Спорт бэнэнымкIэ Къыблэ федеральнэ шъолъырым ичемпионатрэ ипервенствэрэ къалэу Севастополь щыкIуагъэх. Адыгэ Республикэм илIыкIохэм гъэхъэгъэшIухэр ашIыгъэх, дышъэ медалищ къахьыгъ.
Краснодар краим, Адыгеим, Къырым, Донецкэ Народнэ Республикэм, Астраханскэ, Волгоградскэ ыкIи Ростовскэ хэкухэм, Севастополь яспортсмен 500-м ехъумэ заушэтыгъ.Лъэныкъоу «панкратион» зыфиIорэмкIэ республикэм ибэнакIохэм ухьазырыныгъэ дэгъу къагъэлъэгъуагъ, Юрий Верениценым ыгъасэхэрэм пэрытныгъэр аубытыгъ. Килограмм 77,1-м нэс къэзыщэчыхэрэм якуп хэтыгъэ Дмитрий Петрушиным апэрэ чIыпIэр къыдихыгъ ыкIи ятфэнэрэу шъолъырым ичемпион хъугъэ. Джащ фэдэу Мыекъуапэ испортсменкэхэу Эвелина Хвеженкэмрэ Арина Ниязовамрэ дышъэ медальхэр къахьыгъэх. Гъэхъагъэу ашIыгъэм ишIуагъэкIэ спорт бэнэнымкIэ Урысыем ипервенствэ хэлэжьэнхэу ахэм фитыныгъэ къыдахыгъ. Зэнэкъокъур мэлылъфэгъум Йошкар-Ола щыкIощт.