Уихэгъэгу, укъызщыхъугъэ чIыпIэр шIу плъэгъунхэ зэрэфаем, ащкIэ щысэ зытепхымэ хъущт­хэм афэгъэхьыгъэ зэха­хьэхэр гурыт еджапIэхэм бэу ащызэхащэх. Щынджые гурыт еджапIэу N 24-м икIэлэеджа­кIоу гъэзетым къыдэлэжьэрэ Талъэкъо Дамир ащ фэгъэхьыгъэ тхыгъэу къытфигъэхьыгъэр къыхэтэуты.

Тихэгъэгу цIыф лъэпкъ зэфэшъхьафхэр мамырэу щэпсэух. Ахэм тэри тащыщ. Мамырэу тызэрэпсэурэр тэгъэлъапIэ. ТипсэукIэ рэхьат тфэзыухъумэхэрэм пшъэ­дэкIыжь ин ателъ. ЛIэшIэгъу зэфэшъхьафхэм Хэгъэгур тфэзыухъума­гъэхэм апсэ зытыгъэхэри бэу ахэтых. ЦIыфыр чIыгум къызтехъуагъэм ще­гъэжьагъэу зэпэуцухэм якIодылIагъэр зыфэдизыр къэзыIон щыIэпщтын. Мамыр щыIакIэр заом зэщегъакъо. Нэпсыр, тхьамыкIагъор, лIэныгъэр ащ къыз­дехьых.
Сэ заор слъэгъугъэп, ау телевизорым къыгъэлъагъохэрэм ыкIи сятэ къысфи­Iуатэхэрэм сядэIу зыхъукIэ, цIыф хыехэм ащэчыгъэр сыгу зэхешIэ.
Сятэу Талъэкъо Зауркъан Афганистан щызэуагъ, а уахътэм ащ дзэкъулыкъур ыхьыщтыгъ. Бэрэ къысфеIуатэ а илъэс къинхэм ащ пэкIэкIыгъэр. Иныбджэгъоу къэзымыгъэзэжьыгъэхэр ыгу къэкIыжьых, ащ егъэчэфынчъэ.
Джырэ лъэхъан тыкъызхиубытэгъэ хэушъхьафыкIыгъэ дзэ операцием ти Хэгъэгушхо къаухъумэнэу бэхэр ежьхэм яшIоигъоныгъэкIэ кIуагъэх. Тэ тичылэ щыщхэри ахэм ахэтых: Хьагъур, Рус­лъан, Талъэкъо Азэмат, ЕмтIылъ Мурат, ЛIэ­хъусэжъ Мэдин. Илъэсым ехъугъэу ахэр хэушъхьафыкIыгъэ дзэ операцием хэлажьэх. ЛIэхъусэжъ Мэдинэ пыим пэуцузэ фэхыгъэ. Чылэм дэсхэм зэкIэми ар лъэшэу гукъао ащыхъугъ.
Хьагъур Руслъан зыгъэпсэфыгъо уахътэ къырати чылэм къызэкIом зэIу­кIэгъу дытиIагъ.
— СыздакIорэр зыфэдэр сшIэзэ сыкIуагъ. Хэгъэгу зэошхор къызежьэм, тятэжъхэр псэемыблэжьхэу ти Хэгъэгу­шхо къаухъумэнэу пыим пэуцугъагъэх. Джы тэ тичэзыу къэсыгъ, — джары Руслъан ипэублэ гущыIэхэр зыфэдагъэхэр.
Фронтым уIутыныр зэрэмыпсынкIэр ащ къытфиIотагъ. ТидзэкIолIхэм ягупсэхэр, янэ-ятэхэр, яшъхьэгъусэхэр къяжэх. Хэтрэ цIыфи силъэIу фэсэгъэхьы: тидунай джащ нахьыбэрэ заор къыщерэмыжьэжь, ошъогур къабзэу, дунаир мамырэу Тхьэм тытырегъэт.