Урым-рим бэнэнымкIэ Урысыем ипервенствэу республикэм икъэлэ шъхьаIэ щыкIуагъэм зыныбжь илъэс 16-м емыхъугъэ кIалэхэр хэлэжьагъэх.

Къэралыгъом ишъолъыр 66-мэ къарыкIыгъэ спортсмен 700-м ехъу зэнэкъокъугъ. Адыгеим ихэшыпыкIыгъэ командэ нэбгырэ 15 хэтыгъ, ахэм олимпийскэ резервым испорт еджапIэхэу Яблоновскэмрэ Инэмрэ адэтхэм защагъасэ.
Зэнэкъокъум икъызэIухын фэгъэ­хьыгъэ Iоф­тхьабзэм къе­кIолIагъ Адыгэ Республикэм и ЛIышъхьэу КъумпIыл Мурат. Ащ игъусагъэх АР-м иминистрэхэм я Кабинет и Тхьаматэ игуа­дзэу, финансхэмкIэ министрэу Виктор Орловыр, УФ-м и Къэралыгъо Думэ идепутатэу, самбэмкIэ гъо­гогъу 11-рэ дунаим ичемпионэу Хьасанэкъо Мурат, олимпийскэ джэгунхэм тыжьын медаль къащызыхьыгъэу, мы спорт лъэпкъым­кIэ Урысыем иныбжьыкIэ командэ итренер шъхьаIэу Ислам Дугучиевыр, Адыгеим физическэ культурэмкIэ ыкIи спортымкIэ и Комитет итхьаматэу Дэгужъые Мурат, джащ фэдэу тренер цIэрыIохэу, спортымкIэ мастерхэу Виктор Козляковыр, Бэгугъэ Вячеслав, Лъэцэр Хьазрэт, Хъот Юныс.
— Урым-рим бэнэнымкIэ Урысыем ипервенствэу Адыгеим икъэлэ шъхьаIэ апэрэу щызэхащагъэр мы спорт лъэпкъым республикэм зыщиушъомбгъуным, цIыфхэм япсауныгъэ агъэ­пытэным зэрэфэIоры­шIэщтым сицыхьэ телъ, — къыхи­гъэщыгъ КъумпIыл Мурат.
Республикэм ипащэ ТекIоныгъэм ия 80-рэ илъэсэу къэблагъэ­рэмкIэ къэзэрэугъоигъэхэм къа­фэгушIуагъ.
Зэнэкъокъухэм текIоныгъэр ыкIи хагъэунэфыкIырэ чIыпIэхэр къащыдэзыхыгъэхэм зэхэщакIохэр афэгушIуагъэх, къалэжьыгъэ медальхэр афагъэ­шъошагъэх.