ГандболымкIэ шъолъыр зэнэкъокъоу Краснодар щыкIуагъэм Мыекъуапэ ипшъэшъэ командэ хагъэунэфыкIырэ чIыпIэ къыщыдихыгъ.
Пшызэ шъолъыр щызэлъашIэщтыгъэ журналистэу Виктор Анфиногеновым ишIэжь фэгъэхьыгъэ зэнэкъокъухэм команди 8 ахэлэжьагъ.Адыгэ Республикэр къагъэлъэгъуагъ Мыекъопэ спорт еджапIэу N 1-м зыщызыгъасэхэрэм. Хэлэжьагъэхэр 2011-рэ илъэсым ыкIи ащ ыуж къэхъугъэхэр ары. Мыгъэ зэнэкъокъухэр къызэIуихыгъэх Урысыем идышъэ олимпийскэ командэ итренерэу, гандболымкIэ Краснодар краим и Федерацие ипрезидентэу Евгений Трефиловым. Анахь командэ дэгъур къафагъэшъошэным фэбэнагъэх Урысыем ишъолъыр зэфэшъхьафхэм къарыкIыгъэхэр: Ростов-на-Дону, Волгоград, Ярославль, Краснодар гандболымкIэ и Академие икомандищ ыкIи Мыекъуапэ икомандэу тренер- кIэлэегъаджэу Валерий Гончар пэщэныгъэ зыдызэрихьэрэр. ЕшIэгъуищым щыщэу тIум Мыекъуапэ икомандэ текIоныгъэр къащыдихыгъ ыкIи финалныкъом ихьагъэх. Финалым ихьанхэмпае типшъашъэхэр атекIуагъэх Урысыем 2025-м щыкIогъэ зэнэкъокъум тыжьын медаль къыщызыхьыгъэ командэу гандболымкIэ Краснодар Академием зыщызыгъасэхэрэм. ЕшIэгъур 22:22-у аухыгъ. Аужырэ очкор пенальтикIэ къыхьыгъ вратарэу Ксения Крутовам.КIэух ешIэгъум Мыекъуапэ икомандэ къытекIуагъ Ярославль иер. Пчъагъэр 24:19-у ешIэгъур ахэм ахьыгъ. КIэуххэм къызэрагъэлъэгъуагъэмкIэ, Мыекъуапэ икомандэ ятIонэрэ хъугъэ, командэу «Краснодар» ятIонэрэ.
ЗэхэщакIохэм къыхагъэщыгъэх командэхэм ягъэхъагъэхэм ямызакъоу, анахь ешIэкIо чанхэри. Ахэм Мыекъуапэ щыщ нэбгыритIу ахэфагъ: Мария Орловамрэ Елизавета Погожевамрэ. Джы командэм зыфегъэхьазыры Урысыем ипервенствэу гъэтхапэм и 31-м къыщегъэжьагъэу мэлылъфэгъум и 10-м нэс къалэу Тольятти щыкIощтым.