Top.Mail.Ru

КъумпIыл Мурат: «Пшъэры­лъэу зэдытиIэр цIыфхэм ящыIэкIэ-псэукIэ зыкъегъэIэты­гъэныр ары»

Image description
А. Гусев

Адыгеим и ЛIышъхьэу КъумпIыл Мурат нахьыжъхэм я Совет хэтхэм республикэм и Правительствэ зычIэт унэм зэIукIэгъу щадыриIагъ.

Iофтхьабзэм хэлэжьагъэх Адыгеим ыцIэкIэ Урысыем и Къэралыгъо Думэ идепутатэу Владислав Резник, АР-м и Къэралыгъо Совет – Хасэм и Тхьаматэу Владимир Нарожнэр, нахьыжъхэм я Советэу ЛIышъхьэм дэжь щызэхэща­гъэм итхьаматэу ГъукIэлI Нурбый, Адыгеим иветеранхэм я Советрэ ипроф­союзхэм яфедерациерэ япащэхэр, на­хьыжъхэм яшъолъыр, муниципальнэ советхэм ахэт­хэр, къыблэ дзэ шъолъырым истратегическэ командование иинспекторхэр ыкIи нэмыкIхэр.
ЗэIукIэгъум иублэгъу Хэгъэгу зэошхом иветеранэу, зыныбжь илъэси 100 зэрэ­хъу­гъэр хэзыгъэунэфыкIыгъэ Иван Дзюбэ фэгушIуагъэх.

А. Гусев


Iофтхьабзэр къызэIуихызэ, Адыгеим и ЛIышъхьэ зэрэхигъэунэфыкIыгъэмкIэ, 2024-рэ илъэсым икIэуххэм афэгъэхьыгъэу ар апэрэу зыдэгущыIагъэр респуб­ликэм инахьыжъхэм я Совет хэтхэр ары. Республикэм и ЛIышъхьэ къы­зэриIуагъэм­кIэ, щыIэныгъэм хэшIыкIы­шхоу фыряIэр къызфагъэфедэзэ, хэбзэ къулыкъухэм яIофшIэн осэ икъу къезытыхэрэр мыхэр ары. КъумпIыл Мурат къызэрэхигъэщыгъэмкIэ, нахьыжъхэм лъытэныгъэ афэшIыгъэныр республикэми, хэгъэгуми мэхьанэшхо зыщаратыхэрэм ащыщ.
«Пшъэрылъэу зэдытиIэр цIыф­хэм ящыIэкIэ-псэукIэ зыкъегъэIэтыгъэныр ары. Республикэм ис нэбгырэ пэпчъ, лъэпкъэу къызыхэкIыгъэм ыкIи динэу ылэжьырэм ямылъытыгъэу, ифедэхэр къы­зэрагъэгъунэрэр, цIыф­хэр зыгъэгумэкIырэ Iофыгъохэр хэбзэ Iэшъхьэтетхэм зэрэзэшIуахырэр ылъэ­гъунхэ фае»,къыIуагъ КъумпIыл Мурат.

А. Гусев


АР-м и ЛIышъхьэ зэрэхигъэунэфыкIыгъэмкIэ, хэгъэгур чIыпIэ къин зыщит лъэхъаным Урысыем ипащэу Владимир Путиным, гъэрекIо игъэтхапэ Президентэу хадзыжьыгъэм, гъогоу пхырищырэм шIуагъэ къызэритырэр къэлъэ­гъуагъ. Адыгеим исхэм азыныкъо нахьыбэм амакъэ хэгъэгум ипащэ фатыгъэу къэралыгъом инэмыкI шъолъырхэм ягъусэу ыпэкIэ лъэкIуатэ.
Лъэпкъ проектхэм, къэралыгъо программэхэм, социальнэ-экономикэ хэхъо­ныгъэмкIэ унэе программэм, «Единэ Россием» ипроектхэм яшIуагъэкIэ Адыгеим пшъэрылъышхохэр зэрэзэшIуихыхэрэр зэIукIэгъум щыхагъэунэфы­кIыгъ. Республикэм и ЛIышъхьэ псауныгъэм икъэухъумэн, социальнэ ухъумэным, гъэсэныгъэм, культурэм, спортым, про­мышленностым, экономикэм, мэкъу-мэщым, гъогушIыным зягъэушъомбгъугъэнымкIэ программэхэм, зэдиштэу къуа­джэхэр зэтегъэпсыхьэгъэнхэм япхыгъэ проектхэм къащыуцугъ.
Республикэм иэкономическэ, исоциальнэ щыIэныгъэ епхыгъэ нэмыкI проектхэми шъхьафэу КъумпIыл Мурат къатегущыIагъ. Республикэм и ЛIышъхьэ къызэриIуагъэмкIэ, анахьэу анаIэ зытырагъэтыщтхэм ащыщ хэушъхьафыкIыгъэ дзэ операцием хэлажьэхэрэмрэ ахэм яунагъохэм арысхэмрэ IэпыIэгъу ягъэгъотыгъэныр.

А. Гусев


«Мыгъэ ТекIоныгъэшхом ия 80-рэ илъэс зэрэхагъэунэфыкIыщтым къыхэкIэу 2025-р Хэгъэгум иухъумакIо и Илъэсэу Президентым зэрилъытагъэм епхы­гъэу а лъэныкъом мэхьанэшхо ратыщт. ТидзэкIолIхэм ятэжъхэмрэ ятэжъ пIашъэхэмрэ хэбзэ шIагъоу ахэлъыгъэхэр лъагъэ­кIотэщтых. ТидзэкIолIхэми, ТекIоныгъэ къызэрэдэтхыщтыми тицыхьэ телъ»,къыIуагъ КъумпIыл Мурат.
Нахьыжъхэм я Совет хэтхэм респуб­ликэм ихэбзэ къулыкъухэм Iофэу ашIэрэм осэшIу зэIукIэгъум къыщыратыгъ. Урысыем IофшIэнымкIэ и ЛIыхъу­жъэу, Адыгеим итхакIохэм я Союз итхьаматэу МэщбэшIэ Исхьакъ, Къыблэ дзэ шъолъырым истратегическэ командование иинспекторхэу Юрий Колягиныр, Александр Дорофеевыр, АР-м иветеранхэм я Совет итхьаматэу Къоджэ Аслъан, нахьыжъхэм я Совет хэтхэу Дзыбэ Кимэ, Анатолий Пренкэр, Урысы­ем ис ермэлхэм я Союз Адыгэ Респуб­ликэмкIэ икъутамэ итхьаматэу Оник Нигоевыр ыкIи нэмыкIхэр ащ къыщыгущыIагъэх.
Адыгеим и ЛIышъхьэу КъумпIыл Муратрэ УФ-м и Къэралыгъо Думэ идепутатэу Владислав Резникрэ нахьыжъхэм гущыIэгъу зафэхъухэм, хабзэм ифедеральнэ къулыкъухэр къадеIэхэзэ, республикэм щагъэцэкIэрэ нэмыкI проектхэми ягугъу къышIыгъ.
ЗэIукIэгъум икIэух КъумпIыл Мурат къыIуагъ блэкIыгъэ илъэсхэм афэдэу нахьыжъхэм я Совет хэтхэм обществэр зэкъогъэуцогъэнымкIэ, ныбжьыкIэхэм патриотическэ пIуныгъэ ягъэгъотыгъэнымкIэ яIофшIэн нахь агъэлъэшыным зэрэщыгугъырэр.
АР-м и ЛIышъхьэ
ипресс-къулыкъу