АР-м хэдзынхэмкIэ и Гупчэ комиссие я 69-рэ зэхэсыгъоу иIагъэм Iофыгъуи 4-мэ ащытегущыIагъэх. Iофтхьабзэр зэрищагъ АР-м хэдзынхэмкIэ и Гупчэ комиссие ипащэу Сэмэгу Нурбый.

Зэхэсыгъом ипэублэ АР-м и Къэралыгъо Совет — Хасэм идепутатынымкIэ мандат нэкIэу щыIэр политическэ партиеу «Урысые Федерацием и Коммунистическэ партие» и Адыгэ шъолъыр къутамэ хэтэу Мыгу Асиет фэгъэшъошэгъэным къэзэрэугъоигъэхэр тегущыIагъэх ыкIи дырагъэштагъ. АР-м и Парламент идепутат зэрэхъугъэр къэзыушыхьатырэ тхылъыр ащ ратыжьыгъ.
Политическэ партиехэм яIофшIэн фэгъэхьыгъэ эфир уахътэу Мыекъопэ телевидением ыгъэнэфагъэм епхыгъэ уплъэкIунхэм язэфэхьысыжьхэм нэужым ащагъэгъозагъэх. Урысые политическэ партиеу «Единэ Россием», КПРФ-м, политическэ партиеу «Справедливая Россия» ыкIи ЛДПР-м яшъолъыр отделениехэм яIофшIэн фэгъэхьыгъэу та­къикъ пшIырыпшI къагъэлъэгъуагъ, ар шапхъэхэм зэрадиштэрэр къыхагъэ­щыгъ.
Урысые олимпиадэу «Софиум» зыфиIорэм иаужырэ уцугъо республикэм икIыгъэ нэбгыритф зэрэхэлэжьагъэр ыкIи зэкIэми хагъэунэфыкIырэ чIыпIэхэр къызэрахьыгъэр Iофтхьабзэм къыща­Iуагъ. Нэужым хэдзынхэм афэгъэхьыгъэ шъолъыр олимпиадэр мыгъэ зэрэрагъэ­кIокIыщтым тегущыIагъэх. Гъэтхапэм и 10-м ар аублагъ.
ДЕЛЭКЪО Анет.