АР-м и ЛIышъхьэ и МАХ
Пшъэрылъыбэ зыгъэцэкIэрэ гупчэу «Адыгеим иныбжьыкIэхэр» зыфиIорэр къызызэIуахыгъэр илъэс зэрэхъугъэр хигъэунэфыкIыгъ.
ИлъэскIэ узэкIэIэбэжьмэ, къалэу Мыекъуапэ игупчэ шъыпкъэ ит тарихъ-архитектурэ псэуалъэу агъэцэкIэжьыгъэм ар щагъэпсыгъ. А уахътэм ар ныбжьыкIэ чанхэр зэзыщалIэхэу, проектхэм зыщатегущыIэхэу, егъэджэн, культурнэ ыкIи патриотическэ программэхэр зыщыпхыращхэу, Iофтхьэбзэ инхэр зыщызэхащэхэу, IофышIэхэр зыщагъэхьазырхэрэ чIыпIэ хъугъэ.«НыбжьыкIэ политикэр шъолъырым щыпхырыщыгъэным тынаIэ тет, ащ пае «Единэ Россием», лъэпкъ проектхэу «НыбжьыкIэхэмрэ кIэлэцIыкIухэмрэ», «IофышIэхэр» зыфиIохэрэм амалэу къатыхэрэр тэгъэфедэх», — къащитхыгъ социальнэ хъытыум щыриIэ нэкIубгъохэм Адыгеим и ЛIышъхьэу, партиеу «Единэ Россием» ишъолъыр къутамэ и Секретарэу КъумпIыл Мурат.
Нэбгырэ мин 200 нахьыбэ ныбжьыкIэ зэрымыс шъолъырхэм ныбжьыкIэ политикэр зэращыпхыращырэр зызэрагъапшэм Адыгеир апэри 10-м ащыщ хъугъэ, Урысые зэнэкъокъоу «Шъолъырыр ныбжьыкIэхэм апай» зыфиIорэм апэрэ чIыпIэр щиубытыгъ. Ащ ишIуагъэкIэ Теуцожь ыкIи Шэуджэн районхэм ныбжьыкIэ гупчэхэр ащагъэпсынхэ алъэкIыгъ. Мыгъэ ахэр къызэIуахыщтых.Илъэсым ныбжьыкIэ гупчэм Iофышхо ышIагъ. ШIуагъэ къытэу ныбжьыкIэхэм яуахътэ агъэкIоным фытегъэпсыхьэгъэ Iофтхьабзэхэр бэу ащ щызэхащэх. Форумэу «Адыгеим иныбжьыкIэхэр 4.0» зыфиIорэм къыдыхэлъытагъэу шъолъыр зэнэкъокъоу «Росмолодежь.Гранты» апэрэу зэхащэгъагъ. Ащ хэлэжьагъэхэм ащыщэу нэбгыриймэ пстэумкIи сомэ миллиони 3,8-рэ зытефэрэ IэпыIэгъу аратыгъ.НыбжьыкIэхэм хабзэм зэдэгущыIэгъу занкIэ зыщыдашIырэ Iофтхьабзэ хъугъэх сэнаущыгъэ зыхэлъхэм яслетэу «Фыщтымрэ» лъэныкъо гъэнэфагъэ епхыгъэ зэхахьэу «Молодежка» зыфиIорэмрэ.Гупчэр къызызэIуахыгъэр илъэс зэрэхъурэм фэгъэхьыгъэу «Адыгеим иныбжьыкIэхэр» зыфиIорэ фестиваль зэхащэгъагъ. Ащ къекIолIагъэхэр «интерактивнэ площадкэхэм» ащыIагъэх, мастер-классхэм, нэмыкI Iофтхьабзэхэм ахэлэжьагъэх, концерткIэ, къашъохэмкIэ ыкIи мэфэкI торткIэ ар аухыгъ.«Адыгеим иныбжьыкIэхэм» сэнаущыгъэ зыхэлъ кIэлэ ыкIи пшъэшъэ чаныбэ джыри тапэкIэ зэрэзэфищэщтым сицыхьэ телъ. ТиныбжьыкIэхэм хэхъоныгъэ ашIынымкIэ, ыпэкIэ лъыкIотэнхэмкIэ, яамалхэр пхыращышъунхэмкIэ ыкIи тиреспубликэ гупсэ ищыIэныгъэ нахьышIу хъуным хэлэжьэшъунхэмкIэ ищыкIагъэр зэкIэ ядгъэгъотыным тыпылъыщт», — къытхыгъ КъумпIыл Мурат.