«Къашъор — сищыIэныгъ»

Къэралыгъо программэу «Культурэм икъоджэ IофышI» зыфиIорэм ­Хъупэ Маринэ хэлажьи, искусствэхэмкIэ Кощ­хьэблэ кIэлэцIыкIу еджа­пIэм Iоф щишIэнэу кIуагъэ. ГухэлъышIоу зыдиIыгъхэр ащ къед­гъэIотагъэх.

Маринэ илъэс 35-рэ ыныбжь, Мыекъуапэ (ялIакъокIэ Улапэ щыщых) къыщыхъугъ, щеджагъ. Къэшъоныр сэнэхьатэу къызэрэхихыщтыр джыри ицIыкIугъом къыхэщэу ригъэжьэгъагъ.— Сышхэнэу сагъэтIысы­гъэми, сыкъашъощтыгъ. Илъэси 6 нахь сымыныбжьэу искусст­вэхэмкIэ кIэлэцIыкIу еджапIэу Мыекъуапэ дэтым сычIэхьагъ, нэужым илъэситфырэ Тхьабысымэ Умарэ ыцIэкIэ щыт колледжым сыщеджагъ. Къин дэ­дагъ, бэхэм афэмыукIочIэу чIэ­кIыжьыщтыгъэх, ау сэ ар сидунаигъ. Сянэ «ар сэнэхьат пфэхъущтэп» бэрэ къысиIо­щтыгъ, адрэ сигупсэхэм къыздырагъэштагъ. Лъэшэу сыщэгу­шIукIыжьы а лъэныкъор къызэ­рэхэсхыгъэм, мыр сэнэхьат сфэхъугъэ къодыеп, къашъор — сищыIэныгъ. СикIэлэегъэ­джагъэхэм къысхалъхьагъэр джы ныбжьыкIэ­хэм зэралъыз­гъэIэсыщтым сы­пылъ, ащ дакIоу сэри седжэжьы, салъэплъэ, шIэныгъакIэхэр зэсэгъэгъотых, — хигъэунэфы­кIыгъ Хъупэ Ма­ринэ.Бзылъфыгъэ нэгушIор культурэм илъэс 16 хъугъэ зыхэтыр. Лъэпкъ къашъомкIэ ыкIи орэдымкIэ Къэралыгъо ансамблэу «Ислъамыем» илъэсыбэрэ къы­щышъуагъ. Унагъо ихьи сабыйхэр къызыпэфэхэм, кIэлэегъэджэ Iофым зыфигъэзэнэу хъугъэ. КIэлэцIыкIу еджапIэу Кощхьаблэ дэтым илъэситфэ, нэужым Каменномостскэм илъэ­сиплIэ Iоф щишIагъэу программэм ишIуагъэкIэ Кощхьаблэ джыри къыгъэзэжьыгъ.— Сшыпхъу нахьыжъ унагъо исэу илъэс 18 хъугъэ мы къуа­джэм зыщыпсэурэр. Ащ ыдэжь сэри сыкъакIозэ, Кощхьаблэ къыспэблагъэ хъугъэ. Программэу «Культурэм икъоджэ IофышI» зыфиIорэм сыхэлажьи мыщ къызэрэзгъэзэжьыгъэмкIэ сыкIэгъожьырэп. А программэм къыдыхэлъытагъэу сомэ миллион къысатыгъ. Ащ ишIуагъэкIэ бэшIагъэу сызкIэхъопсыщтыгъэ гухэлъыр къыздэхъущт — псэупIэ къэсщэфынымкIэ ублапIэ сфэхъущт, — къыхигъэщыгъ Маринэ.Илъэси 8 — 12 зыныбжь нэбгырэ 40 фэдизыр куп-купэу зэтеутыгъэхэу лъэпкъ къашъор, классикэр, гимнастикэр, ритми­кэр, балетыр арегъашIэх. Маринэ ыгукIи ыпсэкIи иIофшIэн фэщагъэу зэрэщытыр, кIэлэцIыкIухэм ар зэралъигъэIэсырэр ипсалъэ щызэхэошIэ.