Драмтеатрэр
Урыс драмтеатрэу А. С. Пушкиным ыцIэ зыхьырэм щагъэуцугъэ спектаклэу «Зэшыпхъуищыр» апэрэу къагъэлъэгъощт.
Театральнэ искусствэр зикIасэхэр спектаклэу «Зэшыпхъуищ» зыфиIорэр къызагъэлъэгъощтым ашIуабэ шIэу ежагъэх.Антон Чеховым ипьесэ техыгъэ спектаклым мэхьанэшхо зиIэ Iофыгъохэр — гукIуачIэр пытэн, цIыфыгъэ, гугъэ хъопсэныр пхэлъын зэрэфаем япхыгъэ Iофыгъохэр къыщыIэтыгъэх.Къырагъэблэгъэгъэ режиссерэу Александр Мурити театрэм иактерхэм ягъусэу спектаклым Iоф дишIагъ. Классическэ сюжет зиIэ спектаклыкIэм режиссерым екIолIэкIэ гъэшIэгъонхэр щигъэфедагъэх, IэпэIэсэныгъэ ахэлъэу актерхэм ярольхэр къашIыгъэх.— Тыздэлэжьэрэ спектаклэу «Зэшыпхъуищ» зыфиIорэр непэрэ мафэм илъэхъан дештэ. Урыс классикэм «имодэ» егъашIэми икIыщтэп. Уфаемэ, уигухэлъхэр зэкIэ къызэрыбдэхъущтхэм тикъэгъэлъэгъоныкIэ фэгъэхьыгъ. Урыс драмтеатрэу А. С. Пушкиным ыцIэ зыхьырэм иактер ныбжьыкIэхэм заушэтын амал яттыгъ. Мы IофшIагъэм ихьатыркIэ ахэм лъэбэкъушхо адзыщт, — къыIуагъ режиссерэу Александр Мурити.Роль шъхьаIэхэр къэзыш1ыгъэхэр: Полина Богатаяр, Анна Спиринар, Регина Хомяковар.— Герой шъхьаIэм ироль апэрэу къэсэшIы, ар сэркIэ гушIогъошху ыкIи сыгукIэ сэгумэкIы. Къэгъэлъэгъоным Iоф датшIэ зэхъум артистэу сыздэлажьэхэрэм сэнаущыгъэ инэу ахэлъыр нахь куоу зыхэсшIагъ. Сигерой изэхашIэ икъу фэдизэу сценэм къытесхьагъэу сэгугъэ, ащ ишIыкIэ-гъэпсыкIэ къыспэблагъ, мышъыпкъэныгъэр псынкIэу зэхешIэ, щэIэгъэшхо хэлъ, — къыIуагъ Марие ироль къэзышIырэ Полина Богатая.Лъэхъаным диштэрэ къэгъэлъэгъоныр искусствэр зыгу рихьыхэрэм ашIогъэшIэгъоныщт.Пушкиным ыцIэ зыхьырэ унэм мэлылъфэгъум и 7-м ыкIи и 8-м спектаклыр къыщагъэлъэгъощт. Театрэр шIу зылъэгъухэрэр зэхэщакIохэм рагъэблагъэх.Лъэпшъыкъо Фатим.