КIэлэеджакIохэм я Спартакиадэ къыдыхэлъытагъэу республикэм икъэлэ шъхьаIэ игурыт еджапIэхэм ащеджэхэрэр шахматхэмкIэ зэнэкъокъугъэх. Командэ пэпчъ кIэлищырэ зы пшъашъэрэ хэтыгъ.
ЕджапIэхэм ачIэс кIэлэеджакIохэм япчъагъэ елъытыгъэу ахэр купитIоу гощыгъагъэх. Апэрэм пэрытныгъэр щиубытыгъ гимназиеу N 22-м, гурыт еджапIэу N 17-р ятIонэрэ хъугъэ, лицееу N 19-м ящэнэрэ чIыпIэр фагъэшъошагъ.
ЯтIонэрэ купым текIоныгъэр къыщыдихыгъ Мыекъуапэ игимназиеу N 5-м, къутырэу Гавердовскэм дэт гъэсэныгъэм игупчэу N 18-м илIыкIохэм тыжьын медальхэр къахьыгъэх, гурыт еджапIэу N 10-м ящэнэрэ чIыпIэр фагъэшъошагъ. Спартакиадэм къыдыхэлъытагъэу джы кIэлэеджакIохэр атлетикэ псынкIэмкIэ зэнэкъокъущтых.