Милана Ермаковар кIэлэегъэджэ ныбжьыкI нахь мышIэми гъэхъэгъэшIухэр ышIынхэу игъо ифагъ. Шэуджэн районымкIэ Краснобашненскэ гурыт еджапIэу N 9-м урысыбзэмкIэ ыкIи литературэмкIэ кIэлэегъаджэу Iоф ешIэ, ащ нэмыкIэу илъэс пчъагъэ хъугъэу урысыбзэр ныдэлъфыбзэу кIэлэцIыкIухэм арегъашIэ.

«НыдэлъфыбзэмкIэ ыкIи литературэмкIэ кIэлэегъэджэ анахь дэгъу» зыфиIорэ шъолъыр зэнэкъокъум гъэрекIо Милана Ермаковам текIоныгъэ къыщыдихыгъ, аужырэ уцугъоу Бурятием щызэхащагъэми зэрифэшъуашэу зыкъыщигъэлъэгъуагъ. Джащ фэдэу «2024-рэ илъэсым икIэлэегъэджэ анахь дэгъу» зыфиIорэм ишъолъыр уцугъо хагъэунэфыкIырэ чIыпIэ къыщыфагъэшъошэгъагъ.
— СэнэхьатымкIэ хэхъоныгъэ пшIынымкIэ мыщ фэдэ зэнэкъокъухэм уахэ­лэжьэн фаеу сэлъытэ. Сэ сшъхьэкIэ ахэм яшIогъэшхо къысэкIыгъ, сиIофшIэн нахь гъэшIэгъонэу зэхасщэ хъугъэ. Зэ­дэгущыIэгъу шъуашэм илъэу егъэджэн сыхьатхэр зэхэсэщэх, проектнэ IофшIэныр ренэу сэгъэфедэ. Я 5-рэ классым къыщегъэжьагъэу мэкIэ-макIэу зыкI къэралыгъо ушэтыным фэсэгъэхьазырых, — еIо тигущыIэгъу.
Тхылъхэм анэмыкIэу онлайн платформэхэр, нэрылъэгъу IэпыIэгъухэр, интер­активнэ доскэр зэригъэфедэхэрэм ишIуагъэкIэ егъэджэн сыхьатхэм нахь шIуагъэ къатэу кIэлэегъаджэм елъытэ.
— Урысыбзэр ныдэлъфыбзэу язгъашIэ зыхъукIэ, урыс культурэм ибаиныгъэ анахьэу сынаIэ тесэгъэты. Тэрэзэу гу­щы­Iэнхэм, яшIошIхэр дахэу къыраIотыкIынхэм мэхьанэшхо есэты. Джащ фэдэу егъэджэн сыхьатхэм урыс гущыIэхэм ащыщхэр къызыхэкIыгъэхэр, тарихъэу апылъыр, мэхьанэу яIэр ащызэхэтэфых. Къыхэзгъэщымэ сшIоигъу, олимпиадэ зэфэшъхьафхэм, зыкI къэралыгъо ушэтыным ныдэлъфыбзэм фэгъэхьыгъэ упчIэхэр бэу къазэрэхафэхэрэр. Ар игъэ­кIотыгъэу зэрэзэдгъашIэрэм ишIуагъэкIэ езгъаджэхэрэм муниципальнэ ыкIи шъолъыр олимпиадэхэм текIоныгъэхэр къащыдахых, — еIо тигущыIэгъу.
КIэлэегъэджэ ныбжьыкIэм мыгъэ апэрэу класс ытIупщыгъ. ИкIэлэеджакIо­хэм гъэхъэгъэшIухэр зэрашIыхэрэм рэ­гушхо. Джащ фэдэу зэнэкъокъоу «Живая классика» зыфиIорэм ахэр чанэу хэлажьэх ыкIи текIоныгъэхэр ренэу къыдахых. Ащ ишIуагъэкIэ бэмы­шIэу Урысые кIэлэцIыкIу гупчэу «Артекым» ыпкIэ хэмылъэу ригъэджэрэ нэбгыритIу щыIагъ.
Игъэхъагъэхэм кIэлэегъэджэ ныбжьыкIэр къащыуцущтэп, джыри нэмыкI зэ­нэкъокъухэм ахэлэжьэн мурад иI. Ригъаджэхэрэм щысы къытырахыным пае къэгъэлъэгъон дэгъухэр иIэн фаеу елъытэ.
КIэлэеджакIохэм апае еджапIэм медиагупчэ къызэIуихын мурад иI. Ащ ишIуагъэкIэ журналистикэм, литературнэ творчествэм, ныдэлъфыбзэм алъэныкъокIэ яшIэныгъэхэм ахагъэхъон, титхакIохэм нахь нэIуасэ афэхъунхэ амал яIэ зэрэхъущтыр тигущыIэгъу къы­хигъэщыгъ.
Мы аужырэ илъэсхэм гурыт еджапIэм ипащэ иупчIэжьэгъоу кIэлэегъэджэ пэрытым Iоф ешIэ. Ащ епхыгъэу пшъэ­рылъ гъэнэфагъэхэр егъэцакIэх. БэмышIэу еджапIэм ипащэ иупчIэжьэгъу анахь дэгъухэр зыщызэнэкъокъугъэхэ Iофтхьабзэм Миланэ хэлажьи, хагъэунэфыкIырэ чIыпIэ къыфагъэшъошагъ. Джы Ростов-на-Дону щыкIощт форумым хэлэжьэнэу зегъэхьазыры.
Милана Ермаковам кIэлэцIыкIухэр шIу зэрилъэгъухэрэм ишIуагъэкIэ иIоф­шIэн хьылъэ къыщыхъурэп. ШIэныгъэ зэраригъэгъотыщт закъор арэп зыуж итыр, еджэныр шIу аригъэлъэгъуныр ащ фэщагъэ хъунхэр ары. Ар къызэрэдэ­хъурэр инэрылъэгъу.
ДЕЛЭКЪО Анет.