Спорт лъэныкъуи 5-кIэ зэнэкъокъух

Адыгэ Республикэм Iоф щызышIэрэ гъэсэныгъэ организациехэм яапэрэ Спартакиадэ хэлэжьэнхэу муниципалитетхэм загъэхьазыры.

Джырэ уахътэм ахэм апэрэ едзыгъор рагъэкIокIы, спорт лъэп­къи 5-кIэ зэнэкъокъух.Урысые физкультурэ-спорт Iофтхьабзэу «IофшIэным ыкIи зыкъэухъумэжьыным сафэхьазыр» зыфиIорэм икIэух едзыгъо хэлэжьэнхэм ифитыныгъэ къыда­хыным Мыекъуапэ иеджэпIи 10 фэбанэ. Командэ пэпчъ кIэли 4-рэ пшъэшъи 4-рэ хэт, ахэм илъэс 12 — 13 аныбжь.

Спартакиадэм зыщызыушэты­хэрэр лъэныкъуи 6-кIэ зэнэ­къо­къущтых: къызэдэчъэныр (мет­рэ 60, 1500-рэ), щэрыоныр, нэ­мыкIхэри. ТекIоныгъэм фэбэнэрэ командэхэр стадионэу «Зэкъошныгъэм» щызэрэугъоих. Апэрэ зэнэкъокъухэм къащегъэжьагъэу пэрытныгъэр организации 4-м аIыгъыгъ — гурыт еджапIэхэу N 1-м, N 15-м N 25-м ыкIи гимназиеу N 22-м. Атлетикэ псын­кIэмкIэ зэнэкъокъухэм хагъэунэфыкIырэ чIыпIэхэр къэзыхьы­гъэхэр къагъэнэфагъэх. Гурыт еджап1эу N 1-р зэкIэми анахь лъэшыгъ, ащ балл 2636-рэ ригъэ­къугъ. Мыекъопэ гимназиеу N 22-м балл 2547-рэ къыхьыгъ ыкIи ятIонэрэ хъугъэ. Гурыт еджа­пIэу N 15-м балл 2359-рэ ригъэ­къугъ, ящэнэрэ чIыпIэр фагъэ­шъошагъ.Унэе зэнэкъокъухэм ащатекIуа­гъэх Максим Шелковоир (еджапIэу N 25-р) — балл 359-рэ ыкIи Екатерина Головиновар (еджапIэу N 1-р) — балл 387-рэ.ТекIоныгъэр зыфагъэшъошэгъэ командэм Адыгеим икъэлэ шъхьаIэ Спартакиадэм ишъолъыр едзыгъо къыщигъэлъэгъонэу фитыныгъэ къыдихыгъ, Iофтхьабзэр мэлылъфэгъум и 25-м зэхащэщт.