтыр гухэлъышIоу кIалэм зыдиIыгъыгъ, сыда пIомэ дзэ­къулыкъушIэ унагъом ар къи­хъухьагъ.— Сятэ Советскэ Союзым илъэхъан хэгъэгу кIоцI дзэхэм илъэс пчъагъэрэ ахэтыгъ, подполковникэу тIысыжьыгъагъ. Сянэш нахьыкIэр советскэ дзэ­хэм якуп хэтэу Германием къулыкъур щихьыгъ, ар прапорщикыгъ. Ахэм ягъогу къызэрэ­хэсхыщтым щэч хэлъыгъэп. 1985-рэ илъэсым зэхэт дзэ команднэ училищэу Ташкент дэтым сычIэхьагъ. Ар къызысэу­хым, гурытазиатскэ дзэ шъо­лъы­рым Алма-Ата пэмы­чыжьэу щэрыокIо дивизием сагъэкIуагъ, — къеIуатэ Валерий Валентин ыкъом.Илъэситфырэ ащ къулыкъур щихьыгъэу Советскэ Союзым изэхэзыжьын тефагъ. Къулы­-къур щылъигъэкIотэнэу я 131-рэ Мыекъопэ бригадэм 1994-рэ илъэсым ар къагъэкIожьыгъ. ЩэрыокIо ротэм икомандирэу ригъажьи, батальоным, штабым япэщэ IэнатIэхэр ыгъэцэкIагъэх. 2003-рэ илъэсым я 527-рэ хэу­шъхьафыкIыгъэ батальоным икомандирэу агъэнэфагъ. Нэ­ужым республикэ дзэ комиссариатым цIыфхэр дзэ къулыкъум дэщыгъэнхэмкIэ ыкIи ухьазырыгъэнхэмкIэ иотдел офицер шъхьаIэу илъэсищрэ къулыкъур щихьыгъ. 2009-рэ илъэсым мэлылъфэгъум къыщегъэжьагъэу непэ къызнэсыгъэм дзэ къулыкъум ащэщтхэр зыщаугъоирэ пунктым ипащ. Зэхэбгъэхъо­жьымэ, республикэ дзэ комиссариатым ар зыIутыр илъэс 20 хъущт.Дзэ къулыкъур ехьыфэ Вале­рий Николаевыр чIыпIэ плъыр­хэм ащыIэнэу игъо ифагъ. Осетин-ингуш зэпэуцужьым, чэчэн заом, абхъаз-хъурцэ Iэшэ зэIуупIэныгъэм зэгъэшIужьэкIо батальоным икомандирэу апхырыкIыгъ. 1994-рэ илъэсым Гроз­нэр аштэнэу зыфежьэхэ чэщым идзэ пшъэрылъхэр зэрифэ­шъуашэу зэрэзэшIуихыгъэхэм, лIыгъэу зэрихьагъэхэм афэшI ЛIыхъужъныгъэм иорден къыфагъэшъошагъ. ИщыIэныгъэ гъогу ар рыплъэжьымэ, зы мафи рыкIэгъожьэу къыхэкIыгъэп.— ИкIэрыкIэу уахътэм къытыригъэзэжьэу сэнэхьатхэм сахэдэнэу хъугъэми, теубытагъэ хэлъэу дзэ Iофыр къыхэсхыщт. Нэбгырэ пэпчъ сэнэхьат горэм фытегъэпсыхьагъэу къэхъу, сэ дзэ къулыкъур — сищыIэныгъ. КъэскIугъэ гъогум сырыкIэгъо­жьырэп, къыздэхъугъэм сырыраз, — хигъэунэфыкIыгъ подполковникым.Валерий Николаевым къызэрэхигъэщыгъэмкIэ, зипшъэ­рылъхэр дэгъоу зыгъэцэкIэрэ IофышIэхэу Iутхэр ары дзэ комиссариатым ибаиныгъэр. Ахэм яIэпэIэсэныгъэ, япшъэ­дэкIыжь ин къызэрагурыIо-рэм патриотизмагъэу ахэлъым яшIуа­гъэкIэ республикэ дзэ комиссариатым чIыпIэ лъагэ Къыблэ дзэ шъолъырым щеубыты.ТигущыIэгъу зипэщэ пунктым нэбгырэ 13 щэлажьэ. Ахэм зырызэу емызэщыжьэу ар къа­тегущыIэн елъэкIы. Нэбгырэ пэпчъ къэралыгъо IофшIакIэм мэхьанэ зиIэ хэгъэчэрэгъогъэ гъучI цIыкIоу елъытэ.— Адыгеим икIынышъ, дзэ къулыкъур зыхьыщтхэр зэкIэ муниципальнэ дзэ комиссариатхэм мыщ къыращалIэх. Мэфищэ пунктым дэсых, а пIалъэм къыкIоцI медицинэ, психо­логие уплъэкIунхэр афашIых. КъулыкъушIэ пэпчъ, уахътэм елъытыгъэу, шъуашэкIэ зэтырагъэпсыхьэ, чIэгъчIэлъхэр, мэзэ 12-м зызэратхьакIыщт пкъы­гъохэр зыдэлъ Iалъмэкъхэр, нэмыкIхэри аратых, банковскэ картэхэр афашIых. Гъэ къэс зэпыугъо фэмыхъоу къытфа­гъэуцурэ пшъэрылъыр тэгъэцакIэ, тапэкIи джаущтэу зэрэщытыщтым сицыхьэ телъ, — хигъэунэфыкIыгъ Валерий Валентин ыкъом.Дзэ комиссариатым ынаIэ зытыригъэтыхэрэм ащыщ ныбжьыкIэхэм япатриотическэ пIу­ныгъэ. Къулыкъум ежьагъэхэр мэфэкI шIыкIэм тетэу агъэкIуа­тэх, ащ фэгъэхьыгъэ Iофтхьа­бзэм хэбзэ къулыкъушIэхэр, дзэ инспекторхэр, общественнэ ор­ганизациехэм ялIыкIохэр, ныб­жьыкIэ движениеу «Юнармиер» къырагъэблагъэх.ХэушъхьафыкIыгъэ дзэ операциер къызежьагъэм къыщыублагъэу дзэ комиссариатхэм апшъэ ифэрэр нахьыбэ хъугъэ. ЗэзэгъыныгъэкIэ къулыкъу хьыгъэным шIуагъэу пылъыр цIыф­хэм агурыгъэIогъэныр мыхэм япшъэрылъхэм ащыщ. Дзэм имэхьанэ нахь зыкъызщиIэтыгъэ лъэхъан джы тызхэтыр. ТигущыIэгъу зипэщэ пунктыр мы Iофым фэгъэзагъэп, ау зэрэзэхэщагъэм дэгъоу щыгъуаз.— Лъэныкъуищ зэдэлэжьэныгъэм тетэу Iофыр агъэпсы: муниципальнэ образованиехэм ащыIэ дзэ комиссариатхэр, зэзэгъыныгъэкIэ къулыкъу зы­хьыщтхэм якъыхэхын фэгъэзэгъэ пунктыр ыкIи гъэсэныгъэ организациехэр. Зэрифэшъуа­шэу IофшIэныр зэхэщагъ, кIэух гъэнэфагъэ къеты. Сэ сшъхьэкIэ къыхэзгъэщымэ сшIоигъу, уныбжьыкIэмэ, мыщ амалыбэ къыуеты. Дзэ ипотекэ закъом нахь хэмылъми, адрэхэм ягугъу къэс­шIыжьырэп. ПсэупIэ бгъотыным мэхьанэ иI, унагъо зыщыпшIэн щыIэ зыхъукIэ, нэ­мыкI лъэныкъохэр къызэпэфэх, — еIо Валерий Валентин ыкъом.Шъугу къэдгъэкIыжьын ­къулыкъу зыхьыщт ныбжьыкIэ­хэм джыри зы амалыкIэ яIэ зэрэхъугъэр. Ар цIыф зэрымыс быбырэ пкъыгъом ясистемэхэм яподразделениякIэу агъэпсырэм зэзэгъыныгъэкIэ къулыкъур ща­хьын зэралъэкIыщтыр ары. Уп­чIэ зиIэхэм зыз­дагъэзэшъущтыр: къ. Мые­къуапэ, ур. Комсомольскэр, 217-рэ, я 119, 102-рэ кабинетхэр е телефонхэу: 8 (8772) 52-11-27, 52-11-25. Зэзэгъыныгъэ шIыкIэкIэ къулыкъу зыхьы зышIоигъохэм апае линие плъы­рыр: 117#4 ыкIи 8 (8772) 52-11-28. Джащ фэдэу шъхьадж зыщыпсэурэ чIыпIэм щыIэ дзэ комиссариатым зыфэжъугъа­зэмэ, шъуищыкIэгъэ къэбарыр яжъугъотылIэщт. Телеграм-каналэу «Адыгея — Служу Родине» зыфиIорэм игъэкIотыгъэ къэбарыр ижъугъотэщт.Непэ зимэфэкI хэзыгъэунэфыкIырэ дзэ комиссариатхэм яIофышIэхэм, яветеранхэм тигущыIэгъу ыгу къыдеIэу афэгушIо. Псауныгъэ пытэ яIэу, мамыр щыIакIэр ашъхьарытэу щыIэнхэу афэлъаIо!