ИкIыгъэ илъэсым шIагъэ хъугъэр
УФ-м и Президентэу Владимир Путиныр кIэщакIо зыфэхъугъэ лъэпкъ проектыкIэу 2025-рэ илъэсэу къихьагъэм атIупщыгъэхэм ащыщ «ЩыIэныгъэм пае инфраструктурэр» зыфиIорэр.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэрэщаIуагъэмкIэ, ар «Щынэгъончъэ ыкIи шэпхъэшIухэм адиштэрэ гъогухэр» зыфиIорэм лъыпыдзагъэ мэхъу. Шъугу къэдгъэкIыжьын, ар 2019-рэ илъэсым къыщегъэжьагъэу шъолъырхэм ащыпхыращы.
ИлъэсыкIэ мэфэкIхэм апэкIэ лъэпкъ проектхэр республикэм зэрэщагъэцэкIагъэхэр зэфахьысыжьыгъ. Ахэм къадыхэлъытагъэу агъэнэфэгъагъэр зэкIэ шIагъэ хъугъэ. Ары пакIошъ, проектхэм ащыщхэмкIэ джы мы къихьэгъэкIэ илъэсым агъэнэфэгъагъэхэр пхыращыгъэх.
ПсэолъэшIынымкIэ Министерствэм къызэритыгъэмкIэ, «Щынэгъончъэ ыкIи шэпхъэшIухэм адиштэрэ гъогухэр» зыфиIорэр пIалъэхэм апэ итэу пхырыщыгъэ хъугъэхэм, анахьыбэу шIуагъэ къэзытыгъэхэм ащыщ. Ащ къыдыхэлъытагъэу 2024-рэ илъэсым шъолъыр мэхьанэ зиIэ автомобиль гъогу Iахь 18, ар километрэ 48,8-рэ мэхъу, федеральнэ шапхъэхэм адиштэу агъэкIэжьыгъ, Кощхьэблэ районымкIэ псыхъоу Фэдз телъ лъэмыджыр икIэрыкIэу ашIыжьыгъ, къалэу Мыекъуапэ ыкIи поселкэу Яблоновскэм яурамхэм ягъогу Iахь плIырыплI агъэцэкIэжьыгъ. Ахэм зэхэубытагъэу сомэ миллиардым ехъу апэIухьагъ.
Ащ нэмыкIэу 2025-рэ илъэсымкIэ агъэнэфэгъагъэу шъолъыр мэхьанэ зиIэ гъогу Iахьи 2 Красногвардейскэ районым, Iахьи 3 къалэу Мыекъуапэ ащагъэцэкIэжьыгъ, поселкэу Яблоновскэм иурамэу Промышленнэм игъогу мы уахътэм ашIыжьы.
Адыгеим игъогухэр щынэгъончъэнхэм фэшI гъогурыкIоным ишапхъэхэр зыукъохэрэр зыгъэунэфыщт комплекс 16 2024-рэ илъэсым ащагъэуцугъ. Гъогухэр къызэтегъэнэгъэнхэм пае хьылъэзещэ автомашинэхэм арылъыр къэзыщэчырэ псэуалъэхэр Кощхьэблэ ыкIи Тэхъутэмыкъое районхэм ащагъэпсыгъэх.
Джащ фэдэу гъогу лъэпкъ проектым къыдыхэлъытагъэу зэшIохыгъэ хъугъэхэм ащыщ цIыфхэр зезыщэрэ транспортыр игъорыгъоу республикэм зэрэщагъэкIэжьырэр. ГущыIэм пае, блэкIыгъэ илъэсым автобус 30 къащэфи атIупщыгъ.