Атлетикэ онтэгъумкIэ Урысыем ипервенствэ гъэтхапэм и 23-м къыщегъэжьагъэу мэлылъфэгъум и 1-м нэс къалэу Каспийскэ щыкIуагъ. Адыгэ Республикэм илIыкIохэм гъэхъэгъэшIухэр ашIыгъэх, медаль 12 къахьыгъ.
Зэнэкъокъум къэралыгъом ишъолъыр зэфэшъхьафхэм къарыкIыгъэ нэбгырэ 450-рэ хэлэжьагъ. Илъэс 13 — 15 ыкIи 13 — 17 зыныбжь кIалэхэмрэ пшъашъэхэмрэ заушэтыгъ.Тиспортсменхэм къахэщыгъэх ыкIи дышъэ медальхэр къахьыгъэх Красногвардейскэ районым щыщ Цэй Асхьадрэ Мыекъуапэ илIыкIоу Арина Бульбасрэ. Асхьад килограмм 96-м нэс къэзыщэчыхэрэм якуп хэтыгъ, екIолIэгъуитIум килограмм 255-рэ къыIэтыгъ. Тиатлет спортым имастер хъунымкIэ кандидатым ишапхъэхэр ыгъэцэкIагъэх, ыпэкIэ ащ апэрэ разряд иIагъ. Аринэ килограмми 122-рэ къыIэтыгъ ыкIи ятIонэрэ чIыпIэр зыубытыгъэ Ирина Александровам (Санкт-Петербург) икъэгъэлъэгъон зы килограммкIэ шIокIыгъ. Пэрытныгъэр зыубытыгъэхэр зыгъасэхэрэр атлетикэ онтэгъумкIэ олимпийскэ резервым испорт еджапIэу Чыржьын Мухьарбый ыцIэ зыхьырэм итренерхэу Чэмбэхъу Анзоррэ Алексей Красновымрэ. Джащ фэдэу ящэнэрэ чIыпIэхэр къыдахыгъэх Шэуджэн районым испортсменхэу Ламыкъо Амиррэ Бырдж Айдэмыррэ. Тэхъутэмыкъое районым зыщызыгъэсэрэ Андрей Кармановым джэрз медаль къыфагъэшъошагъ.
Илъэс 13 — 15 зыныбжь кIалэхэр зыхэт командэхэм язэнэкъокъу Адыгеим илIыкIохэм ящэнэрэ чIыпIэр къыщыдахыгъ, ахэм очко 443-рэ рагъэкъугъ. Краснодар краим очко 449-рэ къыхьыгъ ыкIи ятIонэрэ хъугъэ, Москва икомандэ пэрытныгъэр ыубытыгъ.Къыблэ федеральнэ шъолъырым ипервенствэ хэлэжьэнхэу тиспортсменхэм загъэхьазыры. Ар Краснодар краим щырагъэкIокIыщт, зыныбжь илъэс 17-м емыхъугъэхэм ыкIи нахьыжъхэм заушэтыщт.