Я ХI-рэ республикэ ныбжьыкIэ зэнэкъокъу-къэгъэлъэгъонэу «Прикладных дел масте­ра» зыфиIорэм изэфэхьысыжьхэр Мые­къопэ кIэлэцIыкIу художественнэ еджа­пIэм щашIыгъэх. АР-м культурэмкIэ и Минис­терствэ иIэпыIэгъоу искусствэхэмкIэ кIэлэцIыкIу еджапIэу N 1-м иметодическэ гупчэ зэнэкъокъур зэхищагъ.

Зэнэкъокъум зэкIэмкIи Iоф­шIэгъи 100 фэдиз къырахьы­лIагъ. Дышъэ ыкIи тыжьын Iуда­нэр зыщыгъэфедэгъэ IэшIагъэхэр анахьэу къахэщых.
— IэпэIэсэ ныбжьыкIэхэм ягупшысэ, ясэнаущыгъэ хэхъоныгъэ ышIыным, тыкъэзыуцухьэрэ дунаир на­хьышIоу зэрагъэшIэным, ялъэныкъо гупсэ агъэлъэ­пIэным, тарихъыр дэгъоу ашIэным, искусствэм пылъхэм адыгэ шэн-хабзэхэр зэрагъашIэхэзэ, щыIэныгъэм еплъыкIэу фыряIэм зегъэу­шъомбгъугъэным, лъэпкъ творческэ гупшысэу ахэ­лъыр нахьышIоу агъэфе­дэным Iофтхьабзэр фэIо-ры­шIагъ, — къыIуагъ АР-м исурэтышIхэм я Союз ипа­щэу, осэшI купым итхьа­матэу Елена Абакумовам.

Лъэныкъоу «Такие разные формы» зыфиIорэмкIэ дип­ломхэр зыфагъэшъошагъэхэр: Мыекъуапэ икIэлэцIыкIу художественнэ еджапIэ иIофшIагъэу «Урысыер зэдытиун», искусст­вэхэмкIэ кIэлэцIыкIу еджапIэу N 6-м иIофшIагъэу «Бабулечка Ягулечка», искусствэхэмкIэ кIэлэцIыкIу еджапIэу Лъэцэрыкъо Кимэ ыцIэ зыхьырэм къыгъэхьазырыгъэ «Нэнэжъ Аминэт итхыпхъэхэр» зыфиIохэрэр. Джащ фэдэу искусствэхэмкIэ Адыгэ республикэ колледжэу Тхьабысымэ Умар ыцIэ зыхьырэм икIэлэегъаджэу И. А. Извековам иIофшIагъэу «Скифхэм ядышъэ пкъыгъохэр» зыфиIорэр дипломкIэ къыхагъэщыгъ.

Лъэныкъоу «Кисть ученика — кисть мастера» хэлэжьэгъэхэ искусствэхэмкIэ кIэлэцIыкIу еджа­пIэу Каменномостскэм дэ­тым иеджакIоу Леля Корниловамрэ искусствэхэмкIэ кIэлэцIыкIу еджапIэу Инэм дэтым­рэ я II-рэ шъуашэ зиIэ дипломыр къафагъэшъошагъ.
ИскусствэхэмкIэ Адыгэ рес­публикэ колледжэу Тхьабысымэ Умар ыцIэ зыхьырэм исту­денткэу Василиса Поддубнаям, искусствэхэмкIэ кIэлэцIыкIу еджа­пIэу Гъобэкъуае дэтым иеджакIоу Iэшъынэ Аминэ, ис­кусствэхэмкIэ Джэджэ кIэлэ­цIыкIу еджапIэм илIыкIоу Ева Марукян, Адыгэ республикэ колледжэу Тхьабысымэ Умар ыцIэ зыхьырэм икIэлэеджакIоу Алиса Моисеевам дипломхэр афагъэшъошагъэх.
ЗэхэщакIохэм щыIэныгъэм зэ­хъокIыныгъэу фэхъухэрэр къыдалъытэзэ, зэнэкъокъур гъэ­шIэгъонэу агъэпсыгъ, IэпэIа­сэхэм яIэшIагъэхэм уасэ афа­шIыгъ.
Лъэпшъыкъо Фатим.