А. Гусев
Театрэм и Дунэе мафэ АР-м и Театральнэ зэхахьэ мэфэкI дахэкIэ хигъэунэфыкIыгъ. Актерхэм «якъэбэскъэзэхахьэ» Адыгеим итеатрэ зэфэшъхьафхэр хэлэжьагъэх.
МэфэкI пчыхьэзэхахьэм А. Пушкиным и Унэ цIыфыбэ щызэфищагъ. Урыс къэралыгъо драматическэ, Камернэ музыкальнэ театрэу Хьанэхъу Адам ыцIэ зыхьырэм, драматическэ ныбжьыкIэ театрэу Ахэджэго Мэджыдэ ыцIэкIэ щытым, Лъэпкъ театрэу Цэй Ибрахьимэ ыцIэ зыхьырэм яартистхэр чэзыу-чэзыоу сценэм къытехьагъэх. Непэрэ щыIэкIэ — псэукIэм театрэр, артистхэр зэрэхэтхэр, культурэм чIыпIэу щаубытырэр, IэрышI акъылыр къызхэхьэгъэ зэманым зэрехъулIэхэрэр, пшъэрылъэу яIэхэр ыкIи ахэр зэрагъэцэкIэшъухэрэр, щыкIагъэхэр сэмэркъэу хэлъэу къагъэлъэгъошъугъ, мэфэкI къэгъэлъэгъон кIэкIхэр къашIыгъэх, цIыфхэр агъэчэфыгъэх.
Актерхэм ямызакъоу, театрэм иIофшIэн бэмэ зэрялъытыгъэр: макъэр, нэфынэр къэзытыхэрэм, декорациехэр, шъуашэхэр зышIыхэрэм къащегъэжьагъэу билетхэр зыщэхэрэм анэсыжьэу — мэхьэнэ куу пстэуми зэряIэр, ау ахэм апшъэ актерхэр зэрэщытхэр видеороликкIэ къагъэлъэгъуагъ. Театрэм Iоф щызышIэрэ пстэуми IофшIэнышхо зэрэзэдашIэрэр къаушыхьатыгъ.Непэ зисэнаущыгъэ сценэм къыщызыгъэлъэгъорэ, тызэрыгушхорэ актерхэм анэмыкIэу зидунай зыхъожьыгъэхэм ясурэтхэр мыкIосэрэ жъуагъохэу экраным къырыкIуагъэх.КъэтшIэжьырэ спектаклэхэм, фильмхэм къахэхыгъэ пычыгъохэм атехыгъэу ахэм ахэт геройхэм мэфэкI пчыхьэзэхахьэм къекIоу, ягущыIэхэр, яIокIэ-шIыкIэхэр афызэблахъухэзэ къэгъэлъэгъонхэр къашIыгъэх.Лъэпкъ театрэм къышIыгъэ пычыгъом Урысыем итеатральнэ IофышIэхэм я Союз зызэхащагъэр илъэси 150-рэ мыгъэ зэрэхъущтыр, Урыс драматическэ театрэм иилъэс 90-рэ, къош лъэпсэ пытэхэр яIэхэу ахэр зэрэзэдэлажьэхэрэр щыхагъэунэфыкIыгъ.КIэухым театрэ зэфэшъхьафхэм яактерхэу мэфэкI «къэбэскъэзэхахьэм» хэлэжьагъэхэр сценэм къызэдытехьажьыгъэх, пчыхьэзэхахьэм къекIолIагъэхэр бэрэ ахэм Iэгу афытеуагъэх.
Тэу Замир.