Спортым ифестивалэу «Къырым игъатхэ» республикэм икъэлэ шъхьаIэ щыкIуагъ.
Къырымрэ Севастопольрэ Урысыем къызэрэхэхьажьыгъэхэм фэгъэхьыгъэ мэфэкI Iофтхьабзэм зипсауныгъэ зыгъэпытэ зышIоигъо цIыфыбэ зэрипхыгъ. Ащ кIэщакIо фэхъугъ АР-м физическэ культурэмкIэ ыкIи спортымкIэ и Комитет, теннис цIыкIумкIэ ыкIи шахматхэмкIэ шъолъыр федерациехэр иIэпыIэгъугъэх.ЗэхэщакIохэм программэ гъэшIэгъон зэхагъэуцуагъ. Къэзэрэугъоигъэхэм лъэс зекIонымкIэ заушэтыгъ, километрищ зэрылъ гъогууанэр къакIугъ. Нэужым шахматхэмкIэ, теннис цIыкIумкIэ, стритболымкIэ зэнэкъокъугъэх. Джащ фэдэу, Урысые физкультурэ-спорт Iофтхьабзэу «IофшIэным ыкIи зыкъэухъумэжьыным сафэхьазыр» зыфиIорэм къыдыхэлъытэгъэ упражнениехэмкIэ заушэтын амал яIагъ.
Теннис цIыкIумкIэ текIоныгъэр афагъэшъошагъ Александр Гончаровымрэ Лана Хажхасанрэ. Спорт еджапIэхэм ачIэсхэмкIэ пэрытныгъэр зыубытыгъэхэр Адам Матюшинымрэ Хьабэхъу Даринэрэ. ШахматхэмкIэ анахь лъэшыгъэр Хъурым Темир.Спортым ифестивалэу «Къырым игъатхэ» хэлэжьагъэхэм зэкIэми шIухьафтынхэр афашIыгъэх. ТекIоныгъэр ыкIи хагъэунэфыкIырэ чIыпIэхэр къыдэзыхыгъэхэм щытхъу тхылъхэр ыкIи медальхэр афагъэшъошагъэх.