Top.Mail.Ru

ЕшIэгъухэр гъэшIэгъоных

Image description

ФутболымкIэ Адыгэ Республикэм икIымэфэ чемпионат апэу хагъэунэфыкIырэ чIыпIэхэр къыщыдэзыхыгъэхэр къэнэфагъэх.

Апшъэрэ лигэм хэт командэхэр ары медальхэр къэзыхьыгъэхэр. Аужырэ я 7-рэ турым футболыр зыгу рихьыхэрэр лъэшэу ежагъэх. Я 6-рэ турым зэнэкъокъум ящэнэрэ чIыпIэр къыщыфагъэшъошагъ «МФОК Ошъутен» зыфиIорэм. Чемпионыр аужырэ ешIэгъум къыщынэфэнэу щытыгъ.
ТекIоныгъэм фэбэнагъэх Красногвардейскэ районым икомандэу «Патриот-01 Улапэмрэ» Мыекъопэ районыр къэзыгъэлъэгъорэ «Урожаимрэ». Адыгеим ыкIи Краснодар краим якомандэхэм ахэт ешIэкIо лъэшхэр командитIуми аугъоигъэх. ТапэкIэ ахэр зэIукIэгъа­гъэх, пчъагъэр зэфэдизэу аухыгъ. Арышъ, Iэгуаор нахьыбэу дэзыдзагъэмкIэ ыкIи нахь макIэу къызфыдадзагъэмкIэ чемпион хъущтыр къэнэфэнэу щытыгъ. «Урожаир» ыпэ ешIэнэу агъэнэфэгъагъ, ау «МКУ СОЦ» зыфиIорэр зэIукIэгъум къекIолIагъэп. Шапхъэхэм адиштэу ащ 5:0-у ешIэгъур шIуахьыгъ. Ащ къыхэкIыкIэ «Патриот-01 Улап» зыфиIорэм «АГУ-м» дыриIэщт зэIукIэгъум къэлапчъэм Iэгоуи 5 дидзэн фэягъ ыкIи ар къыдэхъугъ. Делэкъо Муратрэ Александр Красновымрэ гъогогъу тIурытIо, Iащэ Анзор, Делэкъо Аскэр, Джыгунэ Арсен ыкIи Алексей Подпругиным зырызэ къэлапчъэм Iэгуаор дадзагъ. Университетым икомандэ хэтэу, джырэ уахътэм «Зэкъошныгъэм» щешIэрэ Зезэрэхьэ Артур къэлапчъэм зэ Iэгуаор дидзагъ, пчъагъэр 8:1-у зэIукIэ­гъур аухыгъ. Апшъэрэ лигэм чемпионыкIэ иIэ хъу­гъэ — «Патриот-01 Улап». «Урожаим» ятIо­нэрэ чIыпIэр къыдихыгъ.
ЕшIэгъум ыуж турнирым хагъэунэфыкIырэ чIыпIэхэр къыщыдэзыхыгъэхэм ыкIи ащ иешIэ­кIо анахь дэгъухэм зэхэщакIохэр афэгушIуагъэх. УхъумэкIо анахь дэгъоу къыхахыгъэр ХъокIо Тахьир («МФОК Ошъутен»), къэлэпчъэ­Iут анахь дэгъур Владислав Шевченкэр («Урожай»), къэлапчъэм анахьыбэрэ Iэгуаор дэзыдзагъэр (8) ыкIи ешIэкIо анахь дэгъоу къыхагъэщыгъэр Датхъужъ Адам («Патриот-01 Улап»). Турнирым хэлэжьэгъэ анахь командэ ныбжьыкIэу «СШОР-2009» зыфиIорэр «Картонтара-Шытхьалэм» дешIагъ ыкIи 5:4-у текIоныгъэр къыдихыгъ. Ащ ишIуагъэкIэ аужырэ чIыпIэр къыбгынагъ.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

  1. «Патриот-01 Улап» — 16.
  2. «Урожай» — 16.
  3. «МФОК Ошъутен» — 10.
  4. «АГУ» — 7.
  5. «МКУ СОЦ» — 4.
  6. «СШОР-2008» — 4.
  7. «Картонтара-Шытхьал» — 3

7 яIагъ. «Ошъутенэм», «Тульскэм», «Спортмас­тер-2-м» текIоныгъэхэр къыдахыгъэх. «Кавказ Адэмый», «Спортмастер», «Олимп» зыфиIорэ командэхэм «МФОК Ошъутенэм», «Дружинэм» ыкIи «Альянсым» къашIуахьыгъ. «Космосымрэ» «Легионымрэ» 2:2-у зэдешIагъэх.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

  1. «Ошъутен» — 22.
  2. «Тульскэр» — 19.
  3. «Спортмастер-2» — 19.
  4. «Космос» — 16.
  5. «Легион» — 14.
  6. «МФОК Ошъутен» — 14.
  7. «Спортмастер» — 14.
  8. «Кавказ Адэмый» — 13.
  9. «Хьатыгъужъыкъуай» — 10.
  10. «СШОР-2009» — 7.
  11. «Олимп» — 5.
  12. «Альянс» — 4.
  13. «Дружина» — 2.
  14. «Канониры» — 0.

Я 9-рэ турым щылэ мазэм и 29-м щызэIукIэщтых: «Олимп» — Кавказ Адэмый», «Ошъутен» — «СШОР-2009», «Дружина» — «Хьатыгъужъыкъуай», «МФОК Ошъутен» — «Канониры», «Легион» — «Альянс», «Тульскэр» — «Космос», «Спортмастер-2» — «Спортмастер».
Нахьыжъхэр зыхэхьэрэ ветеранхэм ялигэ хэт командэхэм я 8-рэ турым къыдыхэлъытагъэу ешIэгъуитIу яIагъ. «ВНГ-р» 4:3-у «Джо­керым» текIуагъ. «Щагъдыир» «Штурмым» нахь лъэшыгъ, пчъагъэр – 3:1.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

  1. «ВНГ» — 13.
  2. «Щагъдый» — 13.
  3. «Штурм» — 8.
  4. «Делотехника» — 7.
  5. «Джокер» — 4.

КъыкIэлъыкIощт турым «Щагъдый» ыкIи «ВНГ» зыфиIорэ командэхэр зэIукIэщтых. Чемпион хъущтыр къэнэфэнымкIэ мы ешIэгъум мэхьанэшхо иI. Джащ фэдэу мы командэхэм ахэт нэбгыритIумэ къэлапчъэм ­Iэгуаор анахьыбэрэ дадзагъ: «Щагъдыим» хэт Тхьаркъохъо Казбек (12), «ВНГ-м» щешIэрэ Виктор Юферевым (10). Ахэм язэнэкъокъу гъэшIэгъоныщт.
БзэшIу Асхьад.