БоксымкIэ Къыблэ федеральнэ шъолъырым ичемпионат Краснодар щыкIуагъ.
Къащэчырэм елъытыгъэу куп-купэу гощыгъэхэу спортсмен лъэшхэм ащ зыкъыщагъэлъэгъуагъ. Адыгеим икIыгъэ нэбгыриблымэ ащыщхэм гъэхъагъэхэр ашIыгъ.
ПшъашъэхэмкIэ София Максютэ дышъэ медаль къыхьыгъ. ТикIалэхэм апэрэ чIыпIэ къахьышъугъэп, ау спортсмен лъэшхэм дэгъоу зэрапэуцужьышъущтхэр къагъэлъэгъуагъ. Килограмм 54-рэ къэзыщэчырэ купым хэтэу зиушэтыгъ Евгений Жоровым. КIалэм изэIукIэгъухэр къыхьыхи финалым нэсыгъ. Краснодар краим щыщэу, спортымкIэ мастерэу Амин Алакаевым кIэухым рингым дихьагъ. ПэшIорыгъэшъэу текIощтыр къэнафэщтыгъэп, аужырэ нэгъэупIэпIэгъум нэс спортсменхэр зэпэуцугъэх. Пчъэгъэ мэкIэ дэдэ азыфагоу судьяхэм Аминэ текIоныгъэр ратыгъ. Евгений Жоровым тыжьын медаль къыхьыгъ. БоксымкIэ Урысые чемпионатым хэлэжьэщт кIалэхэмкIэ мы зэIукIэгъур зыгъэхьазырыныгъэ дэгъу хъугъэ.
Адыгеим икуп джыри джэрз медалитIукIэ зэнэкъокъум къыщыхэщыгъ. Инэм щыщ Всево-лод Гвоздевыр килограмм 71-рэ къэзыщэчыхэрэм ахэтэу нэкъокъуагъэ. Кощхьаблэ къикIы-гъэ Александр Шаповаловым килограмм 86-рэ зихьылъагъэхэм ахэтэу зиушэтыгъ.