Хэгъэгу зэошхом ТекIоныгъэр къызщыдахыгъэр илъэс 80 зыщыхъурэм ипэгъокIэу Хэгъэгу зэошхом иветеранхэу Мые­къуапэ щыпсэухэрэ Иван Дзюбэ, Дмитрий Кузьмин ыкIи Николай Бурдун тыгъуасэ афэгу­шIуагъэх, агъэшIуагъэх. АР-м идзэ комиссариат Iофтхьабзэм кIэщакIо фэхъугъ. Джащ фэдэу ветеранхэм афэгушIонхэу къэ­кIуа­гъэх я 227-рэ Мыекъопэ артиллерийскэ бригадэм илIыкIохэр.

— Хабзэ зэрэтфэхъугъэу, илъэс къэс тиветеран лъапIэхэу псаоу къытхэтхэм тафэгушIо. Илъэс 80 хъугъэу мамыр щыIакIэм тыщыпсэун амал къытэзытыгъэхэм шъхьащэ афэтэшIы. Хэгъэгу зэошхом хэлэжьэгъэ пстэуми яшIэжь тэгъэлъапIэ, лIыхъужъныгъэу зэрахьагъэм тырэгушхо. Непи ахэр зэрыкIогъэ лъагъом тетхэу Адыгеим икIыгъэ дзэ­кIолIхэр щытхъу хэлъэу хэушъхьафыкIыгъэ дзэ операцием хэлажьэх, ахэми тафэраз, — къыIуагъ республикэм идзэ комиссар шъхьаIэу Александр Авериным.
Ветеран лъапIэхэм адэжь зырызэу кIохэзэ афэгушIуагъэх. Пэублэм ахэр зыщыпсэухэрэ унэ щагухэм дзэ оркест­рэм имэкъэмэ жъынчхэр щагъэIугъэх ыкIи дзэкIолIхэр зыхэт парад цIыкIу ащыфызэхащагъ.
Апэу зэблэгъагъэхэр Иван Дзюбэ дэжь. Ар 1925-рэ илъэсым щылэ мазэм и 4-м къэхъугъ. Хэгъэгу зэошхор къызежьэм ныбжьыкIагъ нахь мышIэми, а мэфэ къинхэр ишIэжь пытэу къы­хэнагъэх. Иван Дзюбэ 1943-рэ илъэсым заом Iухьагъ, пулемет взводым ипэщагъ, а I-рэ Белорусскэ фронтым Iутэу зэуагъэ. ТекIоныгъэр къызыдахым ыуж дзэм къыхэкIыжьыгъэп, 1949-рэ илъэсым иуна­гъо игъусэу ветераныр Мыекъуапэ къэкощыжьыгъ. Жъогъо Плъыжьым, Хэгъэгу зэошхом иорденхэр, нэмыкI тын лъапIэхэр къыфагъэшъо­шагъэх.

Ыныбжь емылъытыгъэу, Иван Дзюбэ непи республикэм иобщественнэ щыIакIэ чанэу хэлажьэ, кIэлэеджакIохэм, ныбжьыкIэхэм зэIукIэгъу-зэдэгущыIэгъухэр адешIых, яхэгъэгу шIу алъэгъоу пIугъэн­хэм фегъасэх.
ЯтIонэрэ ветеранэу зэблэгъагъэхэр Дмитрий Кузьминыр дэжь. Ащ ыныбжь мыгъэ илъэси 102-рэ мэхъу. Мыр тIогъогогъоу ЛIыхъужъэу алъытэхэрэм ащыщ. ИлъэсиплI зэо гъогур зэпичыгъ, Кенигсберг ипытапIэ иштэн хэлэжьагъ. Зэо илъэсхэм я 3-рэ Белорусскэ фронтым ишхончэо полк къулыкъур щи­хьыгъ. Щытхъум иорден ия III-рэ шъуашэ, медальхэу «За взятие Будапешта», «За победу над Германией» зыфиIохэрэр къыфагъэшъошагъэх.

Нэужым Хэгъэгу зэошхом иветеранэу Николай Бурдун фэгушIуагъэх. Ар 1944-рэ илъэсым иIоныгъо мазэ къыщегъэ­жьагъэу 1945-рэ илъэсым жъоныгъуа­кIэм нэс заом хэтыгъ. А 1-рэ Украинскэ фронтым ия 969-рэ шхончэо полк ия 273-рэ шхончэо дивизие къулыкъур щихьыгъ. Медальхэу «За боевые за­слуги» ыкIи «За победу над Германией» зыфиIохэрэр къыфагъэшъошагъэх.
ТекIоныгъэшхом ия 80-рэ илъэсэу къэблагъэрэмкIэ дзэ комиссариатыр зэрафэгушIорэр къизыIотыкIырэ тхы­лъыр, нэпэеплъ шIухьафтынхэр тиветеран лъапIэхэм аратыгъэх. ЛIыхъужъныгъэу, псэемыблэжьныгъэу ахэм зэрахьагъэр тихэгъэгу итарихъ къызэрэхэнагъэр, мы мэфэкIышхом ар зэришыхьатыр ара­Iуагъ, япсауныгъэ къыкIимычэу бэрэ къытхэтынхэу афэлъэIуагъэх. Ежь вете­ранхэми гущыIэ дэхабэ къапагъохыгъ. Республикэм ихэбзэ къулыкъухэми, дзэ комиссариатми, нэмыкI общественнэ движениехэми анаIэ къазэратетыр, зэ­ращымыгъупшэхэрэр, зэралъытэхэрэр зэрягуапэр къыхагъэщыгъ.
Iэшъынэ Сусан.
Сурэтхэр: Iэшъынэ Аслъан.