Урым-рим бэнэнымкIэ Урысыем ипервенствэ къалэу Уфа щыкIуагъ. Зыныбжь илъэс 16-м емыхъугъэхэр ары зызыушэтыгъэхэр. Мыщ гъэхъагъэ щызышIыхэрэм Европэм ипервенствэ хэлэжьэнхэмкIэ фитыныгъэ къыдахын алъэкIыщтыгъ.
Олимпийскэ резервым испорт еджапIэу Тэхъутэмыкъое районым щыIэм илIыкIуи 5 зэнэкъокъум хэлэжьагъ, ахэм ащыщэу 4-мэ хагъэунэфыкIырэ чIыпIэхэр къыдахыгъэх. Килограмм 68-м нэс къэзыщэчыхэрэм якуп хэтыгъэ Нэхэе Рустам ухьазырыныгъэ дэгъу къыгъэлъэгъуагъ, дышъэ медаль къыхьыгъ. Асэкъэлэ Тамерлан ятIонэрэ хъугъэ, джащ фэдэу джэрз медальхэр къафагъэшъошагъэх Къыкъ Назаррэ Барцо Рустамрэ. Тиспортсменхэм гъэхъагъэу ашIыгъэхэм яшIуагъэкIэ урым-рим бэнэнымкIэ Европэм ипервенствэ хэлэжьэн зылъэкIыщт кандидатхэм яспискэ хэфагъэх. Зэнэкъокъур Болгарием щыкIощт.
