Top.Mail.Ru

Зэнэкъокъу зэхащэ

Автоном мысатыу организациеу ­«КIэлэцIыкIухэмрэ ныбжьыкIэхэмрэ япIункIэ инновационнэ гупчэм», Урысые Федерацием IэкIыб къэрал Iоф­хэмкIэ и Министерствэ, Россотрудничествэм, федеральнэ къэралыгъо бюджет учреждениехэу «Роспатриотцентр», «Росдетцентр» зыфиIо­хэрэм, фондэу «Русский мир», Юнармием, Московскэ кIэлэегъэджэ къэралыгъо университетым, ны-тыхэм я Лъэпкъ ассоциацие я VII-рэ Дунэе зэнэкъокъоу «Зэрэдунаеу уи Хэгъэгу ­зэлъягъашI» зыфиIорэр зэхащэ.

Урысые Федерацием гъэсэныгъэмкIэ и Министерствэ 2024 — 2025-рэ илъэс еджэгъумкIэ игъо ылъэгъугъэ Iофтхьабзэхэм мы зэнэкъо­къур ащыщ.
Ар зыфытегъэпсыхьагъэр кIэлэцIыкIухэмрэ ныбжьыкIэхэмрэ патриотическэ пIуныгъэ дэгъу ягъэгъотыгъэныр, тихэгъэгуи, IэкIыб къэралыгъохэми арыс кIэлэцIыкIухэмрэ ныбжьыкIэхэмрэ Урысыем лъытэныгъэ фягъэшIыгъэныр, Урысыемрэ ащ ныбджэгъуныгъэ зыдыриIэ хэгъэгу­хэмрэ яныбжьыкIэхэм язэкъошныгъэ, якультурэ зэпхыныгъэхэр гъэпытэгъэнхэр ары. Зэнэкъо­къум хэлажьэхэрэр я Хэгъэгу ихъугъэ-шIэгъэ, ихэбзэ, илъэгъупхъэ чIыпIэ анахь гъэшIэгъонхэм къатегущыIэх, видеороликкIэ е ясурэт­шIыгъэкIэ яхэгъэгогъухэри IэкIыб къэралыгъохэм арыс ялэгъухэри ахэм нэIуасэ афашIых.
Мыщ фэдэ зэнэкъокъур зызэхащэрэм къыщегъэжьагъэу Урысыем ишъолъыр 89-мэ, хэгъэгу 70-мэ арысхэм яIофшIэгъэ 16300-рэ зэхэщакIохэм къаIэкIэхьагъ.
ПэшIорыгъэшъэу къыхахырэ IофшIагъэхэр социальнэ хъытыухэм къарагъэхьащтых. Зэнэ­къокъур лъэныкъуищкIэ (нэкIубгъу-лъэтегъэуцо­кIэ, видеороликкIэ, сурэткIэ) зэтыраутыщт.
ТекIоныгъэ къыдэзыхыгъэхэр къыхэзыхыщтхэр эксперт Советымрэ осэшI гъэшIуагъэхэмрэ ары. М. В. Захаровыр, Д. В. Поликановыр ыкIи нэмыкI къэралыгъо IофышIэ цIэрыIохэр ахэм ахэтых.
ОсэшIхэм яунашъокIэ зэнэкъокъум и Гран-при илауреатхэр агъэнэфэнхэ алъэкIыщт. Джащ фэдэу ащ илауреатхэр (IофшIэгъэ анахь дэ­гъуи 150-р зэхэзыгъэуцуагъэхэр) агъэнэфэщтых.
Зэнэкъокъум хэлэжьэрэ пстэуми электрон сертификатхэмрэ рэзэныгъэ тхылъхэмрэ, текIоныгъэ къыдэзыхыхэрэм — дипломхэмрэ шIу­хьафтынхэмрэ афагъэшъошэщтых. ТекIоныгъэ къыдэзыхыхэрэм Москва шIухьафтынхэр къащыратыжьыщтых.
КъэбарлъыгъэIэс амалхэм ярепортажхэу Дунэе зэнэкъокъоу «Зэрэдунаеу уи Хэгъэгу зэлъягъашI» зыфиIорэм ехьылIагъэхэр къызэ­рыхьащтхэр: «Россия-1», Апэрэ каналыр, «Русский мир», Вместе.РФ, Телеканалэу 360-р.
2025-рэ илъэсым гъэтхапэм и 25-м нэс сайтэу «www.youthy.ru» зыфиIорэм яIофшIагъэхэр агъэхьынхэ фае. Зэнэкъокъум нэмыкI шапхъэу пылъхэр Положением рагъо­тэщтых.