Урысые Iофтхьабзэу «Кросс нации-2024» зыфиIорэм Мыекъуапэ хэлэжьагъ. Хабзэ зэрэхъугъэу, 2004-рэ илъэсым къыщыублагъэу къэралыгъом ишъолъырхэм зэкIэми мыр ащэкIо.

Лъэпкъ проектэу «Демографием» ифедеральнэ проектэу «Спортыр щыIэныгъэм ишапхъ» зыцIэм къыдыхэлъытагъэу рагъэ­кIокIырэ Iофтхьабзэм цIыфыбэ хэлажьэ. Спортыр ыкIи физическэ культурэр зыгу рихьыхэрэр, зипсауныгъэ зыгъэпытэ зышIоигъохэр ащ зэрепхых.
МыекъуапэкIэ Iофтхьабзэр зыщырагъэкIокIыгъэр республикэ стадионэу «Зэкъошныгъэр» ары. Зызыушэтыгъэхэр аныбжь елъытыгъэу агощыгъагъэх. Нэбгырэ 500 фэдиз къызэдэчъэнхэм ахэлэжьагъ. Зэфэхьысыжьхэм къызэ­рагъэлъэгъуагъэмкIэ, анахь цIыкIухэм якуп щатекIуагъэх Быщтэ Зауррэ Анастасия Бикетовамрэ. Джащ фэдэу ахэм тIэкIу анахьыжъхэу Платон Недоступовымрэ Ека­терина Головиновамрэ апэрэ чIыпIэр къыдахыгъ. НыбжьыкIэхэм якуп анахь щылъэшыгъэх Максим Моревыр, Никита Павельевыр, Анна Купинар ыкIи Виктория Гордеевар. Бзылъфыгъэхэм ыкIи хъулъфыгъэхэм якупхэм текIоныгъэр къащыдахыгъ Александр Якимцовымрэ Надежда Михальцовамрэ.

Мыщ фэдэ зэнэкъокъухэм те­кIоныгъэр арэп анахь щышъхьа­Iэр, ахэм уахэлэжьэныр, зыуушэтыныр, уипсауныгъэ бгъэпытэныр ары.