Хэгъэгу зэошхом илъэхъан ­Адыгеир тидзэхэм шъхьафит зашIыжьыгъэр илъэс 80 зэрэ­хъугъэм фэгъэхьыгъэ автопробег тыгъуасэ щыIагъ.

Урысыем и ДОСААФ икъутамэу ­Адыгэ Республикэм щыIэмрэ республикэм иветеранхэм я Советрэ Iофтхьабзэм кIэщакIо фэхъугъэх.
Мыекъуапэ игупчэ саугъэт пчэдыжьым зэIукIэр щырагъэжьагъ. Ащ хэлэжьагъэх ветеранхэр, хэбзэ къулыкъушIэхэр, общественнэ организациехэм ялIыкIохэр, ныбжьыкIэхэр.
Хэгъэгу зэошхом лIыхъужъныгъэ щызезыхьэгъэ тидзэкIолIхэм яшIэжь зэрагъэлъапIэрэм фэгъэхьыгъэ гущыIэхэр зэIукIэм къыщаIуагъ. Адыгеим щыщ нэбгырэ мин 80 Хэгъэгу зэошхом хэлэжьагъ, мин 33-рэ хэкIодагъ. «Советскэ Союзым и ЛIыхъужъ» ыкIи «Щытхъум иорден икавалер» зыфиIохэрэр нэбгырэ 59-мэ къафагъэшъошагъ. Заом ыкIыб щыIэхэу чэщи мафи лажьэхэзэ, нэбгырэ мин пчъагъэмэ лIыгъэ зэрахьагъ, ТекIоныгъэм и Мафэ къагъэблэгъагъ.

Iофтхьабзэм хэлэжьагъэхэм ЕгъэшIэрэ машIом къэгъэгъэ блэрхэр ыкIи Iэрамхэр кIэралъхьагъэх. Хэгъэгур къаухъумэзэ зыпсэ зытыгъэхэм яшIэжь агъэлъапIэзэ зы такъикъэ афэшъыгъуа­гъэх.
— Тиреспубликэ итарихъкIэ анахь мэхьанэшхо зиIэ мафэхэм непэ ащыщ. Илъэс 80-кIэ узэкIэIэбэжьмэ, мы мафэр ары пыир Адыгеим рафыжьи, оккупацием къыхиубытэгъэ аужырэ къуаджэхэу Афыпсыпрэ Псэйтыкурэ шъхьафит зашIыжьыгъэхэр. Хэгъэгу зэошхом илъэ­хъан тидзэкIолIхэм лIыхъужъныгъэу зэрахьагъэмрэ пытагъэу къахэфагъэмрэ къыткIэхъухьэрэ лIэужхэм ящысэтехыпI. Тишъхьафитыныгъэ фэбэнагъэхэм ялIы­хъужъныгъэ зыщыдгъэгъупшэ хъущтэп ыкIи шъхьащэ афэтшIын, заом епхыгъэ къэбар шъыпкъэр къызэтедгъэнэн фае. Тарихъым инэкIубгъохэр тщыгъупшэ­хэрэп. ШIэжь тиIэу тэпсэу. НыбжьыкIэхэм тарихъыр нахьышIоу ашIэным фэшI мыщ фэдэ зэIукIэгъухэр илъэс къэс зэхэтэщэх, — къыIуагъ Къоджэ Аслъан.

— ШIэжь тиIэнымкIэ, Адыгеир шъхьафит зышIыжьыгъэхэм лIыгъэу зэра­хьагъэр дгъэлъэпIэнымкIэ, тиныбжьыкIэхэр патриотхэу пIугъэнхэмкIэ мы Iофтхьабзэм социальнэ мэхьанэшхо иI, — хигъэунэфыкIыгъ Барцо Тимур. — ТидзэкIолIхэм ясаугъэтхэр зыдэт чIыпIэхэу Пэнэжьыкъуае, Адыгэкъалэ, Щын­джые, Тэхъутэмыкъуае ыкIи Афы­псыпэ такъыщыуцущт, цIыфхэм таIу­кIэщт. ШIэжь зэхахьэм къыхэлэжьэщтых дзэ-патриотическэ клубым хэтхэр, кIэлэ­еджакIохэр.
Машинэхэр зэхэтхэу Урысыем, Адыге­им ябыракъхэр агъэбыбатэхэзэ Мые­къуапэ икIыхи, дзэ щытхъум епхыгъэ чIыпIэхэу Адыгеим иIэхэм къащыуцухэзэ, Тэхъутэмыкъое районым икъуа-
джэу Афыпсыпэ кIуагъэх.
ШIэжь яIэу ныбжьыкIэхэр зэрапIухэ­рэм тегъэгушхо, мамыр псэукIэр на-
хьы­шIу зэрэхъущтым цIыфхэм яцыхьэ зэ­рэтелъыр зэхахьэхэм къащаIуагъ.
КIАРЭ Фатим.