БоксымкIэ Къыблэ федеральнэ шъолъырым ипервенствэ къалэу Ростов-на-Дону щыкIуагъ. Илъэс 15 — 16 зыныбжь кIалэхэр ары зэнэкъокъугъэхэр.
Адыгеим испортсменэу Мелик Аветисян ухьазырыныгъэ дэгъу къыгъэлъэгъуагъ, дышъэ медаль къыхьыгъ. Григорий ыкIи Азадуи Бегларянхэм агъэсэрэ спортсмен ныбжьыкIэм килограмм 52-м нэс къэзыщэчыхэрэм якуп зыщиушэтыгъ. Ащ зэIукIэгъуи 4 иIагъ, зэкIэри къыхьыгъэх ыкIи шъолъырым щэгъогогъо ичемпион хъугъэ. Мелик боксымкIэ Урысыем ипервенствэ ичемпион, джащ фэдэу Европэм ипервенствэ хагъэунэфыкIырэ чIыпIэ къыщыдихыгъ.Зэнэкъокъум изичэзыу едзыгъо тиспортсмен хэлэжьэщт, ащ Къыблэ федеральнэ шъолъырыр ыкIи Адыгеир къыщигъэлъэгъощтых.Джащ фэдэу боксымкIэ Къыблэ федеральнэ шъолъырым ипервенствэ имедальхэр къахьыгъэх Марк Навоян, Тамерлан Бельскэм, Анна Ромаховам.