Пщынаом илъэужышIу

Адыгэ Республикэм ия IХ-рэ зэIухыгъэ фестиваль-зэнэкъокъоу Лъэцэрыкъо Кимэ ишIэжь фэгъэхьыгъэр Мыекъуапэ щыкIуагъ. Лъэпкъ пщынэмкIэ адыгэ орэдышъохэр къегъэIогъэнхэм фэгъэхьыгъэ Iофтхьабзэр Адыгэ Республикэм искусствэхэмкIэ икIэлэцIыкIу еджапIэу N 1-м щызэхащагъ. Къэбэртэе-Бэлъкъарым, Къэрэщэе-Черкесым, Осетием, Адыгеим япщынаохэр ащ хэлэжьагъэх.

АР-м культурэмкIэ иминистрэу Аулъэ Юрэ зэхахьэр къызэIуихыгъ.— Лъэпкъ проектэу «НыбжьыкIэхэмрэ кIэлэцIыкIухэмрэ» зыфиIорэм ишъолъыр проектэу «Урысыер — амалышIухэр зыIэкIэлъ къэралыгъу» зыцIэм игъэцэкIэн къыдыхэлъытагъэу ныбжьыкIэхэм сэнэхьатым ылъэ­ныкъокIэ хэхъоныгъэ ашIыным, сэнаущыгъэ зыхэлъхэр къы­хэгъэщыгъэнхэм, лъэпкъ орэдым ыкIи мэкъамэхэм ямэхьанэ зы­къегъэIэтыжьыгъэным мы фестиваль-зэнэкъокъур афэIорышIэ. Культурэм ишIуагъэкIэ лъэпкъым итарихъ ухъумагъэ хъущт, шэн-хабзэхэр лъыкIотэщтых,— къыIуагъ министрэм.Лъэпкъым ипщынэо цIэрыIоу, композиторэу, РСФСР-м изаслуженнэ артистэу, Адыгеим инароднэ артистэу Лъэцэрыкъо Кимэ къыгъэ­нэгъэ лъэужыр искусствэм хэкIуакIэрэп. Ипщынэ къыригъаIо зыхъукIэ, оркестрэм псау фэдэу изакъоу произведениехэр ыгъэ­Iущтыгъэх. Пщынэо хьалэмэтым ыцIэ дышъэ хьарыфкIэ адыгэм идунай къыхэнагъ.

КъБР-м ыкIи Темыр Осетием искусствэхэмкIэ яIофышIэшхоу Къожъ Мадинэ осэшI купым ипэщагъ. Культурэ хэ­хъо­ныгъэмкIэ Гупчэу «Ошъадэм» итворческэ купэу «Бэгъэуджым» ипащэу, Адыгэ Респуб­ликэм изаслуженнэ артистэу Шэуджэн Рустам ыкIи Адыгеим илъэпкъ культурэ зыухъумэрэ творческэ купхэу «Уджым» ипащэу, АР-м изаслуженнэ артистэу Къэлэкъутэкъо Инвер ащ игодзагъэх.КIэлэеджакIохэм яIэпэIэсэныгъэ зэнэкъокъум къыщагъэлъэгъуагъ. Аныбжь елъытыгъэу ахэр купищэу гощыгъагъэх. Апэрэ купым М. Хьагъэуджым ыцIэ зыхьырэ еджапIэу Кощхьаблэ дэтым зыщызыгъэсэрэ Гъыдзэ Ислъам текIоныгъэр къыщыдихыгъ, ащ икIэлэегъаджэр Агъыржьанэкъо Ибрахьим.

ЯтIонэрэ купым щызэнэкъокъугъэ кIэлэеджакIохэм еджэкIо IэпэIэситIу къахэщыгъ. ИскусствэхэмкIэ Тэхъутэмыкъуае икIэлэцIыкIу еджапIэ къикIыгъэ Тыгъужъ Иляс апэрэ чIыпIэр фагъэшъо­шагъ (кIэлэегъаджэр — Тыгъужъ.Н). ИскусствэхэмкIэ Налщык икIэлэцIыкIу еджапIэ къикIыгъэ, Къодзэкъо Самир апэрэ шъуашэ зиIэ дипломыр ратыгъ. Ащ икIэлэегъаджэр Къожъ Мадинэ.Ящэнэрэ купым щызэнэкъокъугъэхэмкIэ Адыгэ республикэ колледжэу Тхьабысымэ Умар ыцIэкIэ щытым щеджэрэ Ныр Заур апэрэ шъуашэ зиIэ дипломыр фагъэшъошагъ (кIэлэегъаджэр – Е.В.Шестаковар).

Лъэныкъоу «Ансамблевое исполнительство» зыфиIорэм искусствэхэмкIэ Тэхъутэмыкъуае икIэлэцIыкIу еджапIэ къикIыгъэ купэу «Горцы» зыфиIорэм Гран–при фагъэшъошагъ. Адыгэкъалэ искусствэхэмкIэ икIэлэцIыкIу еджапIэ зыщызыгъасэхэрэм апэрэ, ятIонэрэ ыкIи ящэнэрэ купхэм чIыпIэхэр къащахьы­-гъэх. Ахэм якIэлэегъадж Хьэкомэ Симэ. Лъэпкъ Iэмэ-псымэхэмкIэ купэу «Симаф» апэрэ шъуашэр зиIэ дипломым, Адыгэ республикэ колледжым лъэпкъ Iэмэ-псымэхэмкIэ икупэу «Лъэпкъ мэкъамэхэр» зыфиIорэм ятIонэрэ шъуашэ зиIэ дипломым ялауреат хъугъэх.— Пщынэм имызакъоу, бзэри, хабзэри, лъэпкъ тарихъри, мэ­къамэри зэхэгъэщагъэхэу ады­гэгу зиIэ ныбжьыкIэхэр Iоф­тхьабзэм епIух. Пщынэо ныбжьыкIэхэм ижъырэ адыгэ орэдхэр къырагъаIохэ зыхъукIэ, лъэпкъ мэкъамэхэр апкъырэхьэх, гукIэ орэдышъор къаIо, макъа­мэм зырагъэIэты. Сэнаущыгъэ зыхэлъ ныбжьыкIэхэр непэрэ зэнэкъо­къум къыщынэфагъэх, — къы­Iуагъ Шэуджэн Рустам.— Уахътэр лъэкIуатэ, музыкальнэ искусствэм зэхъокIыныгъэхэр фэхъух, пщынэр ныбжьыкIэхэм ашIогъэшIэгъон. Лъэцэрыкъо Кимэ фэгъэхьыгъэ зэнэкъокъум мэхьэнэ ин иIэу сэлъытэ. Лъэпкъ искусствэм кIэлэеджакIохэр фэщэгъэнхэмкIэ ащ фэдэ зэIукIэгъухэр ящыкIа­гъэх. Пщынаохэр упчIэжьэгъу зэфэхъух, лъэпкъ искусствэм ехьылIэгъэ къэбархэр къызэфаIуатэх, шIыкIэ-амалыкIэхэр къыз­IэкIагъахьэ, — къы­Iуагъ Къэлэкъу­тэкъо Инвер.Адыгэ Республикэм культурэмкIэ изаслуженнэ IофышIэу, Адыгэкъалэ искусствэхэмкIэ икIэлэцIыкIу еджапIэ икIэлэегъаджэу Хьэкомэ Симэ илъэс 37-рэ хъугъэу ащ щэлажьэ, пщынэм къегъэ­Iогъэным ныбжьыкIэхэр фегъасэх, ахэм ягъэхъагъэхэм арэгушхо.— Лъэцэрыкъо Кимэ сыригъэджэнэу синасып къыхьыгъ. Ащ къытфыщинэгъэ лъэпкъ мэкъамэхэм уасэ яIэп. Композиторым фэгъэхьыгъэ пчыхьэзэхахьэхэр тиеджапIэ щы­— зэхэ­тэщэх. Мэкъамэу ыусы­гъэхэр кIэлэеджа­кIохэм къырагъаIозэ, дискым теттха­гъэх. Мы илъэс еджэгъум нэбгырэ 23-рэ сэгъасэ. Мы зэнэкъокъум лъэпкъ мэкъэмэ Iэмэ-псымэхэм къязыгъэIорэ купэу «Симафэм» апэрэ чIыпIэр къызэрэфагъэ­шъошагъэм сырэгушхо, — къытиIуагъ Симэ.Зэнэкъокъум илауреатхэр зыгъэхьазырыгъэхэ кIэлэегъаджэхэм Щытхъу тхылъхэр аратыжьыгъэх. Iофтхьабзэр мэфэкI шъыпкъэ хъугъэ.ЛъэпшъыкъоФатим.