Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу культурнэ-гъэсэныгъэ гупчэм икъызэIухын фэгъэхьыгъэ Iофтхьабзэм хэлэжьагъ АР-м иминистрэхэм я Кабинет и Тхьаматэ игуадзэу, финансхэмкIэ иминистрэу Виктор Орловыр.

Щэу зэтет унэу квадрат метрэ мини 3,7-рэ зыубытырэр псэупIэу Красногвардейскэм иурамэу Кооперативная, 7 В-м къытетэджагъ. Сомэ миллион 320-м ехъу зытефэгъэ псэуалъэр къэралыгъо программэу «Къуаджэхэм хэхъоныгъэ ягъэшIыгъэныр» зыфиIорэм къыдыхэ­лъытагъэу агъэпсыгъ. Урысые политическэ партиеу «Единэ Россием» и «Народнэ программэ» диштэу агъэпсыгъэм къуаджэм ихэхъоныгъэ илъэныкъо шъхьаIэхэр зэкIэ къызэлъеубытых: медицинэр, культурэр, гъэсэныгъэр — псэуалъэхэм яшIынкIи, язэтегъэпсы­хьанкIи, Iоф ащызышIэщтхэр игъэкъугъэн­хэмкIи. Мы гупчакIэм пае сомэ миллион 40-м ехъу зытефэгъэ Iэмэ-псымэхэу джырэ уахътэм диштэхэрэр къащэфыгъэх. ПсэолъэшIыным иподрядчикыр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Форвард» зыфиIорэр ары.

ПсэолъакIэм икъызэIухын фэгъэхьыгъэ Iофтхьабзэм хэлэжьагъэх Адыгеим и Къэралыгъо Совет — Хасэм и Тхьаматэу Владимир Нарожнэр, мэкъу-мэщымкIэ министрэу Къуанэ Анзаур, АР-м культурэмкIэ иминистрэ игуадзэу Кушъу Светланэ, Красногвардейскэ районым ипащэу Гъубжьэкъо Темур, общественностым илIыкIохэр.

Адыгеим и ЛIышъхьэ ыцIэкIэ Виктор Орловыр районым щыпсэухэрэм къафэгушIуагъ ащ фэдэ мэхьанэшхо зиIэ псэолъакIэр къызэрэзэIуахыгъэм пае. Джы культурэмрэ гъэсэныгъэмрэ яучреждениехэр зы унэм чIэт хъугъэх.
«Гуетыныгъэ фыряIэу, джырэ уахътэм къыгъэуцурэ шапхъэхэм адиштэу зэкIэ агъэцэкIагъ. Мы культурнэ-гъэсэныгъэ гупчэм къе­кIолIэщтхэм ашъхьэкIэ ашIогъэшIэгъоныщтхэр, яшIэныгъэ­хэм ахэзыгъэхъощтхэр зэрэщалъэгъущтхэм сицыхьэ телъ». – къыIуагъ АР-м иминистрэхэм я Кабинет и Тхьаматэ игуадзэ.

Iофтхьабзэм илъэхъан гупчакIэу къы­зэIуахыгъэм иамалхэм къекIолIагъэхэр ащагъэгъозагъэх. Псэуалъэм хэтых гупчэ ыкIи кIэлэцIыкIу тхылъеджапIэхэр, районым итарихъ-краеведческэ музей, «Апэрэхэм ядвижение» зыфиIорэм ичIыпIэ къутамэ, гъэсэныгъэ тедзэ зыщарагъэгъотырэ учреждениехэр, джырэ уахътэм диштэрэ унэу зэIукIэхэр зыщызэхащэщтхэр.
ТхылъеджапIэм къыщыдалъытагъэх зыщеджэщтхэ ыкIи зызщагъэпсэфыщт унэхэр. Музеим тхылъхэр зыщаIыгъыщтхэ унэшхо, джащ фэдэу хъарзынэщымрэ къэгъэлъэгъопIэ залымрэ хэтых. IофшIэкIэшIоу аIэкIэлъ хъугъэмкIэ зэдэ­лэжьэныгъэ азыфагу илъыным пае нэмыкI шъолъырхэм гъусэныгъэ адыряIэнымкIэ, пэIудзыгъэ шIыкIэм тетэу зэIукIэхэр зэхащэнхэмкIэ гупчэм чIэт Iэмэ-псымэхэр амалышIу хъущтых.

Краснодар краим и Успенскэ районрэ ащ къошныгъэ зыдыриIэ Красногвардейскэ районэу Адыгеим итымрэ культурэмрэ гъэсэныгъэмрэкIэ яучреждениехэм ялIыкIохэр пэIудзыгъэ шIыкIэм тетэу зэдэгущыIагъэх. Ахэр анахьэу къызщыуцугъэхэр зэгъунэгъу районитIумэ якультурнэ-гъэсэныгъэ IофыгъохэмкIэ проектхэу зэдызэхагъэуцощтхэм япхыгъэ Iофыгъохэр ары. КъызэрэхагъэщыгъэмкIэ, шъолъыритIум язэдэлэжьэныгъэ, язэгъусэныгъэ нахь пытэ хъунымкIэ мылъку-техникэ амалхэу щыIэ хъугъэхэми яшIуагъэ къэкIощт.

АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.