Адыгеим и ЛIышъхьэу КъумпIыл Мурат Иорданием и Адыгэ шIушIэ обществэ итхьаматэу Рушди Ибрахьимэ, шIушIэ обществэм къепхыгъэ бзылъфыгъэ Хасэм ипащэу Къандур Сэтэнае, организацием ифинансовэ пащэу Мустафа Мохаммед республикэм и Правительствэ зычIэт унэм тыгъуасэ зэIукIэгъу щадыриIагъ.

Джащ фэдэу Iофтхьабзэм хэлэжьа­гъэх Урысыем IэкIыб IофхэмкIэ и Министерствэ илIыкIо IофшIапIэу Краснодар щыIэм иапэрэ секретарэу Игорь Терзиян, АР-м лъэпкъ IофхэмкIэ, IэкIыб къэралхэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, общественнэ движениеу «Адыгэ Хасэм» итхьаматэу ЛIымыщэкъо Рэмэзан, АР-м и ЛIышъхьэ IэкIыб зэпхыныгъэхэмкIэ ыкIи инвестиционнэ политикэмкIэ иIэпыIэгъоу Хьа­къунэ Бэллэ.
Адыгэ Республикэмрэ Иорданиемрэ бизнесымкIэ, культурэмкIэ зэпхыныгъэу зэдыряIэхэм тапэкIэ зызэрарагъэушъо­мбгъущт шIыкIэм зэIукIэм хэлэжьагъэхэр тегущыIагъэх. Адыгеим и ЛIышъхьэ Иорданием ипачъыхьэу я II–рэ Абдалла тетыгъор зиIыгъыр илъэс 25-рэ зэрэхъу­гъэмкIэ зэрэфэгушIорэр раIожьы зэрэшIоигъор, пачъыхьэ унагъор Иорданием щыпсэурэ адыгэхэм зэрафэгумэкIырэмкIэ зэрафэразэр къыIуагъ.
КъумпIыл Мурат джащ фэдэу Рушди Ибрахьимэ фэгушIуагъ Адыгэ шIушIэ обществэм итхьамэтэ IэнатIэр бэмышIэу къызэрэфагъэшъошагъэм фэшI ыкIи иIофшIэн гъэхъагъэхэр щишIынхэу фэлъэIуагъ.
Урысыемрэ Иорданиемрэ азыфагу зэфыщытыкIэшIухэр зэрилъхэр зэIукIэм къыщыхагъэщыгъ. Республикэм ипащэ къызэриIуагъэмкIэ, Урысыем и Президентэу Владимир Путинымрэ Иорданием ипачъыхьэу я II-рэ Абдалларэ зэдэлэжьэныгъэу зэдыряIэм ар къыкIэкIуагъ.

«Иорданием ис адыгэхэм Урысыемрэ Иорданиемрэ язэфыщытыкIэхэм ягъэпытэн яIахьышIу хашIыхьэ. Тихэгъэгу­хэр зэзыпхырэ лъэмыджэу ахэр щытых, культурэ-гуманитар, сатыу-­экономикэ зэдэлэжьэныгъэм изегъэушъомбгъун фэIорышIэх», — къыIуагъ КъумпIыл Мурат.
Адыгеим илIыкIо куп Иорданием зэкIо ыкIи къэралыгъом ипащэ зыIокIэ нэуж медицинэм, гъэсэныгъэм, культурэм япхыгъэ проект заулэ гъэхъагъэ хэлъэу республикэм зэрэщагъэцакIэрэр АР-м и ЛIышъхьэ агу къыгъэкIыжьыгъ. Хэгъэ­гуитIумэ язэпхыныгъэ тапэкIи нахь пытэ зэрэхъущтым ицыхьэ зэрэтелъыр КъумпIыл Мурат къыIуагъ.
Дахэу къазэрапэгъокIыгъэхэм фэшI къазэрафэразэхэр хьакIэхэм къаIуагъ, адыгэхэм ащыщхэм Иорданием икъэралыгъо къулыкъухэм Iоф зэращашIэрэр, лъытэныгъэ къазэрафашIырэр хагъэунэфыкIыгъ.
Адыгэ шIушIэ обществэм илIыкIохэм предложение заулэ зэIукIэм къыща­хьыгъ. Ахэр зыфэгъэхьыгъагъэхэр Иорданием къикIыжьырэ тилъэпкъэгъухэр щыIэныгъэм хэгъэгъозэжьыгъэнхэм, пэIудзыгъэ шIыкIэм тетэу адыгабзэр зэгъэшIэгъэным, зэреджэщтхэ тхылъхэр еджакIохэм къафэгъотыгъэнхэм, Адыгеим щеджэ зышIоигъо иордан студентхэм атегъэ­псыхьэгъэ квотэхэр нахьыбэ шIыгъэнхэм япхыгъэ Iофыгъохэр ары.
КъумпIыл Мурат къулыкъу гъэнэфагъэхэм пшъэрылъ афишIыгъ общественнэ организацием илIыкIохэм IэпыIэгъу афэхъунхэу. ПэIудзыгъэ шIыкIэм тетэу адыгабзэр зэгъэшIэгъэнымкIэ гуманитар ушэтынхэмкIэ Адыгэ республикэ институтым ипроектнэ офис техническэ амалэу иIэхэр икъоу гъэфедэгъэнхэ зэрэфаер шъхьафэу зэIукIэм щыхагъэ­унэфыкIыгъ.
АР-м и ЛIышъхьэ ипресс-къулыкъу къытыгъэ къэбархэмкIэ
ЛIышэ Саныет.