Iэшъынэ А.
Социальнэ IофышIэм и Мафэу къэблагъэрэм ипэгъокIэу «Социальнэ IофышIэ анахь дэгъу» зыфиIорэ зэнэкъокъум иаужырэ уцугъо тыгъуасэ ящэнэрэу зэхащагъ.
АР-м IофшIэнымкIэ ыкIи социальнэ хэхъоныгъэмкIэ и Министерствэ Iофтхьабзэр ригъэкIокIыгъ. Ащ изэхэщэнкIэ IэпыIэгъу къыфэхъугъ профсоюзхэм яорганизацие.Зэнэкъокъум иапэрэ уцугъо мэлылъфэгъум къыщегъэжьагъэу жъоныгъуакIэм нэс муниципальнэ образованиехэм ащыкIуагъ. Социальнэ IофышIи 104-рэ ащ хэлэжьагъ. Ащ текIоныгъэ къыщыдэзыхыгъэ нэбгыри 9-мэ сэнаущыгъэу ахэлъыр къагъэлъэгъуагъ.Социальнэ IофышIэхэм IэпэIэсэныгъэу аIэкIэлъымкIэ зэхъожьынхэр, мы сэнэхьатым имэхьанэ къэIэтыгъэныр, IофшIакIохэр нахьыбэу социальнэ учреждениехэм къящэлIэгъэнхэр ары зэхэщакIохэм пшъэрылъ шъхьаIэу зыфагъэуцужьыгъэр.Iофтхьабзэм хэлажьэхэрэм шIуфэс гущыIэкIэ закъыфигъэзагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.— ТимэфэкI ипэгъокIэу зиIофшIэнкIэ анахь къахэщыхэрэм ягъэунэфын хабзэ тфэхъугъ. Зэнэкъокъум имэхьанэ нэбгырэ пэпчъ зэхишIэнэу, хэлажьэхэрэм япчъагъэ нахьыбэ хъунэу тыфай. IэпэIэсэныгъэу шъуIэкIэлъымкIэ шъузэхъожьынымкIэ мыр амалышIоу щыт. ПшъэдэкIыжь ин зыпылъ IофшIэн шъогъэцакIэ, ар хэти къыгурыIон ыкIи уасэ фишIын фае. ЩыIэныгъэм чIыпIэ къин ригъэуцогъэ нэбгырэ мин пчъагъэмэ шъуигукIэгъу зэхашIэ. IофшIэн мыпсынкIэу жъугъэцакIэрэм гухахъо хэжъугъотэнэу, шъуищытхъу яжъугъэIонэу шъуфэсэIо, — къыIуагъ Мырзэ Джанбэч.Зэнэкъокъум хэлажьэхэрэм едзыгъуиплIыкIэ заушэтыгъ. «Визитная карточка» зыфиIорэм хахьэу социальнэ IофышIэхэм якъэбар, сэнэхьатыр къыхахыным лъапсэ фэхъугъэр къаIотагъ. ЯтIонэрэ уцугъом социальнэ фэIо-фашIэхэм япхыгъэ хэбзэгъэуцугъэр зэрашIэрэмкIэ заушэтыгъ. Ящэнэрэм чIыпIэ къин ифэгъэ цIыфым ищыкIэгъэ IэпыIэгъур зэрэригъэгъотырэ шIыкIэр IофышIэм къыгъэлъэгъон фэягъ. ЯплIэнэрэм яIофшIэн елъытыгъэу къагъэхьазырыгъэр къагъэлъэгъуагъ. ГумэкIыгъоу ащ къыщаIэтыгъэр еплъыгъэхэм къыхагъэщын ыкIи хэкIыпIэу иIэр къашIэн фэягъ.Iофтхьабзэм хэлажьэхэрэм яIофшIэн хэшIыкIэу фыряIэм, щэчыныгъэу ахэлъым, яамалхэр зэрагъэфедэхэрэм уасэ афашIыгъ. ОсэшIхэм ахэтыгъэх министрэу Мырзэ Джанбэч ыкIи министерст-вэм иотделхэмрэ профсоюз организациемрэ япащэхэр.Зэнэкъокъум икIэуххэр зэфахьысыжьыгъэх. Апэрэ чIыпIэр къыдэзыхыгъэм сомэ мин 50, ятIонэрэм сомэ мин 40, ящэнэрэм сомэ мин 30 афагъэшъошагъ, джащ фэдэу хэлэжьагъэхэм зэкIэми шIухьафтынхэр аратыгъэх.ДЕЛЭКЪО Анет.