Адыгеим ижъогъожъыехэр

КIэлэцIыкIухэмрэ ныбжьыкIэхэмрэ я XVII-рэ Дунэе фестиваль-зэнэкъокъоу «Адыгеим ижъогъожъыехэр» зыфиIорэр мы мафэхэм Мыекъуапэ щыкIуагъ. Адыгэ Республикэм культурэмкIэ и Министерствэ, АР-м лъэпкъ культурэмкIэ и Гупчэ ащ кIэщакIо фэхъугъэх.

Урысыем щыпсэурэ лъэпкъхэм языкIыныгъэ и Илъэсэу мыгъэ зэрэщытым, Адыгэ Республикэм икъэралыгъо программэу «Культурэм хэхъоныгъэ ышIыныр» зыфиIорэм къыдыхэлъытагъэу зэнэкъокъур зэхащагъ. «Адыгеим ижъо­гъожъыехэм» сэнаущыгъэ зыхэлъ кIэлэцIыкIухэр, ныбжьыкIэхэр илъэс къэс зэфещэх.Илъэси 6 — 22-рэ зыныбжьхэр фестивалым хэлэжьагъэх. Урысыем ишъо­лъыр 18-мэ къарыкIыгъэхэм ясэнаущыгъэрэ яIэпэIэсэныгъэрэ къагъэлъэ­гъуагъ. Мыгъэ апэрэу Запорожскэ хэкум щыщ­хэр Iофтхьабзэм хэлэжьагъэх.

IэкIыб къэралыгъохэу Тыркуем, Армением, Казахстан, Азербайджан ялIыкIохэр заочнэ шIыкIэм тетэу фестивалым хэлэжьагъэх. Урысыем ишъолъырхэу Къалмыкъым, Къэбэртэе-Бэлъкъарым, Къэрэщэе-Щэрджэсым, Дагъыстан, Ингушетием, Краснодар краим, Ростов хэкум, Ставропольскэ краим, Адыгеим якIэлэцIыкIухэмрэ яныбжьыкIэхэмрэ очнэ шIыкIэм тетэу заушэтыгъ.КIэлэцIыкIу фестивалым ипшъэрылъ шъхьаIэр искусствэм хэхъоныгъэхэр ышIынхэр, сэнаущыгъэ зыхэлъ ныбжьыкIэхэр къыхэгъэщыгъэнхэр ары.АР-м культурэмкIэ и Министерствэ ыцIэкIэ Iофтхьабзэм къеблэгъагъэхэм шIуфэс гущыIэхэмкIэ закъыфигъэзагъ Адыгеим культурэмкIэ иминистрэ игуа­дзэу Кушъу Светланэ.— «Адыгеим ижъогъожъыехэр» культурэмкIэ Iофтхьэбзэ анахь шъхьаIэмэ ащыщ хъугъэ. Ащ хэлажьэхэрэм яIэпэIэсэныгъэ хагъахъо. Ар зихьатырыр зыгъасэхэу зыгъэхьазырхэрэр ары. Iоф­тхьабзэм тапэкIэ джыри нахь зедгъэушъомбгъущт, — къы­Iуагъ Кушъу Светланэ.АР-м и Къэралыгъо Совет — Хасэм и Тхьаматэ игуадзэу, Урысыем и ЛIы­хъужъэу Цэй Эдуард Адыгеим и ЛIышъхьэрэ АР-м и Парламентрэ ацIэкIэ зэхахьэм хэлажьэхэрэм шIуфэс гущыIэхэмкIэ закъыфигъэзагъ.

Орэд къэIонымкIэ, къэшъонымкIэ, музыкальнэ Iэмэ-псымэм къегъэIогъэнымкIэ, художественнэ гущыIэмкIэ ныбжьыкIэхэм заушэтыгъ.Мы илъэсым фестивалым и Гран-при зыфагъэшъошагъэхэр: орэд къэIонымкIэ — Воронежскэ хэкум къикIыгъэ Дмитрий Каплиевыр, музыкальнэ Iэмэ-псымэхэмкIэ — Мыекъопэ районым ишъон­тырыпэо купэу «АрсДхол»Джащ фэдэу Щэрджэскъалэ икъэшъокIо купэу «Нартхэм апхъухэр», Джэджэ районым щыщ Ростислав Паршиныр къыхагъэщыгъэх.Творческэ купхэм, къэшъуакIохэм ыкIи орэдыIохэм къэгъэлъэгъоныбэ къагъэхьазырыгъ. Фестивалым зэрэхэлэжьагъэхэр къэзыушыхьатырэ тхылъхэмрэ шIухьафтынхэмрэ зэкIэми аратыгъэх.Аныбжь елъытыгъэу текIоныгъэ къыдэзыхыгъэхэр агъэнэфагъэх. Зэнэкъокъум илауреат нэбгырэ 56-рэ хъугъэ.Iофтхьабзэм хэлэжьэгъэ хьакIэхэм Адыгэ Республикэм ичIыпIэ дахэхэр арагъэлъэгъугъэх, тилъэпкъ шэн-хабзэхэр, Адыгеим итарихъ къафаIотагъ, цIыф гъэшIэгъонхэм аIуагъэкIагъэх. Фестивалыр хьакIэхэмкIи бысымхэмкIи мэфэкI ин хъугъэ.

ЛъэпшъыкъоФатим.