Урысые чемпионатэу «Локобаскет — Школьная лига» зыфиIорэм Къыблэ федеральнэ шъолъырымкIэ иедзыгъо къалэу Краснодар щыкIуагъ. 2009 — 2010-рэ илъэсхэм къэхъугъэ кIалэхэр мыщ хэлэжьагъэх. ЗэкIэмкIи командэ 12-мэ заушэтыгъ.
Илья Александровым ыгъэсэрэ тикомандэ турнирым иапэрэ такъикъхэм къащегъэжьагъэу ешIэкIэ дахэ къыгъэлъэгъуагъ, хагъэунэфыкIырэ чIыпIэхэм афэбэнагъ. Тибаскетболистхэр къин къащымыхъоу финалныкъом ихьагъэх ыкIи Волгоград хэкум илIыкIохэм адешIагъэх. Волгоград щыщхэм 56:33-у текIоныгъэр къыдахыгъ. Ау тикомандэ къызэкIэкIуагъэп, ящэнэрэ чIыпIэм ыкIи зэнэкъокъум и Суперфинал ихьаным афэбэнагъ, а пшъэрылъыр ыгъэцэкIагъ. Тибаскетболистхэр Луганскэ Народнэ Республикэм илIыкIохэм 51:41-у атекIохи, джэрз медальхэр къахьыгъэх.Зэнэкъокъум иухъумэкIо анахь дэгъоу къыхагъэщыгъ тичIыгогъоу Давид Васильевыр. Гъонэжьыкъо Дамир IэпэIэсэныгъэшхо къызхигъэфагъ, ащ очко 15 къыхьыгъ. Тикомандэ гъэхъэгъэшIухэр ышIынхэм мы нэбгыритIум яIахьышIу хэлъ.КIэух ешIэгъум Волгоград хэкум икомандэ 53:34-у Краснодар краим текIуагъ ыкIи пэрытныгъэр ыубытыгъ. Адыгеим илIыкIохэр Суперфиналым щешIэщтых, ащкIэ ахэм тафэгушIо.