Зэдэлэжьэныгъэм зырагъэушъомбгъущт

АР-м и ЛIышъхьэу КъумпIыл Мурат республикэм и Правительствэ зычIэт унэм зэIукIэгъу щадыриIагъ предпринимательствэ цIыкIумрэ гурытымрэ я Урысые общественнэ организациеу «Опора России» зыфиIорэм иапэрэ вице-президентэу Аркадий Гершманрэ организациеу «Опора России» зыфиIорэм и Адыгэ республикэ къутамэ итхьаматэу Наталья Егоровамрэ.
ЗэдэгущыIэгъум хэлэжьагъэх АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, мысатыу организациеу «Адыгэ Республикэм предпринимательствэм IэпыIэгъу етыгъэнымкIэ и Гупчэ» («Сибизнес») зыфиIорэм ипащэу КIыкI Артур.
АР-м и ЛIышъхьэ къызэрэхигъэщыгъэмкIэ, УФ-м и Президентэу Владимир Путиным къыгъэуцугъэ пшъэрылъхэр пхырыщыгъэнхэмкIэ организациеу «Опора России» зыфиIорэм дэлэжьэгъэным мэхьанэшхо иI. Лъэныкъохэу зэрэзэдэлэжьэщтхэр зэпхыгъэхэр предпринимательствэм хэхъоныгъэ егъэшIыгъэныр, проектэу «ШIуагъэ къэзытырэ ыкIи зэнэкъокъур зылъэпсэ экономикэр» зыфиIорэм къыдилъытэрэ Iофтхьабзэхэр пхырыщыгъэнхэр, пэщэныгъэ зехьэгъэнымкIэ, IофышIэхэр гъэхьазырыгъэнхэмкIэ джырэ уахътэм диштэрэ амалхэр гъэфедэгъэнхэр ары.
ЗэдэгущыIэгъум илъэхъан къызэрэхагъэщыгъэмкIэ, УФ-м и Правительствэ иIэпыIэгъу хэлъэу лъэпкъ проектэу «Предпринимательствэ цIыкIумрэ гурытымрэ» зыфиIорэм къыдыхэлъытагъэу предпринимательствэ цIыкIумрэ гурытымрэ къэралыгъо IэпыIэгъу зэраратыщтым иIофыгъохэр агъэнэфагъэх. Ащ ишIуагъэкIэ бизнес цIыкIумрэ гурытымрэ алъэныкъокIэ Iоф зышIэхэрэр нахьыбэ хъугъэх. НепэкIэ унэе предпринимательхэми е юридическэ лицэхэми пстэумкIи мин 18-м ехъу атхыгъ. Iоф зышIэу республикэм исым ипроцент 33-рэ фэдиз предпринимательствэ цIыкIумрэ гурытымрэ алъэныкъокIэ Iоф ашIэ. НэмыкIэу къэпIон хъумэ, нэбгырэ мин 72-рэ мэхъух. 2023-рэ илъэсым елъытыгъэмэ, ахэм япчъагъэ процент 11,9-кIэ нахьыбэ хъугъэ. Инвестициехэм хэпшIыкIэу къызэрахахъорэми къеушыхьаты а лъэныкъомкIэ Iофыгъоу зэшIуахыхэрэр нахьыбэ зэрэхъухэрэр. Зэхэубытагъэу къэпIон хъумэ, 2024-рэ илъэсым икIэуххэм нафэ къызэрашIыгъэмкIэ, республикэм къыщахьыжьырэр проценти 105-м нэсыгъ. ЦIыфхэм щыIакIэу яIэм елъытыгъэу 2024-рэ илъэсым икIэуххэмкIэ Адыгеир апэрэу анахь шъолъыр дэгъу 20-мэ ахэфагъ.
«Лъэпкъ проектыкIэхэм атегъэпсыхьагъэу Iоф ашIэнымкIэ ящыкIэгъэ амалхэр зэкIэ афызэхэтэщэх. МыщкIэ яшIогъэшхо къэкIощт зыгъэпсэфыпIэу «Лэгъонакъэрэ» промышленнэ паркэу «Инэмрэ». ШIэхэу ахэм Iоф ашIэу рагъэжьэщт. Инвестициехэр нахьыбэу республикэм къихьанхэм тапэкIи тынаIэ тедгъэтыщт, предпринимательствэ цIыкIумрэ гурытымрэ IэпыIэгъу ятыгъэным пае лъэпкъ проектыкIэхэм къатырэ амал пстэури къызфэдгъэфедэщт. МыщкIэ анахь мэхьанэ зиIэхэм ащыщых гупчэу «Сибизнесрэ» общественнэ организациеу «Опора России» зыфиIорэмрэ. Къэралыгъо IэпыIэгъур предпринимательствэ цIыкIумрэ гурытымрэ къахиубытэхэрэм алъыгъэIэсыгъэным пае ахэми яшIуагъэ къэкIощт», — къыIуагъ КъумпIыл Мурат.
Шэуджэн Заур къызэрэхигъэщыгъэмкIэ, илъэсэу икIыгъэм организациеу «Опора России» зыфиIорэр АР-м экономикэ хэхъоныгъэмкIэ ыкIи сатыумкIэ и Министерствэрэ обществэу «АР-м предпринимательствэм IэпыIэгъу етыгъэнымкIэ и Гупч» зыфиIорэмрэ ягъусэу республикэм ибизнес илIыкIохэм апае Iофтхьэбзэшхохэр зэшIуахыгъ. Предпринимательхэм яфитыныгъэхэмрэ яфедэхэмрэ якъэухъумэнкIэ бюро зэхащэгъагъ. Фитыныгъэхэм алъэныкъокIэ IэпыIэгъу ятыгъэным, предпринимательхэм зэIукIэ ыкIи нэмыкI Iофтхьэбзэшхоу афызэхащэщтхэм афэгъэхьыгъэ къэбарыр цIыфхэм къызIэкIагъэхьаным пае «линие плъырым» Iоф ешIэ. Ащ нэмыкIэу организациеу «Опора России» зыфиIорэр къэуцурэ Iофыгъохэм язэшIохынкIэ, грантхэр атегощэгъэнхэмкIэ зэхэгущыIэжьыным фытегъэпсыхьэгъэ къулыкъу зэфэшъхьафхэм ахэщагъэ хъугъэ. Наталья Егоровам къызэриIуагъэмкIэ, мы аужырэ илъэситIум «Опора России» зыфиIорэм экономикэ, социальнэ ыкIи нэмыкI лъэныкъохэм афытегъэпсыхьэгъэ Iофтхьэбзи 173-м ехъу республикэм щызэхищагъ. Мы организациер шIушIэ Iофтхьабзэхэми ахэлажьэ, хэушъхьафыкIыгъэ дзэ операцием хэтхэм ыкIи щыIэныгъэм чIыпIэ зэжъу ригъэуцогъэ цIыфхэм ишIуагъэ арегъэкIы.
Организацием иапэрэ вице-президент къыхигъэщыгъ Адыгэ республикэ къутамэм иIофшIэн нахь зыригъэушъомбгъу зэрэхъугъэр. НепэкIэ ащ предприниматель 400-м ехъумэ япхыгъэ Iофтхьабзэхэм гъунэ алъефы, ежь организацием хэт нэбгырэ пчъагъэр 100-м нэсыгъ. ЧIыпIэ къутамэхэри районитIум – Тэхъутэмыкъое ыкIи Мыекъопэ районхэм ащыриIэ хъугъэ. 2024-рэ илъэсым Iофэу ашIагъэм икIэуххэм нафэ къызэрашIыгъэмкIэ, шъолъыр 89-мэ азыфагу я 17-рэ чIыпIэр Адыгэ республикэ къутамэм щиубытыгъ. Аркадий Гершман къызэриIуагъэмкIэ, ащ фэдэ гъэхъагъэхэм къызэрафэкIуагъэхэр шIуагъэу зыфэплъэгъун плъэкIыщтыр аIэ зэкIэдзагъэу зэрэзэдэлэжьагъэхэр ары. Организациеу «Опора России» зыфиIорэм ипащэхэм ацIэкIэ рэзэныгъэ тхылъыр ащ къыритыжьыгъ Адыгеим и ЛIышъхьэ. Джащ фэдэу АР-м предпринимательствэм IэпыIэгъу етыгъэнымкIэ и Гупчэ ипащи Щытхъу тхылъ къыритыгъ.
ИкIэухым Адыгеим и ЛIышъхьэ республикэм IофшIэным епхыгъэ Iофыгъоу щызэшIуахыхэрэм нахь зягъэушъомбгъугъэнымкIэ пшъэрылъэу щытхэм къатегущыIагъ, АР-м экономикэ хэхъоныгъэмкIэ ыкIи сатыумкIэ иминистрэ пшъэрылъ заули къыфишIыгъ, ахэр зэпхыгъэхэр организациеу «Опора России» зыфиIорэм икъутамэ тапэкIи чанэу дэлэжьэнхэр ары.
АР-м и ЛIышъхьэ ипресс- къулыкъу къытырэ къэбархэмкIэ Тхьаркъохъо Сафыет.