БаскетболымкIэ Урысыем ичемпионат иапшъэрэ лигэ хэт «Динамо-МГТУ-р» Мыекъуапэ тIогъогогъо щыIукIагъ Ставрополь къэзыгъэлъэгъорэ «Южный слон-СКФУ-м». Командэхэр я 9-рэ чIыпIэм фэбэнагъэх.
Апэрэ ешIэгъоу Ставрополь щыряIагъэм бысымхэр нахь щылъэшыгъэх, ятIонэрэм хьакIэхэм текIоныгъэр къыщыдахыгъ. Республикэм икъэлэ шъхьаIэ щыкIогъэ апэрэ зэIукIэгъум «Динамо- МГТУ-м» 89:69-у текIоныгъэр къыщихьыгъ ыкIи ешIэгъуищым командэхэм очко пчъагъэу щырагъэкъугъэр зэфэдиз хъугъэ. Ащ къыхэкIэу я 9-рэ чIыпIэм щытыщтыр яплIэнэрэ зэIукIэгъум къыщынэфэнэу щытыгъ. Мыщ дэжьым дэгъу дэдэу зыкъыгъэлъэгъуагъ хьакIэхэм ябаскетболистэу Александр Таранцовым. Ащ ишIуагъэкIэ ешIэгъум иохътэ шъхьаIэ зэфэдизэу аухыгъ, пчъагъэр — 67:67-рэ.
Охътэ тедзэм апэрэ очкоуи 4-р динамовцэхэм къахьыгъ. Ау ащ ыуж хьакIэхэр нахь лъэшыгъэх, пчъагъэр 82:77-у зэIукIэгъур аухыгъ, «Южный слон-СКФУ-м» я 9-рэ чIыпIэр къыдихыгъ. «Динамо-МГТУ-р» я 10-рэ хъугъэ.Командэхэр я 9-рэ чIыпIэм фэбанэхэзэ яIэгъэ ешIэгъухэм язэфэхьысыжьхэр:«Южный слон-СКФУ» — «Динамо-МГТУ» — 90:62, «Южный слон-СКФУ» — «Динамо-МГТУ» — 75:83, «Динамо-МГТУ» — «Южный слон-СКФУ» — 89:69, «Динамо-МГТУ» — «Южный слон-СКФУ» — 67:67 (овертаймыр — 10:15).