Делэкъо А.
Адыгабзэмрэ тхыбзэмрэ я Мафэ ехъулIэу тыгъуасэ республикэм адыгэ Iорытх щатхыгъ.
Мыгъэ ар я 8-у зэхащагъ. Адыгэ къэралыгъо университетым адыгэ филологиемрэ культурэмрэкIэ ифакультет шIоигъоныгъэ зиIэхэр къекIолIагъэх. ЗэхэщакIохэм къызэраIуагъэмкIэ, нэбгырэ 90-рэ фэдиз мыщ щызэрэугъоигъ. Ащ нэмыкIэу мыгъэ апэрэу Адыгэкъали Iорытхыр щатхыгъ. Джащ фэдэу пэIудзыгъэ шIыкIэм тетэу фаехэм заушэтын амал яIагъ.— Текстым икъыхэхын мэхьанэшхо етэты, мыгъэ Урысыем ис лъэпкъхэм языкIыныгъэ и Илъэсэу зэрэщытыр къыдэтлъытагъ. Тифакультет илъэс пчъагъэрэ Iоф щызышIагъэу, этнографэу, тарихъ шIэныгъэлэжьэу Унэрэкъо Мирэ итхылъэу «Адыгэ хабз» зыфиIорэм ипычыгъу къыхэтхыгъэр. Текстыр къин дэдэп, сыда пIомэ, адыгабзэр зэкIэми зэраIэкIэлъыр зэфэшъхьаф. Урысэу адыгабзэр зэзыгъашIэхэрэри Iофтхьабзэм къекIолIагъэх, ахэм тиреспубликэ фэгъэхьыгъэ текст атхыгъ, — къыIуагъ адыгэ филологиемрэ культурэмрэкIэ факультетым идеканэу Ахъмэт Джульеттэ.Текст шъхьаIэм къеджагъэр Адыгэ республикэ гимназием адыгабзэмрэ адыгэ литературэмрэкIэ икIэлэегъэджэ пэрытэу Мыгу Анжел.Адыгэ къэралыгъо университетым хьисапымкIэ ыкIи компьютер шIэныгъэхэмкIэ ифакультет идеканэу СтIашъу Айдэмыр иныдэлъфыбзэ фэгъэхьыгъэ Iофтхьабзэм хэлэжьэнэу бэшIагъэ зыфэягъэр, ау ыпэкIэ ар къызэрэдэмыхъущтыгъэр къытиIуагъ. 2003-рэ илъэсым Гъобэкъое гурыт еджапIэр къызиухыгъэм къыщегъэжьагъэу адыгабзэкIэ ар тхагъэп. ШIэныгъэу къыIэкIэнэжьыгъэхэр ыуплъэкIунэу къекIолIагъ. Джащ фэдэу студентхэм щысэтехыпIэ афэхъунэу ащ елъытэ.Адыгэ республикэ гимназием икIэлэегъаджэу Сихъу Назырэт адыгэ Iорытхым илъэс къэс хэлажьэ.— УкIэлэегъаджэ зыхъукIэ мыщ фэдэ мэхьанэ зиIэ Iофтхьабзэхэм уахэлэжьэн фае. Тыфай тиныдэлъфыбзэ тыди щыIунэу, хэхъоныгъэхэр ышIынхэу, рыгущыIэхэрэр нахьыбэ хъунхэу, — къыIуагъ ащ.Былмыхьэ Каринэ Адыгэ кIэлэегъэджэ колледжэу Андырхъое Хъусен ыцIэ зыхьырэм щеджэ, апэрэу Iофтхьабзэм хэлажьэ. Иныдэлъфыбзэ шIу елъэгъу, дэгъоу ешIэ.Зэфэхьысыжьхэр гъэтхапэм и 24-м къэнэфэщтых. Ахэр АКъУ-м адыгэ филологиемрэ культурэмрэкIэ ифакультет исайт къихьащтых. Мыгъэ апэрэу, гъэтхапэм и 26-м, адыгэ Iорытхым фэгъэхьыгъэ семи-нар зэхащэщт.ДЕЛЭКЪО Анет.