Зэфэхьысыжьхэр къашIыгъэх

ЯтIонэрэ шъолъыр форумэу «ШIагъэ щыI!» зыфиIорэр Рос­тов-на-Дону щы­кIуагъ. Пар­тиеу «Единэ Россием» зэшIуихыгъэ Iофтхьабзэхэм язэфэ­хьысы­жьэу лъэпкъ программэм илъэныкъохэр зэкIэ къызэлъызыубытыгъэм изы Iахьэу ар хъугъэ.

Къыблэ федеральнэ шъо­лъырым щыкIуагъэр зыфэгъэхьыгъагъэр псэупIэ-­коммунальнэ хъызмэтымрэ цIыфхэр зы­чIэсыщтхэ унэхэм яшIынрэ яхэхъоныгъэ иIофыгъохэр ары. Ащ къыхэкIэу УФ-м и Правительствэ а лъэныкъомкIэ программэм къыдилъытэхэрэр гъэцэкIагъэ зэрэхъугъэхэмкIэ партием ыпашъхьэ зэфэхьысыжь къыщи­шIыгъ. Шъхьафэу зытегущыIагъэхэр Урысыем къыхэхьа­жьыгъэ шъолъырхэр зыпкъ игъэуцожьыгъэнхэмкIэ зэшIуахыгъэхэр ары.УФ-м и Президент иполномочнэ лIыкIоу Къыблэ федеральнэ шъолъырым щыIэ Владимир Устиновыр, партием и Генсовет исекретарэу Владимир Якушевыр, УФ-м и Правительствэ и Тхьаматэ игуадзэу Марат Хуснуллиныр а Iофыгъохэм ятегущыIэн хэлэжьагъэх. Партием изэхахьэ къекIолIагъэх Къыблэ федеральнэ коим ишъолъырхэм япащэхэр, хэушъхьафыкIыгъэ дзэ операцием иветеранхэр, партийнэ проектхэм япхырыщын фэгъэзагъэхэр, псэолъэшIынымрэ псэупIэ-коммунальнэ хъызмэтымрэ ялIыкIохэр, архитекторхэр, инженерхэр. Адыгеим илIыкIохэм япэщагъэр республикэм иIэшъхьэтетэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат.ЛIыкIохэм ахэтыгъэх АР-м и Къэралыгъо Совет — Хасэм и Тхьаматэу Владимир Нарожнэр, Урысыем и ЛIы­хъужъэу, Къэралыгъо Советым — Хасэм и Тхьаматэ игуадзэу Цэй Эдуард, АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец, вице-премьерэу Хъоткъо Хъызыр, гъэсэныгъэмрэ шIэныгъэмрэкIэ министрэу Евгений Лебедевыр, АР-м иминистрэхэм я Кабинет хэтхэр, Мые­къуапэрэ Тэхъутэмыкъое районымрэ япащэхэу Геннадий Митрофановымрэ Шъэо Аскэррэ, партиеу «Единэ Россием» и Шъолъыр гъэцэкIэкIо комитет иIэшъхьэтетэу АфэшIэгъо Рэмэзан, еди­нороссхэр, псэолъэшIыным иэксперт шъхьаIэхэр.Зэхэсыгъор аублэным ыпэкIэ зэха­хьэм хэлажьэхэрэр лъэпкъ программакIэу «Единэ Россием» зэхигъэуцуагъэм илъэныкъохэм атегущыIагъэх: «Си­унэ, сищагу, сикъалэ: нэбгырэ пэпчъкIэ Iэрыфэгъоу щытынхэр», «Тызэзыпхырэ гъогухэр: ахэм ящынэгъончъэн», «Хэгъэгу зыкIыр: къытхэхьажьыгъэ шъолъырхэм ямамыр щыIакIэ зыпкъ игъэуцожьыгъэныр», «Къэлэгъэ­псынымкIэ технологиякIэхэр: джырэ уахътэм диштэу къалэхэр гъэпсыгъэнхэр», «ХэушъхьафыкIыгъэ дзэ опера-­­цием иветеранхэр щыIэныгъэм хэгъэгъозэжьыгъэнхэр ыкIи Iэрыфэгъу псэукIэ амалхэр ягъэгъотыгъэнхэр», «Неущрэ мафэр тэгъэпсы: архитектурэм, псэолъэ­шIыным ыкIи унэ-коммунальнэ хъызмэтым ныбжьыкIэхэр ахэгъэлэжьэгъэнхэр».Ащ нэужым псэолъэшIыным изытет, кэралыгъо IэпыIэгъумкIэ программэм, IофышIэхэр икъоу аIэкIэгъэ­хьэгъэнхэм, технологиякIэхэр гъэфедэгъэнхэм япхыгъэ Iофыгъохэм, цIыфхэм ящыIакIэ нахьышIу шIыгъэным пае шъолъырхэм ателъытэгъэ проектыкIэхэр гъэцэкIэ­гъэнхэм атегущыIагъэх.Партием и Генеральнэ совет исекретарэу Владимир Якушевым къызэрэхигъэщыгъэмкIэ, цIыфым ищыIакIэ нахьышIу шIыгъэным ылъапсэхэм зыкIэ ащыщ зычIэсыщт унэ иIэныр ыкIи уахътэм диштэрэ къалэм щыпсэуныр. Арышъ, цIыфхэр зычIэсыщт унэхэм яшIынрэ къалэхэм ягъэкIэжьынрэ партиеу «Единэ Россием» илъэпкъ программэ анахь чIыпIэ ин щызыубытыхэрэм ащыщых. Владимир Якушевыр илъэси 5-м къыкIоцI а лъэныкъомкIэ партием къыдэ­хъугъэхэм къатегущыIагъ ыкIи къызэрэхигъэщыгъэмкIэ, шъыпкъэныгъэр зы­лъэпсэ, лъэныкъуабэ къызэдэзыубытырэ Лъэпкъ программэр ары «Единэ Россием» хэдзынхэм япэгъокI IэубытыпIэ шъхьаIэу иIэр.Генсоветым исекретарь жъы дэдэ хъугъэ унэхэм яIофыгъо изэшIохынкIэ гъэхъагъэхэу ашIыгъэхэм къатегущыIагъ. ЧIыпIэхэм зэхэубытагъэу хэхъоныгъэ ягъэшIыгъэнымкIэ партием пшъэрылъэу зыфишIыжьыгъагъэхэр хэбзэихъухьэгъэ гъэнэфагъэхэмкIэ ыгъэцэкIэжьыгъэх. Владимир Якушевыр инфраструктурэм зынэсым къыхигъэщыгъэх партием ипроектэу «Щынэгъончъэ гъогухэр» зыфиIорэмкIэ IофшIэнэу зэшIуахыгъэм фэхъугъэ кIэуххэр. 2019-рэ илъэсым къыщегъэжьагъэу 2025-м нэс гъогу километрэ мини 150-м ехъу ашIыгъыкIи агъэцэкIэжьыгъ. Партийнэ проектэу «Къэлэ щыIакIэм» диштэу общественнэ чIыпIэ ыкIи щагу мин 50 фэдиз зэтырагъэпсыхьагъ ыкIи агъэ­кIэжьыгъ. Партием проектыр зыщыпхырищырэ уахътэм къыкIоцI а пчъагъэр мини 120-м нэсыгъ. Мыщ дэжьым псэу­пIэ-коммунальнэ хъызмэтым хэушъхьафыкIыгъэу ар къыщыуцугъ. ГущыIэм пае, коммунальнэ инфраструктурэм игъэ­кIэжьын ипрограммэ тетэу гъогу километрэ мини 7 фэдиз зэтырагъэпсыхьагъ, коммунальнэ хъызмэтым ипсэолъэ 600 фэдизмэ игъэкIотыгъэ гъэцэкIэжьынхэр арашIылIагъэх.«Ау а лъэныкъомкIэ къытпыщылъ IофшIэныр зэшIотхыгъахэхэм ашъхьа­дэкIы. Ахэм зыкIэ ащыщ псэупIэ-коммунальнэ фэIо-фашIэхэм атефэрэр. А ахъщэр къызхэкIырэр ашIэ ашIоигъоу цIыфхэм упчIэхэр къатых. Уасэхэр къы­зэрэрадзэхэрэ шIыкIэм нэфэгъэ икъу хэлъхьэгъэн ыкIи цIыфхэм къагурыIонэу гъэпсыгъэн фае. Арышъ, псэупIэ-коммунальнэ хъызмэтыр гъэкIэжьыгъэным, гъогухэм къатехъухьэрэ тхьамыкIагъохэм къакIегъэчыгъэным, фэIо-фашIэхэр нахь дэгъоу цIыфхэм афызэшIохыгъэнхэм япхыгъэ Iофыгъохэр ары лъэпкъ программакIэм нахь игъэкIотыгъэу анаIэ зыщатырагъэтын фаехэр», — зэфэхьысыжь къышIыгъ Владимир Якушевым.УФ-м и Президент иполномочнэ лIыкIоу Къыблэ федеральнэ шъолъырым щыIэ Владимир Устиновым къыхигъэщыгъ цIыфхэр зычIэсыщтхэ унэхэм яшIын Къыблэ федеральнэ шъолъырым иIа­хьы­шIу зэрэхишIыхьэрэр. Хэгъэгум цIыф­хэр зычIэсыщтхэ унэу щашIыгъэхэм япроцент 12-м ехъур ащ ишIуагъэкIэ гъэцэкIагъэ хъугъэ.«Мы аужырэ илъэсхэм цIыфхэр зычIэ­сыщтхэ унэу ашIыхэрэр хэпшIыкIэу нахьыбэ мэхъух: коим щыпсэурэ нэбгырэ пэпчъ телъытагъэу илъэсэу икIыгъэм квадрат метрэ 0,8-м ехъу агъэ­псыгъ. Хэгъэгур зэрэпсаоу пштэмэ, а лъэныкъомкIэ апэрэ чIыпIэр тIыгъ», — къыIуагъ Владимир Устиновым.УФ-м ивице-премьерэу Марат Хуснуллиныр Правительствэм, шъолъырхэм ыкIи партием зэхэубытагъэу агъэцэкIэгъэ IофшIэным икIэух шъхьаIэхэм къатегущыIагъ. Ащ къызэрэхигъэщыгъэмкIэ, 2025-рэ илъэсыр, хэгъэгум итарихъыкIэ пштэмэ, анахьыбэ зыщагъэпсыгъэхэм ащыщ — псэупIэ квадрат метрэ мил­лиони 150-рэ фэдиз ашIыгъ. Унэе псэу­пIэхэм яшIын игугъу пшIын хъумэ, фэдэ ыпэкIэ къыхэмыкIыгъэу, квадрат метрэ миллион 60-м ехъу агъэпсыгъ. Шъолъыр гъогухэм япроцент 57-р, общественнэ транспортым ипроцент 74-р шапхъэхэм адиштэу ашIыгъэх.«Проектэу «ЩыIэныгъэм пае инфраструктурэр» зыфиIорэм цIыфхэр зычIэсыщтхэ унэхэм яшIын чIыпIэ шъхьаIэ щеубыты. Губернатор пэпчъ тыдэлажьэ, тызэхэгущыIэжьы, хэхъоныгъэмкIэ гу­хэлъ­хэр пхырыщыгъэ зэрэхъухэрэм ты­наIэ тетэгъэты. Партиеу «Единэ Россием», Къэралыгъо Думэм тырягъусэу зэшIотхырэ Iофым икIэуххэр цIыфхэми алъэгъух», — къыIуагъ ащ.Марат Хуснуллиным псэолъэшIынымкIэ Министерствэмрэ апшъэрэ еджапIэхэмрэ зэгъусэхэу хэушъхьафыкIыгъэ дзэ операцием къикIыжьыхэрэр Iоф зышIэщтхэм ахэгъэхьэгъэнхэм пае ухьазырыныгъэ икъу зыщагъотыщт Гупчэ къызэIухыгъэн зэрэфаем дыригъэштагъ. Партиеу «Единэ Россием» ыцIэкIэ Iофы­гъохэу къаIэтыгъэхэм ынаIэ атыридзагъ, къулыкъу гъэнэфагъэхэм пшъэрылъ афишIыгъ мы зэхахьэм къекIолIагъэхэм игъоу алъэгъугъэхэр зэкIэ атхынхэшъ, къихьащт илъэсымкIэ программэ шъхьа­фэу зэхагъэуцощтым лъапсэ фашIынхэу.Адыгеим и ЛIышъхьэ зэхахьэм икIэ­уххэмкIэ къыхигъэщыгъ Правительст­вэмрэ «Единэ Россиемрэ» псэолъэшIыным ихэхъоныгъэкIэ унашъоу аштагъэхэм мэхьанэшхо зэряIэр. КъумпIыл Мурат къызэриIуагъэмкIэ, цIыфхэр зы­чIэсыщт унэхэм яшIын республикэм ихэхъоныгъэкIэ анахь мэхьанэшхо зи­Iэхэм зыкIэ ащыщ. Мы аужырэ илъэсхэм цIыфхэр зычIэсыщт унэхэм яшIын ипсын­кIагъэ бэкIэ нахь хэхъуагъ. 2019-рэ илъэсым къыщегъэжьагъэу квадрат метрэ миллиони 3 фэдиз агъэпсыгъ, мы илъэсым квадрат метрэ мин 600-м нахь мымакIэу ашIынэу рахъухьагъ. Проект 15-у агъэцакIэхэрэм яшIуагъэкIэ джыри квадрат метрэ миллион 1,8-рэ ахэм къахэхъощт.«Джырэ уахътэм диштэрэ микрорайонхэр тэгъэпсых, инфраструктурэм хэ­хъоныгъэ етэгъэшIы, тицIыфхэм якъэлэ щыIакIэ нахь Iэрыфэгъу зэрэхъущтым тыдэлажьэ. Унэу дгъэпсыхэрэм япчъагъэ зэрэхахъорэм дакIоу ахэм язытет на­хьышIу шIыгъэным, чIыпIэхэр, социальнэ псэуалъэхэр, гъогухэр ыкIи нэмыкIхэр уахътэм диштэу зэтегъэпсыхьэгъэн­хэм лъэшэу тынаIэ атетэгъэты. ЦIыфхэм квадрат метрэхэр яоты къодыекIэ икъущтэп, щынэгъончъэу псэунхэмкIэ, гуIэтыпIэ амалхэр ягъэгъотыгъэнхэмкIэ къыттефэрэр зэкIэ дгъэцэкIэн фае», — къыIуагъ КъумпIыл Мурат.Унэгъо ныбжьыкIэхэм, къуаджэхэм Iоф ащызышIэхэрэм, унэжъхэм къачIащыжьыхэрэм, кIэлэцIыкIу ибэхэм псэу­пIэхэр ятыгъэнхэм алъэныкъокIэ рес­публикэм щызэшIуахырэ Iофтхьабзэхэр АР-м и ЛIышъхьэ джыри зэ агу къыгъэ­кIыжьыгъэх.«ПсэолъэшIыным хэхъоныгъэ егъэшIыгъэным унакIэхэр шIыгъэнхэ закъор арэп къикIырэр. Ащ къыхеубытэх Iоф­шIэпIэ чIыпIакIэхэр, инвестициехэр, хэбзэIахьэу къихьэхэрэр нахьыбэ хъунхэр, цIыфхэм ящыIакIэ нахьышIу шIыгъэныр. Мы илъэс благъэхэмкIэ зэшIотхын фаеу Iофыгъошхохэр къытпыщы­лъых: псэолъэшIыным ипсынкIагъэ къыкIетымыгъэчыныр, псэупIэхэр зищыкIагъэхэм ядгъэгъотынхэр, джырэ технологиехэр гъэфедэгъэнхэр ыкIи нэмыкIхэр. Хэбзэ къулыкъухэм, «Единэ Россием», псэо­лъэшIыным фэгъэзагъэхэм ыкIи ежь цIыф­хэм аIэ зэкIэдзагъэу, зэгъусэхэу Iоф зэдашIэмэ, унэхэм яшIыни тапэкIи нахь дэгъоу лъыдгъэкIотэн, Адыгеири ущыпсэунымкIэ анахь чIыпIэ Iэрыфэгъоу тшIын тлъэкIыщт», — къыхигъэщыгъ КъумпIыл Мурат.Шъолъырхэм ялIыкIохэм якIэух зэфэ­хьысыжьхэр мэкъуогъум нэс кIощтых, етIанэ федеральнэ зэхахьэхэм ахэр къа­халъхьащтых. Партием Правительст­вэр игъусэу федеральнэ шъолъыр пстэуми ащ фэдэ зэхахьэхэр ащызэхищэщтых. «Единэ Россием» илъэсипшIым телъы­тэгъэ программэр мэкъуогъум къахилъхьащт, шышъхьэIум, партием изэфэс иятIонэрэ чэзыу ехъулIэу — илъэситфым телъытэгъэ лъэпкъ программэм щигъэгъозэщтых.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.