Паркым изэтегъэпсыхьанкIэ пшъэрылъхэр

Адыгеим и ЛIышъхьэу КъумпIыл Мурат П. В. Букреевым ыцIэ зыхьырэ паркэу Джэджэ районымкIэ поселкэу Гончаркэ илъэгъупхъэ чIыпIэхэм ащыщым щыIагъ.
ЧIыпIэ совхозым итхьаматэу Петр Букреевым 1976-рэ илъэсым дендрологическэ паркыр зэтыригъэпсыхьагъ. Апэрэ парк лъэсгъогухэр мыщ щагъэпсыгъагъэх, псыутIэр къыухьэу Апшеронскэ районым ичъыгкъэгъэкIыпIэхэм къаращыгъэ псэе ыкIи нэмыкI чъыг лъэпкъхэр щагъэтIысхьэгъагъэх. ЫужыкIэ Шъачэ идендрарий къыщагъэкIыгъэ чъыг дахэхэри мыщ щагъэтIысхьагъэх. Чъыг, кондэ лъэпкъ 350-рэ фэдиз непэ зыдэт паркым итеплъэ я 80-рэ илъэсхэм якIэух Адыгеим икъушъхьэлъэ гъогухэр агъэпсыхэ зэхъум къэнэжьыгъэгъэ аммонитхэм къагъэдахэ.
2020-рэ илъэсым дендропаркым иIофышIэхэмрэ Гончаркэ дэсхэмрэ чIыопс чIыпIэ дахэм икъэухъумэнкIэ, административнэ унэу машIо къызыкIэнэгъагъэр зыпкъ игъэуцожьыгъэнымкIэ республикэм ипащэхэм зафагъэзагъ.

2021-рэ илъэсым итыгъэгъазэ паркыр республикэ мылъкум хахьэу алъытагъ. Ащ ишIуагъэкIэ чIыопс кIэн дахэр нахь шIуагъэ къытэу къаухъумэнэу, республикэм щыпсэухэрэмрэ ихьакIэхэмрэ зекIоным епхыгъэ фэIо-фашIэхэр нахьышIоу афагъэцэкIэнхэу амал щыIэ хъугъэ. Мы аужырэ лъэхъаным фестиваль зэфэшъхьафхэр, рафтингымкIэ зэнэкъокъухэр, «Движение Первых» зыфиIорэр кIэщакIо зыфэхъурэ спорт зэнэкъокъухэр, квестхэр мыщ щэкIох. Мы аужырэ илъэситIум ащ фэдэ Iофтхьабзэхэм ахэлажьэхэрэм хэпшIыкIэу ахэхъуагъ.

Республикэм и ЛIышъхьэ паркым иадминистративнэ унэ зэрагъэцэкIэжьыгъэм зыщигъэгъозагъ, ащ ипащэхэм, подряднэ организациехэм ялIыкIохэм адэгущыIагъ.
Республикэ бюджетым къыхагъэкIыгъэ сомэ миллион 36,5-м ехъу ащ фэдэ IофшIэнхэм зэрапэIухьагъэр къэIогъэн фае. ГъэцэкIэжьынхэм ялъэхъан пчъэ, шъхьаныгъупчъэ блыпкъхэр, инженер коммуникациехэр зэблахъугъэх, унэ гупэр агъэкIэжьыгъ, кабинетхэм гъэцэкIэжьын IофшIэнхэр арашIылIагъэх, джырэ шапхъэхэм адиштэрэ чэукIэ чIыпIэр къашIыхьагъ.

«ЗекIоным епхыгъэ фэIо-фашIэхэр нахьышIоу гъэцэкIэгъэнхэмкIэ непэ республикэм бэ щызэшIуахырэр. Гончаркэ дэт паркым зекIонымкIэ амалэу иIэхэм зягъэушъомбгъугъэныр ащ фэдэ проектхэм зэу ащыщ. ТичIыопс къэзыгъэдэхэрэ ащ фэдэ чIыпIэр акъылыгъэ хэлъэу, тыфэсакъзэ дгъэфедэн фае», — къыIуагъ КъумпIыл Мурат.
Республикэм и ЛIышъхьэ паркым изэтегъэпсыхьан, чъыг лъэпкъыкIэхэр ащ щыгъэтIысхьэгъэнхэм, цIыфхэм жъугъэу зызщагъэпсэфын алъэкIыщт чIыпIэхэр гъэпсыгъэнхэм, глэмпингхэм ыкIи нэмыкIхэм ягъэуцун япхыгъэу пшъэрылъ заулэ афишIыгъ. Чъыгхэм къадекIокIыгъэнымкIэ, ныбжьыкIэхэм атегъэпсыхьэгъэ Iофтхьабзэхэм язэхэщэнкIэ паркым ипащэхэм АР-м мэзхэмкIэ и ГъэIорышIапIэрэ АР-м ныбжьыкIэхэм яIофхэмкIэ и Комитетрэ гъусэныгъэ адыряIэным мэхьанэшхо зэриIэр къыхигъэщыгъ.
АР-м и ЛIышъхьэ ипресс- къулыкъу къытырэ къэбархэмкIэ
ЛIышэ Саныет.