Э. Лаутеншлегер
Мы илъэсым игъэтхэ дзэ дэщыгъо мэлылъфэгъум и 1-м Адыгеим щырагъэжьагъ. Ащ фэгъэхьыгъэ пресс-зэIукIэу Мыекъуапэ щыкIуагъэр АР-м идзэ комиссар шъхьаIэу Александр Авериным зэрищагъ.
Iофтхьабзэм хэлэжьагъэх АР-м идзэ комиссариат цIыфхэр дэщыгъэнхэмкIэ ыкIи ухьазырыгъэнхэмкIэ иотдел ипащэу Виталий Лебедевыр, идзэ врачебнэ-комиссие итхьаматэу Игорь Буренковыр, районхэм ащыIэ дзэ комиссариатхэм ятхьаматэхэр, журналистхэр.Пэублэм дзэ комиссар шъхьаIэм къызэрэхигъэщыгъэмкIэ, илъэс зэкIэлъыкIохэм федеральнэ гупчэм къафигъэуцурэ пшъэрылъыр республикэм идзэ комиссариат игъом ыкIи зэрифэшъуашэу егъэцакIэ, ащ дакIоу Къыблэ дзэ шъолъырым пэрытныгъэр щеубыты. Зэрэхабзэу, дзэ дэщыным Iоф дэзышIэрэ лъэныкъо пстэури ащ фэхьазырых.— ЗэхъокIыныгъэу дзэ дэщыным фэхъугъэхэм ащыщ къулыкъу зыхьыщтхэм яугъоин джы илъэс псаум зэрэрекIокIыщтыр. Ащ ишIуагъэкIэ дзэ комиссариатхэм IофшIэныр атемыгъэуагъэу, икъоу медицинэ ыкIи психологие уплъэкIунхэр зэрахьанхэ алъэкIыщт. Ащ емылъытыгъэу, дэщыгъохэм яедзыгъохэр зытетыгъэм фэдэу — гъатхэм ыкIи бжыхьэм — зэхэщэгъэщтых. Мыгъэрэ дзэ дэщыгъом республикэм щыщ нэбгырэ 3000-м ехъу къулыкъур ахьыным къыхеубытэ. ИлъэсымкIэ дащын фаеу къытфагъэуцугъэ пшъэрылъыр пстэумкIи нэбгырэ 900 фэдиз. Гъэтхэ дзэ дэщыгъом нэбгырэ 500 фэдиз къулыкъум ащэщтыр. ПIалъэу къызэрэтыщтхэр ыкIи чIыпIэу зыдащэщтхэр зэблэхъугъэхэп, — хигъэунэфыкIыгъ Александр Авериным.Къэбар жъугъэм иамалхэм къатыгъэ упчIэхэм яджэуапхэр А. Авериным къытыжьыгъэх.
Iэшъынэ Сусан.