АмалыкIэхэр къытыщтых

АР-м и ЛIышъхьэу КъумпIыл Мурат пэщэныгъэ зыдызэрихьэрэ купыр дунэе экономическэ форумэу Петербург щы­кIорэм мэкъуогъум и 3-м къыщегъэжьагъэу и 6-м нэс хэлэжьэщт. Урысые Федерацием и Президентэу Владимир Путиныр икIэщакIоу ыкIи хэлажьэзэ ар рекIокIыщт.

НепэкIэ а зэхахьэм ихьакIэр Саудовскэ Аравиер ары. Нафэу зэрэщытымкIэ, Урысыем экономикэмкIи стратегие лъэныкъомкIи анахь гъусэныгъэ-зэдэлэжьэныгъэ игъэкIотыгъэ зыдыриIэхэм ар ащыщ. IэкIыб къэралхэм ыкIи Урысыем ишъолъыр зэфэшъхьафхэм къарыкIыгъэу бэ ащ хэлажьэрэр. Адыгеим илIыкIо куп хэхьагъэх республикэм игъэцэкIэкIо хабзэ икъулыкъухэм ыкIи иIофышIэ купхэм ялIыкIохэр. Ахэр ахэ­лэжьэщтых пленарнэ зэхэсыгъом, Iо­фыгъо зэфэшъхьафхэмкIэ сессиехэм ыкIи IофшIэным, инвестиционнэ хэхъо­ныгъэхэм, къыдэгъэкIыжьыным, зекIоным, мэкъумэщ къыдэгъэкIыжьыным, инфраструктурнэ проектхэм япхыгъэ Iофыгъохэм атегущыIэщтых.Мы илъэсым зэIукIэр анахьэу зыфэгъэхьыгъэщтыр Iофыгъоу зэгурыIоныгъэ зыхэлъ зэдэгущыIэгъум зыпкъитыныгъэм укъызэрэфищэрэр ары. Iофтхьабзэм хэлажьэхэрэм шIуфэскIэ закъыфигъэ-­загъ УФ-м и Президентэу Владимир Путиным. Ащ къызэрэхигъэщыгъэмкIэ, непэ, дунэе зэфыщытыкIэхэр ыкIи экономикэ зэпхыныгъэхэр, фэдэ зыпарэкIи къыхэмыкIыгъэу, къиныгъохэм зыщяутэ­лIэрэ лъэхъаным, зэгурыIоныгъэмрэ зэфэдэ фитыныгъэхэр къыдэзылъытэрэ зэдэгущыIэгъухэмрэ апшъэрэ мэхьанэ яIэн фае.

«Экономикэ системэ иным хэпчын умылъэкIынэу тихэгъэгу зэрэщыщыр къы­хэсэгъэщы. Тэ тыфэхьазыр шъхьэихыгъэ хэлъэу гъусэныгъэ къыддызиIэ зы­шIоигъо пстэуми тадэлэжьэнэу, ­сшIоигъу шъхьэкIэфэныгъэр ылъапсэу пIэлъэ кIы­хьэм телъытэгъэ, шъыпкъэныгъэм тегъэпсыхьэгъэ зэфыщытыкIэхэр зэдытиIэнхэр анахь шъхьаI», — къыхигъэщыгъ Владимир Путиным.Петербург щыкIорэ зэIукIэшхом къегъэлъагъо дунэе зэфыщытыкIэхэм ясистемэу лъэныкъуабэ къызэлъызыубытырэм тызэрэтехьэрэр ыкIи зэтекIыныгъэ­хэр нахьыбэ зыщыхъухэрэ лъэхъаным лъэныкъуабэ къыдэзылъытэрэ унашъохэм талъыхъун зэрэфаер. УФ-м и Президент кIэщакIо зыфэхъугъэ Iофтхьабзэхэу бизнес цIыкIумрэ гурытымрэ IэпыIэгъу ягъэгъотыгъэным ыкIи яфедэхэр къэу­хъумэгъэнхэм, япхыгъэхэр мэхьанэшхо зиIэ хъущтых. Министерствэ, институт зэфэшъхьафхэм, IофшIэным епхыгъэ зэхахьэхэм ялIыкIохэр занкIэу яIофхэм язэшIохын тегущыIэнхэ алъэкIыщт.Адыгеим и ЛIышъхьэ къызэрэхигъэщыгъэмкIэ, хабзэмрэ бизнесымрэ шIуа­гъэ къэзыхьыщт зэдэгущыIэгъу зэдыряIэнымкIэ, стратегическэ гухэлъхэр пхырыщыгъэнхэмкIэ, гъусакIэхэр къэ­гъотыгъэнхэмкIэ зэIукIэм мэхьанэшхо иI. Адыгеим илIыкIохэм «Единэ Россием» ипрограммэхэр, лъэпкъ проектэу «ШIуагъэ къэзытырэ ыкIи зэнэкъокъур зылъэпсэ экономикэр» зыфиIорэм ягъэ­цэкIэн зэрэкIорэм фэгъэхьыгъэ къэбарыр къагъэхьазырыгъ. Анахьэу анаIэ зытырагъэтыгъэр гугъапIэхэр къэзытырэ проектхэу стратегическэ лъэныкъохэм хэхъоныгъэ ягъэшIыгъэным, предпринимательствэм IэпыIэгъу етыгъэным ыкIи шъолъырхэм язэдэлэжьэныгъэ гъэпытэгъэным яIофыгъохэр ары.«ЭкономикэмкIэ амалэу тиIэхэм зя­тэгъэушъомбгъу, бизнес-проектыкIэхэу гугъэпIэ инхэр зэтпхыхэрэмкIи ищыкIэгъэ инфраструктурэр, инвестиционнэ гупчэхэр зэхэщэгъэнхэм епхыгъэ Iо­фыгъохэр лъытэгъэкIуатэх. А пстэуми яшIуагъэкIэ инвестициехэм алъэныкъокIэ республикэм зынаIэ къытезыдзэхэрэр нахьыбэ мэхъух, Кавказ инвестиционнэ форумэу бэмышIэу щыIагъэм икIэуххэми ар къагъэшъыпкъэжьыгъ. Сомэ миллиард 70-м ехъу зытефэщт инвестиционнэ зэзэгъыныгъи 10 ащ щызэдэтшIыгъ. Петербург щыкIорэ IофшIэным Iофэу щызэшIотхыщтхэм шъолъыр зэ­дэлэжьэныгъэр гъэпытэгъэнымкIэ, инвестициехэр нахьыбэ хъунхэмкIэ, рес­публикэм иэкономикэ ыпэкIэ лъыкIотэнымкIэ амал тедзэхэр къызэратыщтхэм сицыхьэ телъ», — къыIуагъ КъумпIыл Мурат.Петербург щыкIорэ Iофтхьабзэм тегъэпсыхьагъэу банкхэм яIофшIэнкIэ, предпринимательствэм, ныбжьыкIэ политикэм IэпыIэгъу ятыгъэнымкIэ, Iофы­шIэхэр гъэхьазырыгъэнхэмкIэ, шъо­лъыр­хэр зэдэлэжьэнхэмкIэ зэзэгъыныгъэ заулэмэ акIэтхэнхэу рахъухьагъ.НепэкIэ республикэм сомэ миллиарди 101-рэ фэдиз хъурэ инвестициехэм ателъытэгъэ проект 20 щагъэцакIэ. 2024-рэ илъэсым елъытыгъэмэ, 2025-м республикэм иэкономикэ иинвестициехэр сомэ миллиард 80,4-м, нэмыкIэу къэпIон хъумэ, проценти 104,9-м нэсыгъагъэх. Ащ амал къытыгъ илъэсэу икIыгъэм икIэуххэм ателъытагъэу Къыблэ федеральнэ шъолъырымкIэ пэрытныгъэ зыIыгъ шъолъыри 3-мэ Адыгеир ахэхьанэу. Илъэсэу икIыгъэм инвестициехэм алъэныкъокIэ Лъэпкъ рейтингэу зэхащэгъагъэм икIэуххэм нафэ къызэрашIыгъэмкIэ, зиIофхэр анахь дэгъу шъолъыр 16-мэ Адыгеир ахэфэгъагъ.АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.