Псауныгъэр гъэпытэгъэным фытегъэпсыхьэгъэ IофшIэныр анахь дэгъоу зэхэзыщэхэрэм якъыхэхын фытегъэпсыхьэгъэ зэнэкъокъум изэфэхьысыжьхэр къэнэфагъэх.
Мыщ икIэщакIор Адыгэ Республикэм физическэ культурэмкIэ ыкIи спортымкIэ и Комитет ары.2025-рэ илъэсымкIэ пэрытныгъэр зыубытыгъэр Красногвардейскэ районыр ары. Республикэм икъэлэ шъхьаIэ ятIонэрэ чIыпIэр фагъэшъошагъ, Мыекъопэ районыр ящэнэр.Псауныгъэр гъэпытэгъэным фытегъэпсыхьагъэу къалэхэм ыкIи районхэм IофшIэнэу ащагъэцэкIагъэхэм, лъэтегъэуцоу ыкIи спорт Iофтхьабзэу ащырагъэкIокIыгъэхэм зэхэщакIохэм уасэ афашIыгъ. Анахьэу анаIэ зытырагъэтыгъэ лъэныкъохэм ащыщ зэгурыIоныгъэ зэрымылъ унагъохэм къарыкIырэ кIэлэцIыкIухэр ыкIи ныбжьыкIэхэр спортым хэщэгъэнхэр. Джащ фэдэу, зэфэхьысыжьхэр ашIыхэ зэхъум, физкультурэ-спорт Iофтхьабзэу «IофшIэным ыкIи зыкъэухъумэжьыным сафэхьазыр» зыфиIорэм ишапхъэхэм ятын муниципалитетхэм мэхьанэу ратыгъэм уасэ фашIыгъ.
Красногвардейскэ районым къыгъэхьазырыгъэ лъэтегъэуцом лъэныкъо зэфэшъхьафхэр къыдыхэлъытэгъагъэх. Ащ хэхьэх ныбжьыкIэхэр спортым хэщэгъэнхэмкIэ проектэу щагъэцэкIагъэхэр, зэнэкъокъоу щырагъэкIокIыгъэхэр, нэмыкIхэри. Мэхьанэшхо зиIэхэм ащыщыгъ спорт псэуалъэхэм ягъэкIэжьын ыкIи яшIын епхыгъэ IофшIэныр.Республикэм икъэлэ шъхьаIэрэ Мыекъопэ районымрэ хагъэунэфыкIырэ чIыпIэхэр афагъэшъошагъэх. Мыхэми зэрифэшъуашэу яIофшIэн зэхащагъ, ащ зэфэхьысыжь дэгъу къыкIэлъыкIуагъ.