Шэн-хэбзэ ыкIи зекIокIэ-шIыкIэ дахэхэр къизыIотыкIырэ адыгэ къа­шъор ищыIэныгъэ гъогу пытэу хэуцуагъэу къырэкIо Шыблэкъо Альбинэ.

— СицIыкIугъом къыщыублагъэу сценэм сытетэу сыкъэ­шъоныр ренэу гухэлъэу зыдэсIыгъыгъ. Къашъор сищыIэныгъ, ащ кIуачIэ къысеты, тамэ къыз­гуегъакIэ, — еIо Альбинэ.
Альбинэ къызэрэтфиIотагъэм­кIэ, илIакъокIэ ХьакIэмзые щыщ, Тхыгъохэм япхъу. Мыекъуапэ игурыт еджапIэу N 10-м иятIо­нэрэ класс исэу Къулэ Амэрбый зипэщэгъэ кIэлэцIыкIу къэ­шъокIо купэу «Майкопчанкэм» хэхьагъ. Мыпшъыжьэу Iоф зэ­рэзыдишIэжьыгъэм къыхэкIэу Альбинэ къэшъокIо цIэрыIоу сце­нэм тетыгъ, IэпэIэсэныгъэшхо хэлъэу къашъохэр къышIыщтыгъ. Я 10-рэ классым нэс ащ къыщышъуагъ, нэужым ащ IэпэIэсэныгъэу хэлъым А. Къу­лэм гу лъити, илъэси 5-м къыщегъэжьагъэу илъэс 15-м нэс зыныбжь кIэлэцIыкIу купхэр ыгъэсэнхэу IофшIапIэ къыри­тыгъ. 2004-рэ илъэсым къыщыублагъэу 2017-рэ илъэсым нэс балетмейстерэу Iоф ышIагъ.
Къашъор культурэм иIахьэу зэрэщытыр къыушыхьатызэ, лъэпкъ культурэм и Гупчэу Мые­къуапэ дэтым щылэжьагъ, кIэлэцIыкIухэм къэшъуакIэ аригъэшIагъ. Адыгеим ирайонхэм арагъэблагъэзэ мастер-классхэр афызэхищэщтыгъ.
— Сыд фэдизэу сиIофшIэн шIу слъэгъущтыгъэми, сэ сызыфэягъэр сценэшхом сытетэу сыкъэшъонэу ары. Къэралыгъо академическэ ансамблэу «Налмэсым» къыщышъохэрэм сяплъы зыхъукIэ, ахэм сяхъуа­псэщтыгъ. 2017-рэ илъэсым сигу­хэлъ къыздэхъугъ, ащыгъум илъэс 28-рэ сыныбжьэу творческэ объединениеу «Ошъад» зыфиIорэм ипащэу Едыдж Вик­торие зэхищэгъэ хореографическэ ансамблэу «Синдикэм» сыригъэблагъи, джы къызнэсым ащ сыкъыщышъуагъ. Мы мазэм, шышъхьэIум къыщегъэжьагъэу Едыдж Викторие сыриIэпыIэ­гъоу, репетиторэу Iоф сэшIэ. Ащ нэмыкIэу кIэлэцIыкIу ансамблэу «Ошъадэм» ыкIи «Спутник ансамбля Синдика» зыфиIорэм пэщэныгъэ адызесэхьэ, — къы­Iуагъ Альбинэ.
Ыгурэ ыпсэрэ къашъом хэзылъхьагъэу, IэпэIасэу Альбинэ икъэшъуакIэ ренэу къахэщы, искусствэм кIочIэ лъэшэу иIэр нахьышIоу къыплъегъэIэсы.

— Шъыпкъэу пIощтмэ, сценэм сытетэу сыкъызэрэшъогъэ уахътэр сфикъугъэп. Сыда пIомэ профессиональнэ коллективым творческэ IофшIэныр кIасэу щезгъэжьагъ. Илъэс 35-р сце­нэм­кIэ бэ, уфай-уфэмыеми сценэм ныбжьыкIэхэр шIу елъэ­гъух. Сэ згъэсагъэхэр джы сце­нэм къыздытетых, — къыIуагъ Альбинэ.
Альбинэ къызэрэтфиIота­гъэмкIэ, янэу Тхыгъо Ларисэ фэягъэп къашъом ар пылъынэу. Сыда пIомэ ипсауныгъэкIэ фэмыукIочIынэу егупшысэщтыгъ. Сыд къыриIуагъэми, янэ емыдэIоу къэшъокIо купым хэхьагъ. Арэу щытми, янэ зэремыгупшысагъэу Альбинэ сэнаущыгъэ хэлъэу къычIэкIыгъ, къыдэхъугъэри макIэп. Джы ипшъашъэ игъэхъагъэхэм янэ арэгушхо, насыпыгъэкIэ зыфелъэгъужьы.
— Къашъом ишъэфхэм сафэзыгъэсагъэу, апэрэ кIэлэегъа­джэу сиIэгъэ Къулэ Амэрбый лъэшэу сыфэраз. Къашъор иIэу­бытыпIэу культурнэ кIэным икъэухъумэн зиIахьышхо хэзы­шIыхьагъэхэм, кIэлэцIыкIухэм ыкIи ныбжьыкIэхэм яцIыкIугъом къыщегъэжьагъэу адыгэ лъэпкъ культурэр шIу языгъэлъэгъу­гъэхэм ар ащыщ. Ащ сызэригъэсагъэм сырэгушхо, къашъор шIу сигъэлъэгъугъ. Непэ къыз­нэсыгъэм ар сищыIэныгъэ
гъогоу сыкъырэкIо. Джыдэдэм си­пащэу Едыдж Виктории Амэрбый ыгъэсагъэхэм ащыщ. Ащ къысиIуагъ: «Сэщ уфэдэу усэлъэгъу». Ащ къикIырэр зы ­еджапI къэткIугъэр, зы кIэлэ­егъадж тезыгъэджагъэр ыкIи гупшысэу тиIэри зы. Лъэпкъ къа­шъом идэхагъэ цIыфхэм алъызыгъэIэсырэ Викторие лъэ­шэу сыфэраз, сисэнаущыгъэ къызэрэхигъэщыгъэр, цыхьэу къысфишIыгъэр къызэрэзгъэ­шъыпкъэжьыщтым сыпылъ, — еIо Альбинэ.

ИскусствэмкIэ колледжэу Тхьа­бысымэ Умарэ ыцIэ зы­хьырэр Альбинэ къыухыгъ. Мы­гъэ искусствэмкIэ Темыр-­Кавказ къэралыгъо институтэу Нал­щык дэтым чIэхьажьыгъ.
— Узыпылъ Iофыр апэрапшIэ шIу плъэгъун фае. Сызхэт коллективэу «Синдикэм» игъэхъагъэхэмкIэ сэпсэу. Мыр ятIонэрэ унэу сиI. Сыда пIомэ пчэды­жьым щегъэжьагъэу щэджагъом нэс «Синдикэм» хэт къэшъуа­кIохэм Iоф адэсэшIэ, етIани пэсэдзэжьышъ, пчыхьэм сыхьатыр 9-м нэс анахь цIыкIухэм сахэт. Мы мафэхэм лъэпкъ къа­шъоу «лъэпэтедз» зыфиIорэр згъэуцугъэ. Лъэпэтетмэ атетхэу, пхъэкIычыр аIыгъэу къэ­шъуакIохэр зэфакIо къешIэх. КIэ горэхэр къашъом зэрэхэзгъэхьащтым, къызэрэсыугупшысыщтым ренэу Iоф дэсэшIэ, — къыIуагъ ащ.
Альбинэ къызэриIорэмкIэ, ыгъэсэрэ кIэлэцIыкIухэр цIыфышIух, лъэгъо дахэ щыIэны­гъэм щыпхыращы. Къэшъоным зэрэфигъасэхэрэм нэмыкIэу адыгэм итарихъ аригъэшIэным, лъэпкъым ишэн-хабзэхэр ыкIи зекIокIэ-шIыкIэхэр ахилъхьанхэм пылъ.
Гу кIуачIэу иIэмкIэ, къэшъон сэнаущыгъэу хэлъымкIэ, щыIэныгъэм шIулъэгъоу фыриIэмкIэ иIофшIэгъухэм Альбинэ къахэщы. ЗиIофшIэн гуетыныгъэшхо фызиIэ творческэ цIыфым тиреспубликэ щыпсэухэрэр дэ­хагъэм хэщэгъэнхэмкIэ, дунаим тет цIыф лъэпкъ зэфэшъхьафхэм яшэн-хабзэхэр нахь дэгъоу ашIэнхэмкIэ, ныбжьыкIэ­хэр шэпхъэ дахэхэм атетэу пIу­гъэнхэмкIэ мафэ къэс мы­пшъы­жьэу Iоф ешIэ. Ансамб­лэхэм Iоф ащишIэзэ, къашъоу ыгъэуцухэрэм адыгэ лъэпкъым ихэбзэ дахэхэр, адыгэхэм цIыфыгъэу, хьалэлныгъэу ахэлъыр, бзылъфыгъэхэм яищыгъагъэ, ядэхагъэ къащыреIотыкIы.
«Синдикэм» къыщышъозэ, Альбинэ зыхэт купыр Iофтхьэбзэ ыкIи зэнэкъокъу пчъагъэмэ ахэлэжьагъэх, чIыпIэ гъэшIэ­гъоныбэмэ ащыIагъэх, хагъэунэфыкIырэ чIыпIэхэр къафагъэшъошагъэх. Анахьэу шIукIэ ыгу къэкIыжьырэр 2018-рэ илъэсым IэкIыб къэрал, Дубай зэрэкIогъагъэхэр ары. Ащ дэс адыгэхэм рагъэблагъэхи, концерт къа­фатыгъ. Джыри мы илъэсым, чъэпыогъум Тыркуем и Адыгэ Хасэ ригъэблэгъагъэх. Абхъазым щыкIогъэ заом ТекIоныгъэ къызщыдахыгъэ мафэр зыщыхагъэунэфыкIыщт Iоныгъом и 26-м ансамблэу «Синдикэр» ащ кIощт. Неущ, шышъхьэIум и
28-м, Москва ежьэщтых, славян искусствэмкIэ шъолъыр твор­ческэ фестивалэу «Русское по­ле» зыфиIорэм хэлэжьэщтых.
Альбинэ зэрэныбжьыкIэм емылъытыгъэу, исабыйхэр чъэп­хъыгъэх. ИкIалэу Бислъан искусствэмкIэ колледжэу Тхьабысымэ Умарэ ыцIэ зыхьырэм хореографиемкIэ иотделение щеджэ. Ипшъашъэу Заринэ я 8-рэ классым мыгъэ ихьагъ, къэшъокIо ансамблэу «Ошъа­дэм» къыщэшъо.
Альбинэ ыныбжь непэ илъэс 35-рэ мэхъу. Гу кIуачIэу иIэм къыкIыримыгъэчэу, тиреспубликэ ыцIэ дахэкIэ аригъаIоу, шIоу щыIэр игъогогъоу щыIэнэу ащ тыфэлъаIо.
КIАРЭ Фатим.