Культурэм иIофышIэхэр агъэшIуагъэх

Культурэм иIофышIэ и Мафэ фэгъэхьыгъэ мэфэкI Iофтхьа­бзэр концерт залэу «Налмэсым» щыкIуагъ. Адыгеим и ЛIы­шъхьэу КъумпIыл Мурат пшъэрылъ зэрэфишIыгъэм тетэу культурэм иIофышIэхэм ямэфэкIкIэ афэгушIонэу къэкIуагъ АР-м иминистрэхэм я Кабинет и Тхьаматэ игуадзэу Виктор Орловыр.

Вице-премьерым ипсалъэ къызэрэщыхигъэщыгъэмкIэ, культурэм иIофышIэхэм яIэпэIэсныгъэкIэ, ясэнаущыгъэкIэ Адыгэ Республикэм икультурнэ кIэн бай къау­хъумэн ыкIи хэхъоныгъэ фашIын алъэкIы, Урысыем цIыф лъэпкъыбэмэ ялIыкIохэу щыпсэухэрэм зыкIыныгъэ ахэлъэу, цIыфыгъэ шэпхъэ дахэхэм арыгъуазэхэзэ гъэхъагъэхэр ашIых. Нэбгырэ пэпчъ лъэпкъэу къызхэкIыгъэм, хэгъэгоу зыщы­псэурэм изы Iахьэу зэрэщытыр къыгуры­Iон, ащ уасэ фишIын, зэкIэ цIыфхэр зэ­зыпхырэ шIуагъэхэм ыкIи хэбзэ дахэ­хэм нахь хэхъоныгъэ ашIыным фэлэжьэн фае.«Адыгеим икультурэ лъэныкъуабэ къызэлъеубыты. Тиреспубликэ ис цIыф лъэпкъ зэфэшъхьафхэу 100-м ехъумэ лIэшIэгъу пчъагъэ къызэпызычыгъэ зэ­хэтыкIэ-хэбзэ дахэхэр къыщаухъумэх. Ахэр зы къэралыгъу зыщыпсэухэрэр, мамырныгъэрэ зэгурыIоныгъэрэ азыфагу илъэу, социальнэ-экономикэ зэхъо­кIыныгъэхэм ягъогу тетхэу зэгъусэхэу ыпэ­кIэ лъыкIотэнхэу фаех. Урысые Федерацием и Президентэу Владимир Путиным мырэущтэу къыIуагъ: «Тэ хэгъэгу гъэшIэгъон тызщыпсэурэр. Арышъ, тизыкIыныгъэ, тилъэпкъ зэгурыIоныгъэ, тикъэралыгъо джыри нахь пытэ зэрэ­хъущтхэм пае тфэлъэкIыщтыр зэкIэ тшIэн фае», — къыкIигъэтхъыгъ Виктор Ор­ловым.Вице-премьерым агу къыгъэкIыжьыгъ Президентым и УказкIэ 2026-рэ илъэсыр Урысыем щыпсэурэ цIыф лъэпкъхэм языкIыныгъэ и Илъэсэу агъэнэфагъ. Ащ къызэрэхигъэщыгъэмкIэ, урысые общест­вэм хэлъ шIуагъэхэр ыкIи тихэгъэгу щы­псэурэ цIыф лъэпкъ зэфэшъхьафхэм ятарихъ, якультурнэ кIэн проект зэфэшъхьафхэмкIэ къэдгъэшъыпкъэжьын фае.КъыткIэхъухьэхэрэм япIун стратегиче­скэ пшъэрылъэу щыт. Ащ анахь чIыпIэшхо щызыубытырэр тиныбжьыкIэхэм шIэ­ныгъэ ятыгъэн закъор арэп. Культу­рэмрэ искусствэмрэ къатырэ шIуагъэхэри икъоу ащкIэ дгъэфедэнхэ фае. ЗэхэщакIохэм яIэпэIэсэныгъэ, ахэм яIофшIакIэ бэкIэ елъытыгъэщт къыткIэхъухьэхэрэр зыфэдэщтхэр: яхэгъэгу рыгушхохэу, икультурэ уасэ фашIэу, зыщыпсэухэрэ къэралыгъом инеущрэ мафэ зыфэдэщтым яIахь хашIыхьаным фэхьазырхэу щытынхэ фае.Непэ къэралыгъом анахь мэхьанэшхо зэритыхэрэм зыкIэ ащыщ культурэм IэпыIэгъу етыгъэныр ыкIи ащ иинфраструктурэ гъэкIэжьыгъэныр. ЦIыфхэм ящыIакIэ ыкIи хэгъэгум инеущрэ мафэ зыфэдэщтымкIэ кIэныр къэухъумэгъэным епхыгъэ къодыеу ар щытэп. Адыгэ Рес­публикэм федеральнэ проект инхэр къызэлъызыубытырэ Iофышхо щызэшIуа­хы, ахэм зыкIэ ащыщых партиеу «Единэ Россием» ипроектхэр.«Культурэм иучреждениехэм ягъэкIэ­жьынкIэ, ахэр мылъкукIэ ыкIи техникэкIэ зэтегъэпсыхьэгъэнхэмкIэ IофшIэнэу дгъэ­цакIэрэр икъущтэп, IэпэIэсэныгъэ ин зыхэлъ IофышIэхэр ахэм ащымылажьэхэ хъумэ, щыIэныгъэр ыпэкIэ лъызгъэкIо­тэщт, ащ хэхъоныгъэ фэзышIыщт кIуачIэ­хэм тащыкIэщт. Творчествэм амал дэгъу егъэгъотыгъэным пае къыхэгъэщыгъэн фае джырэ инфраструктурэмрэ твор­чествэм IэпыIэгъу етыгъэнымрэ мэхьанэшхо зэряIэр. Арышъ, культурэм ылъэны­къокIэ IофышIэхэм лъэшэу тынаIэ ате­тэгъэты, тиколлективхэми творчествэм ылъэныкъокIэ Iофэу агъэцакIэрэр нахьы­шIоу зэхэщэгъэнымкIэ тишIуагъэ ятэ­гъэкIы», — къыIуагъ Виктор Орловым.

Ащ къыкIэлъыкIоу Адыгэ Республикэм икъэралыгъо шIухьафтынхэр аратыжьыгъэх культурэм иIофышIэ анахь дэгъу­хэм. Адыгеим и ЛIышъхьэ и УказкIэ щытхъу­цIэу «Адыгэ Республикэм изаслуженнэ артист» зыфиIорэр афагъэшъошагъ Адыгэ Республикэм и Концерт зэхахьэ икъэралыгъо симфоническэ оркестрэ апшъэрэ категорие зиIэ иартистэу Анатолий Кондратович, эстраднэ ансамблэу «Ошъутенэм» иартист-орэдыIоу Юрий Конжиным, мы зэхахьэм и Камернэ музыкальнэ салон ихудожественнэ пащэу Набэкъо Бэлэ.ЩытхъуцIэу «Адыгэ Республикэм куль­турэмкIэ изаслуженнэ IофышI» зыфиIорэр афагъэшъошагъ искусствэхэмкIэ кIэлэцIыкIу еджапIэу N 5-м домрэмкIэ икIэлэ­егъаджэу Марина Ананиковам, Концерт зэхахьэм игенеральнэ пащэ игуадзэу Елена Поповам.АР-м и ЛIышъхьэ иунашъокIэ культурэмрэ искусствэмрэ алъэныкъокIэ гъэхъэгъэ ин дэдэу яIэхэм апае Адыгэ Республикэм и ЛIышъхьэ и Щытхъу тхылъ афагъэшъошагъ искусствэхэмкIэ Адыгэ республикэ колледжэу У. Хь. Тхьабысымэм ыцIэкIэ щытым икIэлэегъаджэу Ольга Бреславцевам, искусствэхэмкIэ Джэджэ кIэлэцIыкIу еджапIэм ипащэу Мэрэтыкъо Эдуард.Культурэм иIофышIэ и МафэкIэ къэзэрэугъоигъэхэм джащ фэдэу къафэгу­шIуагъ АР-м и Къэралыгъо Совет — Хасэм и Тхьаматэу Владимир Нарожнэр.МэфэкI къэгъэлъэгъонкIэ Iофтхьабзэр аухыгъ.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.