Урысые зэнэкъокъоу «ИсэнэхьаткIэ анахь дэгъур» зыфиIорэм илъэныкъоу «КъоешI анахь дэгъум» ифинал къалэу Самарэ щыкIуагъ. Ащ текIоныгъэр къыщыдэзыхыгъэхэм язырэр Адыгеим щыщ.

Урысыем ишъолъыр 33-мэ къарыкIыгъэхэу нэбгырэ 45-рэ Iофтхьабзэм хэлэжьагъ. Тихэгъэгу анахь щызэлъашIэрэ къуа­ехэм ащыщэу адыгэ къуаер зышIырэ IэпэIасэу Адыгеим икIыгъэхэри ахэм ахэтыгъэх. УФ-м IофшIэнымкIэ ыкIи цIыфхэр социальнэу ухъумэгъэн­хэмкIэ и Министерствэ къызэритыгъэмкIэ, зэнэкъокъум щагъэцэкIэгъэ IофшIэнхэм ащыщ адыгэ къуаем епхыгъагъ. ГущыIэм пае, ащ иихынкIэ шIыкIэу агъэфедэрэм тетэу къуае ашIын фэягъ.
Зэнэкъокъум ящэнэрэ чIыпIэр щиубытыгъ Адыгеим икIыгъэу, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Сыры Мира» зыфиIорэм иIофышIэу Светлана Гарагуля. Апэрэ хъугъэ Iофтхьабзэм ибысымэу, Самарскэ хэкум щыщэу Ксения Рединар, Республикэу Чувашием къикIыгъэ Ольга Кошелевам ятIонэрэ чIыпIэр ыхьыгъ.
Зэнэкъокъум УФ-м IофшIэнымкIэ ыкIи цIыфхэр социальнэу ухъумэгъэнхэмкIэ и Министерствэ, Самарскэ хэкум и Правительствэ, мы къэлэ дэдэм имэкъумэщ университет кIэщакIо фэхъугъэх.
КъоешIыным фытегъэпсыхьэгъэ сэнэхьатхэм уасэу яIэр къэIэтыгъэныр, ащ щылажьэхэрэм шIэныгъэу аIэкIэлъыр, ясэнаущыгъэ уплъэкIугъэ­ныр, ныбжьыкIэхэр мы лъэныкъом нахьыбэу хэщэгъэнхэр ары пшъэрылъ шъхьаIэу ащ иIагъэр.