АР-м и ЛIышъхьэ ипресс-къулыкъу
Адыгеим илIыкIо купэу АР-м и ЛIышъхьэу КъумпIыл Мурат зипащэр дунэе экономическэ форумэу «Абхъазыр — къэкIощтым иинвестициехэр» зыфиIорэм хэлажьэ. Къалэу Сыхъумрэ Абхъазым ирайонхэмрэ мэлылъфэгъум и 3 — 4-м ар ащэкIо. ЗэIукIэшхом къекIолIагъэх Урысыем и Президент и Администрацие ипащэ иапэрэ гуадзэу Сергей Кириенкэр, Республикэу Къыблэ Осетием и Президентэу Алан Гаглоевыр, УФ-м и Президентрэ и Правительствэрэ я Администрацие илIыкIохэр, Урысыем ишъолъыр 15-мэ ыкIи IэкIыб къэралхэм, хэгъэгум ибизнес-сообществэ ялIыкIохэр.
Абхъазым и Президентэу Бадра Гунба къызэриIуагъэмкIэ, мы зэхахьэм пшъэрылъэу иIэр лъэныкъуитIумкIи федэ зыхэлъ зэпхыныгъэхэу тапэкIэ зэдитхъухьащт проектхэм лъапсэ афэхъущтхэм шIуагъэу къыздахьын алъэкIыщтхэр гъэнэфэгъэнхэр ары.УФ-м и Президентэу Владимир Путиным зэIукIэм хэлажьэхэрэм къафигъэхьыгъэ шIуфэс псалъэм къызэрэщыхигъэщыгъэмкIэ, «Абхъазым теубытагъэ хэлъэу ыпэкIэ зэрэлъыкIуатэрэм Урысыем дырегъаштэ, ащ экономикэмкIэ изыпкъитыныгъэ ыкIи ищынэгъончъагъэ гъэпытэгъэным ишIуагъэ арегъэкIы».
Урысыем и Президент и Администрацие ипащэ иапэрэ гуадзэ шIуфэсым къеджагъ. Сергей Кириенкэм джащ фэдэу къызэIукIагъэхэр щигъэгъозагъэх мэлылъфэгъум и 2-м Урысыем и Президент унашъоу ышIыгъэм. Ар зыфэгъэхьыгъэр 2026 — 2027-рэ илъэсхэм илъэс 14-м шIомыкIыгъэ кIэлэцIыкIухэр Урысыем икIыхэзэ Абхъазым кIонхэ амал яIэ зэрэхъущтыр ары. ЗекIоу ащ ихьэхэрэм япчъагъэ нахьыбэ хъунымкIэ ишIуагъэ къызэрэкIощтыр нафэ. Урысыемрэ Абхъазымрэ азыфагу илъ зэдэлэжьэныгъэм изы лъэныкъо шъхьаIэхэм ащыщых энергетикэр, логистикэр, транспортыр, мэкъу-мэщыр, зекIоныр ыкIи нэмыкIхэр.«Урысыем IэпыIэгъушхоу къытитырэр мылъку IэпыIэгъу къодыеу щытэп, тызэгъусэу проектхэр зэдызэшIотэхых. Ащ къегъэлъагъо зэкъошныгъэ, зэдегъэштэныгъэ тазыфагу зэрилъыр, зэкIэми зэдытиIофэу щыт щыIэкIэшIум тызэрэфакIорэм шIошъхъуныгъэу фытиIэр дгъэпытэныр. Урысые Федерацием и Президентэу Владимир Путиным илъэсыбэ хъугъэу тицIыфхэм къаритырэ IэпыIэгъум пае инэу сызэрэфэразэр къэсэIо», — къыхигъэщыгъ Бадра Гунба.
Абхъазым и Президент къызэриIуагъэмкIэ, мы зэIукIэшхом илъэхъан правительствэ зэзэгъыныгъи 3-мэ акIэтхэнхэу ары, ахэм ахэхьэх зы къулыкъу зэзэгъыныгъэ, правительствэ ыкIи къулыкъу меморандум 15, предприятиехэм зэдашIыщт зэзэгъыныгъэ 19. Ахэм лъэныкъуитIуми зэдызэшIуахыщт проектхэр щыIэныгъэм игъом гъэцэкIагъэ щыхъунхэм кIочIакIэ къахалъхьащт, мэкъу-мэщым, культурэм, творчествэм хэхъоныгъэ ашIынымкIэ, ащ нэмыкIэу Абхъазымрэ Урысыемрэ ялIыкIохэр хэлажьэхэзэ бизнесым ылъэныкъокIэ аштэщт сатыу-экономикэ, инвестиционнэ зэзэгъыныгъэхэм нахь зарагъэушъомбгъущт.
Социальнэ-экономикэ зэдэлэжьэныгъэмкIэ Правительствэ комиссием илIыкIохэм зэIукIэхэр зэдыряIэщтых, Абхъазымрэ Урысыемрэ зекIонымкIэ ябизнес илIыкIохэми IофшIэгъу зэIукIэгъухэр къяжэх. КъыкIэлъыкIорэ лъэныкъохэмкIэ Iэнэ хъураехэр зэхащэщтых: «Инвестиционнэ IофшIэнымкIэ къэралыгъо IэпыIэгъум мэхьанэу иIэр», «Мэкъу-мэщым хэхъоныгъэ егъэшIыгъэныр», «Экономикэм ихэхъоныгъэкIэ зекIоным мэхьанэу иIэр», «Авиацием хэхъоныгъэ ышIынымкIэ амалэу щыIэхэр ыкIи экономикэм ихэхъоныгъэ транспорт инфраструктурэм ифэмэ-бжьымэу тырихьэрэр», «Сэнэшъхьэ лэжьынымрэ ащ хэшIыкIыгъэ санэхэмрэ алъэныкъокIэ амалэу яIэхэр нахь игъэкIотыгъэу гъэфедэгъэнхэр», «Творческэ индустриехэм яфэмэ-бжьымэу джырэ экономикэм тырихьэрэр» зыфиIохэрэр.Ахэм анэмыкIэу Абхъазым иинвестиционнэ амалхэр нахь нафэ къэзышIыщт культурнэ программэхэмрэ нэмыкI Iофтхьабзэхэмрэ зэшIуахыщтых, Урысыем дыряIэ зэпхыныгъэхэм ателъытэгъэ проектхэм атетэу IэшIагъэхэм якъэгъэлъэгъони зэхащэщт.